မောင့်ပန်းမသေရဘူး

မောင့်ပန်းမသေရဘူး

ပန်းသေပန်းညှိုးဟာ အမျိုးသားအများစုတွင် ကြုံတွေ့ရတတ်သော အခြေအနေတစ်ရပ်ဖြစ်ပါတယ်။ ပန်းသေပန်းညှိုးဆိုတာ လိင်ဆက်ဆံချိန်တွင်အမျိုးသားများ လိင်အင်္ဂါမထောင်မတ်နိုင်တော့ခြင်းကို ဆိုလိုပါတယ်။ တစ်ခါတစ်ရံ ဖြစ်ခြင်းမှာပြဿနာမရှိသော်လည်း အမြဲတစေ ဖြစ်သော အခါ တွင် အိမ်ထောင်ရေးသုခမခံစားရ၍ မပြေလည်မှုများ၊ စိတ်ကျခြင်းများ နှင့် မိမိကိုယ်ကို ယုံကြည်မှုနည်းခြင်းများ ကြုံလာရနိုင်ပါတယ်။ ဒါကြောင့် ပန်းသေပန်းညှိုးရောဂါ အကြောင်းဖော်ပြပေးလိုက်ရပါတယ်။

ဘယ်လိုလက္ခဏာတွေပြလဲ
ပန်းသေပန်းညှိုးုဖြစ်လျှင် လိင်ဆက်ဆံရာတွင် အမြဲတစေ

-လိင်အဂါၤတောင့်တင်းထောင်မတ်လာမှုမရှိခြင်း

-လိင်အင်္ဂါထောင်မတ်မှုကိုမထိန်းနိုင်ခြင်း

-လိင်စိတ်ကုန်ခမ်းခြင်းတို့ ဖြစ်တတ်ပါတယ်။

ဘာလို့ဖြစ်တာလဲ?
အမျိုးသားများ အတွက် လိင်ဆက်ဆံခြင်း ဆိုင်ရာဖြစ်စဉ်မှာ ဦးနှောက်၊ဟော်မုန်း၊ စိတ်ခံစားမှု၊ အာရုံကြောစနစ်၊ ကြွက်သားစနစ် နှင့် သွေးကြောစနစ်များ အလုံးစုံပါဝင်သော ဖြစ်စဉ်တစ်ရပ်ပဲ ဖြစ်ပါတယ်။ ထို့ကြောင့် အထက်ပါစနစ်တစ်ခုခု ချို့ယွင်းပါက ပန်းသေပန်းညှိုးကိုဖြစ်စေနိုင်ပါတယ်။ ပန်းသေပန်းညှိုးဖြစ်စေတယ့် အကြောင်းအရာများကို ယေဘူယျအားဖြင့် ၂ မျိုးခွဲခြားလို့ရပါတယ်။

၁.ကိုယ်ပိုင်းဆိုင်ရာချို့ယွင်းမှု နှင့်

၂.စိတ်ပိုင်းဆိုင်ရာချို့ယွင်းမှု ဟူ၍ဖြစ်ပါတယ်။

ကိုယ်ပိုင်းဆိုင်ရာချို့ယွင်းမှုများ
ပန်းသေပန်းညှိုးရောဂါတော်တော် များများမှာကိုယ်ပိုင်းဆိုင်ရာချို့ယွင်းချက်ကြောင့် ဖြစ်တာတွေ့ရပါတယ်။ အဖြစ်များသော ရောဂါ၊အခြေအနေများမှာ

-နှလုံးရောဂါ

-သွေးကြောပိတ်ခြင်း

-ကိုလ်လတ်စတီရောများခြင်း

-သွေးတိုးရောဂါ

-အဝလွန်ခြင်း

-ဇီဝဖြစ်ပျက်မမှန်မှုကြောင့်ဖြစ်သောရောဂါအစုအဝေး (metabolic syndrome)

-ပါတ်ကင်ဆင်ရောဂါ (Parkinson’s disease)

-မာလ်တီပယ် စကယ်လယ်ရိုးစစ်(multiple sclerosis) လို့ခေါ်တဲ့ အာရုံကြောဆိုင်ရာချို့ယွင်းမှုရောဂါ

-အချို့သောဆေးများ၏ဘေးထွက်ဆိုးကျိုးများ

-ဆေးလိပ်သောက်ခြင်း

-Peyronie’s ရောဂါ : လိင်အဂါၤအထဲတွင် အမာရွတ်ရှိနေခြင်း

-အရက်သောက်ခြင်း၊ မူးယစ်ဆေးသုံးခြင်း

-ဆီးကျိတ်ကင်ဆာအတွက်ကုထုံးများ

-ဆီးခုံနားတဝိုက် သို့မဟုတ် ကျောရိုးမ တွင်ထိခိုက်ဒဏ်ရာရခြင်း၊ ခွဲစိတ်မှုပြုလုပ်ရခြင်း အစရှိသောအခြေအနေများတွင် ကိုယ်ပိုင်းဆိုင်ရာချို့ယွင်းချက်အနေဖြင့် ပန်းသေပန်းညှိုးဖြစ်တတ်ပါတယ်။

စိတ်ပိုင်းဆိုင်ရာချို့ယွင်းမှုများ
လိင်အင်္ဂါတောင့်တင်းခြင်းဖြစ်စဉ်မှာ လိင်စိတ်တက်ကြွခြင်းမှ အစပြုသောကြောင့် စိတ်ခံစားချက်သည်လည်းအရေးကြီးသောနေရာမှပါဝင်နေပါတယ်။

