လက်သည်းခြေသည်းတွေကပြောတဲ့ သင့်ကျန်းမာရေး
လက်သည်းခြေသည်းတွေဟာ ကျွန်တော်တို့ရဲ့လက်ထိပ်ခြေထိပ်လေးတွေကို ထိခိုက်ဒဏ်ရာမရအောင်ကာကွယ်ပေးရုံသာမက ခန္ဓာကိုယ်တွင်းမှာဘာတွေဖြစ်နေလဲဆိုတာကိုလည်း သူတို့ရဲ့အရောင်၊ ပုံသဏ္ဍာန်၊အနေအထားစတဲ့အချက်တွေကိုကြည့်ခြင်းဖြင့် တစိတ်တပိုင်းသိနိုင်တယ်လို့ သုတေသနပညာရှင်များက ပြောထားပါတယ်။
လက်သည်းခြေသည်းတွေရဲ့ပုံမှန်အရောင်ကတော့ နီမြန်းတဲ့အရောင်ဖြစ်ပါတယ်။
လက်သည်းခြေသည်းတွေရဲ့အရောင်၊ပုံသဏ္ဍာန်၊အနေအထားတွေကိုကြည့်ပြီး ခန္ဓာကိုယ်တိုင်းမှာဖြစ်နေနိုင်တဲ့အခြေအနေတွေကို သုတေသနပညာရှင်များက အောက်ပါအတိုင်းပြောထားပါတယ်။
လက်သည်းခြေသည်းအရောင်က ဖျော့နေတယ်ဆိုရင် သွေးအားနည်းနေတာ၊ အာဟာရဓါတ်မပြည့်ဝတာ၊ အသည်းမှာရောဂါရှိနေတာ၊ နှလုံးကောင်းကောင်းအလုပ်မလုပ်နိုင်တာစသဖြင့် ဖြစ်နေနိုင်ပါတယ်။
လက်သည်းခြေသည်းအရောင်က ဖြူနေတယ်ဆိုရင် အသည်းရောင်နေတာ၊ခန္ဓာကိုယ်ထဲမှာအဆိပ်အတောက်ဓါတ်တွေများနေတာ တွေဖြစ်နေနိုင်ပါတယ်။
လက်သည်းခြေသည်းအရောင်က ပြာနေတယ်ဆိုရင်
ကိုယ်ခန္ဓာမှာအောက်စီဂျင်နည်းနေတာဖြစ်နိုင်ပြီး နှလုံးရောဂါ၊နမိုးနီးယား (အဆုတ်ရောင်) ရောဂါတွေနဲ့လည်းဆက်စပ်မှုရှိနေနိုင်ပါတယ်။
လက်သည်းခြေသည်းအရောင်က ဝါနေတယ်ဆိုရင် လက်သည်းခြေသည်းမှိုစွဲတာ၊ သိုင်းရွက်ဟော်မုန်းရောဂါရှိတာ၊ အဆုတ်ရောဂါရှိတာ၊ ဆီးချိုရောဂါ၊ ဆိုရီရေးစစ်အရေပြားရောဂါရှိတာတွေဖြစ်နေနိုင်ပါတယ်။
လက်သည်းဝါတာအပြင် လက်သည်းခြေသည်းတွေကွဲအက်နေတာ၊ ကျိုးပဲ့လွယ်တာတွေရှိနေတယ်ဆိုရင် မှိုပိုးစွဲတာ၊ သိုင်းရွက်ဟော်မုန်းရောဂါရှိတာတွေဖြစ်နိုင်ဖို့ပိုများပါတယ်။
လက်သည်းခြေသည်းတွေရဲ့မျက်နှာပြင်ပေါ်မှာချိုင့်ခွက်လေးတွေအပေါက်လေးတွေဖြစ်တာ သို့မဟုတ် လှိုင်းထနေတာဆိုရင် အဆစ်ရောင်ရောဂါရှိတာ၊ ဆိုရီးရေးဆစ်အရေပြားရောဂါရှိတာတွေဖြစ်နိုင်ပါတယ်။
လက်သည်းခြေသည်းဘေးနားတဝိုက်က အရေပြားနေရာတွေဖောင်းကားရောင်ရမ်းနေတယ်ဆိုရင် တွယ်ဆက်တစ်သျှူးရောဂါ (Connective tissue disorder)၊ အရေပြားလေးဖက်နာဖြစ်တာ(SLE) တွေဖြစ်နေနိုင်ပါတယ်။
လက်သည်းခြေသည်းအောက်မှာ အနက်စင်းလေးတွေပေါ်လာတယ်ဆိုရင် လက်သည်းခြေသည်း အနည်းငယ်ထိခိုက်ဒဏ်ရာရပြီး လက်သည်းခြေသည်းအောက်မှာသွေးအနည်းငယ်ယိုတာ၊ လက်သည်းခြေသည်းအောက်ကသွေးကြောလေးတွေရောင်ရမ်းတာ တွေလည်းဖြစ်နိုင်သလို လက်သည်းခြေသည်းအောက်မှာ မှဲ့ဖြစ်နေတာလည်းဖြစ်နိုင်ပါတယ်။
ထိခိုက်ဒဏ်ရာအနည်းငယ်ရပြီး သွေးနည်းနည်းယိုလို့ သို့မဟုတ် လက်သည်းခြေသည်းအောက် သွေးကြောလေးတွေရောင်ရမ်းလို့ သွေးထွက်ရာကနေ အနက်အစင်းကြောင်းဖြစ်တာက တဖြည်းဖြည်းချင်းပျောက်သွားနိုင်ပါတယ်။
တကယ်လို့ အနက်အစင်းကြောင်းက တော်တော်နဲ့မပျောက်ဘူး။ ပိုကြီးလာတယ်ဆိုရင်တော့ လက်သည်းခြေသည်းအောက်မှာမှဲ့ဖြစ်တာဖြစ်နိုင်ပါတယ်။ လက်သည်းခြေသည်းအောက်မှာမှဲ့ဖြစ်တာက မှဲ့ကင်ဆာ(အရေပြားကင်ဆာ)ဖြစ်နိုင်ခြေများတဲ့အတွက် အရေပြားဆရာဝန်နဲ့အမြန်ဆုံးပြသသင့်ပါတယ်။
ဒါတွေကတော့ လက်သည်းခြေသည်းတွေရဲ့အရောင်၊ ပုံသဏ္ဍာန်၊ အနေအထားတွေကိုကြည့်ပြီး ကိုယ်ထဲမှာဘာတွေဖြစ်နေနိုင်လဲဆိုတာကို သုတေသနပညာရှင်တွေက ခန့်မှန်းပြောကြားထားတာတွေပါ။
လက်သည်းခြေသည်းတွေရဲ့အရောင်၊ ပုံသဏ္ဍာန်၊ အနေအထားတွေကိုကြည့်ပြီးပြောတာအပြင် လက်သည်းခဏခဏကိုက်တဲ့အကျင့်ရှိပါက ထိုသူမှာ စိုးရိမ်စိတ်လွန်ကဲတဲ့စိတ်ရောဂါ၊ စိတ်ပူပန်မှုများတဲ့စိတ်ရောဂါတွေရှိနေဖို့များတယ်လို့ သုတေသနပညာရှင်များက ထပ်ဆောင်းပြောကြားထားပါသေးတယ်။
Dr 528