-စိတ်ကျခြင်း၊ စိုးရိမ်မှုလွန်ကဲရောဂါဖြစ်ခြင်း နှင့်အခြားသောစိတ်ကျန်းမာရေးဆိုင်ရာအခြေအနေများ

-စိတ်ဖိစိမှုများခြင်း

-အခြားသောပြဿနာများကြောင့် အိမ်ထောင်ဖက်နှင့် အဆင်မပြေခြင်း စသော စိတ်ခံစားမှု အခြေအနေများကြောင့် လိင်အင်္ဂါထောင်မတ်မှုကို ထိခိုက်စေကာ ပန်းသေပန်းညှိုးဖြစ်စေနိုင်ပါတယ်။

ဘယ်လိုကုသနိုင်လဲ?
သောက်ဆေးသောက်၍ကုသနိုင်ပါတယ်။ အဆိုပါသောက်ဆေးတွေကတော့

-Sildenafil (Viagra)

-Tadalafil (Adcicra, Cialid)

-Vardenafil (Levitra, Staxyn)

-Avanafil (Stendra) အစရှိသောဆေးများ မှာ လိင်အင်္ဂါရှိကြွက်သားများ အားဖြေလျော့စေသော nitric oxide ဓါတ်ကို ပိုမိုထွက်စေခြင်းဖြင့် သွေးဝင်ရောက်မှုကောင်းစေကာ လိင်အင်္ဂါအားမာစေခြင်းဖြစ်ပါတယ်။

အဆိုပါဆေးများမှာ

-Nitrate ဆေးများသောက်နေလျှင်

-နှလုံးရောဂါ ရှိလျှင်

-သွေးပေါင်ကျခြင်းဖြစ်လျှင် အန္တရာယ် ရှိနိုင်သောကြောင့် ဆရာဝန်နှင့် ဦးစွာတိုင်ပင်သင့်ပါတယ်။

အခြားသောကုသနည်းများမှာ

-လိင်အင်္ဂါ ပန့်မ်ဆွဲခြင်း – လေဟာနယ်ကဲ့ သို့ပြုလုပ်ထားသော ပန်မ့်အချောင်းဖြစ်ပြီး လိင်အင်္ဂါတွင် တပ်ဆင်ဆွဲစုပ်စေကာ လိင်အင်္ဂါထဲသို့သွေးဝင်ရောက်မှု ကောင်းစေကာ ထိုအချိန်တွင် လိင်အင်္ဂါ အရင်း၌ ကွင်းလေးစွပ်ခြင်းဖြင့် လိင်အဂါၤတောင်မတ်မှုကိုဖြစ်စေသော နည်းပဲဖြစ်ပါတယ်။

-လိင်အင်္ဂါတွင် implant ထည့်ခြင်း : လိင်အင်္ဂါတွင် ဖောင်းနိုင် ပိန်နိုင်သော (သို့မဟုတ်) ကွေးနိုင်ဆန့်နိုင်သော အချောင်းလေးများပါသည့် ပစ္စည်းအား ခွဲစိတ်၍ထည့်သောနည်းပဲဖြစ်ပါတယ်။

-လေ့ကျင့်ခန်းလုပ်ခြင်း : ကီးဂယ် လေ့ကျင့်ခန်း (Kegel Exercise) ကဲ့သို့ ကြွက်သားလေ့ကျင့်ခန်းများ လုပ်ခြင်းဖြင့်လည်း လိင်အင်္ဂါကြွက်သားများ သန်စွမ်းစေပါလိမ့်မယ်။

နေ့စဉ်နေထိုင်မှုပုံစံပြောင်းလဲခြင်း

နေ့စဉ်နေထိုင်မှုပုံစံ ကို မှန်ကန်အောင် နေထိုင်ခြင်းက ပန်းသေပန်းညှိုးရောဂါကို ကာကွယ်နိုင်သည့်အပြင် ဖြစ်နေသူတို့ အတွက်လည်း ပိုမဆိုးရန်လုပ်ဆောင်ပေးနိုင်ပါတယ်။ မှန်ကန်သော နေထိုင်မှုပုံစံတွေကတော့

-ဆေးလိပ်မသောက်ပါနှင့်။ ဆေးလိပ်သောက်ပါက ဆေးလိပ်ဖြတ်သင့်ပါတယ်။

-အဝလွန်နေပါက ကိုယ်အလေးချိန်လျော့ရန်ကြိုးစားသင့်ပါတယ်။

-နေ့စဉ် လေ့ကျင့်ခန်း တစ်ခုခု ပုံမှန်ပြုလုပ်ပါ။

-အရက်သောက်ခြင်း နှင့် အခြားသော မူးယစ်ဆေးများကို ရှောင်ကြဉ်ပါ။

-အိမ်ထောင်ဖက်နှင့် ဆက်ဆံရေးကောင်းမွန်စွာ နေရန်ကြိုးစားသင့်ပါတယ်။

-စိတ်ဖိစီးမှုကို လျော့ချပါ။

ပန်းသေပန်းညှိုးမှာ အမျိုးသားများ ဖြစ်လေ့ရှိသော ပြဿနာတစ်ရပ်ဖြစ်သောကြောင့် ဖြစ်လာလျှင် မရှက်သင့်ပဲ ဆရာဝန်နှင့်တိုင်ပင်သင့်ပါတယ်။

အမျိုးသားများ ကိုယ့်ကိုကိုယ် ယုံကြည်မှုမကျစေရန်နှင့် အိမ်ထောင်မှုသုခ ခံစားနိုင်ရန်ရည်ရွယ်လျက်…..

Dr.Z