လျင်မြန်စွာအိပ်မောကျစေမည့် နည်းလမ်း ၂၀ အပိုင်း(၁)

            အိပ်စက်ခြင်းသည် လူတို့အတွက် ဇီ၀ကမ္မလိုအပ်ချက်ဖြစ်ပါသည်။

ထို့ပြင် ခုခံအားစနစ်ကို ကောင်းမွန်စေရန် ကူညီပေးသည့်အပြင် ခန္ဓာကိုယ်၏ အခြားရုပ်ပိုင်းဆိုင်ရာလက္ခဏာများ၊ စိတ်ပိုင်းဆိုင်ရာအခြေအနေများစွာတို့ကိုလည်း တိုးတက်ကောင်းမွန်စေရန်လည်း လုပ်ဆောင်ပေးပါသည်။

အိပ်စက်ခြင်းနှင့် ပတ်သတ်လျှင် အိပ်ချိန်ပြည့်၀ရန်လိုအပ်သလို၊ နှစ်ခြိုက်စွာ အိပ်စက်နိုင်ရန်လည်း လိုအပ်ပါသည်။ ထို့ပြင် အိပ်ရာဝင်ပြီးမကြာမီမှာပင် ကောင်းစွာ အိပ်မောကျရန်လည်း အရေးကြီးပါသည်။

အချို့က အိပ်စက်ချိန် မလုံလောက်သည့် ပြဿနာကို ကြုံတွေ့နေရသည့်အချိန်တွင် အချို့က အိပ်ရာဝင်ချိန် မမှန်သည့် အခြေအနေနှင့် ရင်ဆိုင်နေရပါသည်။ အချို့မှာမူ အိပ်ရာဝင်ချိန်မှန်ကန်သော်လည်း ချက်ချင်း အိပ်မပျော်ဘဲ နှစ်ခြိုက်စွာ အိပ်ပျော်နိုင်ရန် အချိန်များစွာပေးနေရသည့် အခက်အခဲနှင့် တွေ့ကြုံနေရပါသည်။

ထို့ကြောင့် အိပ်ရာဝင်ပြီးသည်နှင့် လျင်မြန်စွာ အိပ်မောကျခြင်းကို ကူညီပေးနိုင်မည့် နည်းလမ်းများကို ဆွေးနွေးတင်ပြပေးလိုက်ပါသည်။

၁။        အိပ်ရာထဲသို့ရောက်သောအခါ အတင်းအကျပ်အိပ်ပျော်အောင် ကြိုးစားခြင်းကို ရှောင်ကြဉ်ပါ

အိပ်ရာထဲသို့ရောက်သောအခါ အတင်းအကျပ်အိပ်ပျော်အောင် ကြိုးစားခြင်းထက် မိမိခန္ဓာကိုယ်ကိုသက်တောင့်သက်သာဖြစ်အောင် ဖြေလျော့ကာ စိတ်တည်ငြိမ်အောင်ထားခြင်းက လျင်မြန်စွာ အိပ်မောကျစေရန်ပိုမိုလွယ်ကူစေပါသည်။

၂။        အိပ်ရာပေါ်တွင် လဲလျောင်းနေရသည်ကို စိတ်ကျေနပ်မှုရှိပါ

အိပ်ရာပေါ်တွင် သက်တောင့်သက်သာ အေးအေးဆေးဆေး လဲလျောင်းနေရသည့်အရသာကို နှစ်သက်တတ်စေရန် ကြိုးစားရပါမည်။ ထိုသို့ နှစ်သက်တတ်ခြင်းသည် စိတ်ကျေနပ်မှုများကို ပိုမိုဖြစ်စေကာ နှစ်ခြိုက်စွာ အလျင်အမြန် အိပ်ပျော်စေရန် ကူညီပေးပါလိမ့်မည်။

၃။        screen များကို ပိတ်ထားပါ။

အိပ်ခါနီးအချိန်တွင် ဖုန်းများ၊ အင်တာနက်များကို အသုံးပြုခြင်းသည် ထိုပစ္စည်းများမှ ထွက်လာသည့် Blue light များကြောင့် မျက်လုံးကိုထိခိုက်စေသည့်အပြင် အာရုံကိုပိုမိုတက်ကြွလန်းဆန်းစေ၍ အိပ်စက်ခြင်းကိုအနှောင့်အယှက်ဖြစ်စေပါသည်။

ထို့ကြောင့်အိပ်ခါနီးအချိန်တွင် screen များကို မကြည့်ဘဲနေခြင်းသည်လည်း လျင်မြန်စွာအိပ်မောကျစေသည့် နည်းလမ်းတစ်ခုဖြစ်ပါသည်။

၄။        ရေနွေးဖြင့် ရေချိုးပါ

အိပ်ခါနီး ၁ နာရီ  ၂ နာရီခန့် အလိုတွင် ရေနွေးဖြင့်ရေချိုးခြင်းသည်လည်း  လျင်မြန်စွာအိပ်မောကျစေရန် ၃၆% ပိုမိုတိုးတက်စေကြောင်းတွေ့ရှိရပါသည်။

၅။          အနားယူဖို့လိုအပ်ကြောင်း အသိအမှတ်ပြုပါ

တစ်ခါတစ်ရံ အိပ်မပျော်ခြင်းသည် မိမိ၏မသိစိတ်က အနားယူချင်စိတ်မရှိသောကြောင့် ဖြစ်နေတတ်ပါသည်။ ထို့ကြောင့် မိမိ၏စိတ်နှင့်ခန္ဓာကိုယ်အား အနားပေးရန်ကိစ္စသည် မရှိမဖြစ်လိုအပ်ကြောင်း ယုံကြည်လက်ခံ အသိအမှတ်ပြုသင့်ပါသည်။ ထိုသို့ ပြုလုပ်ခြင်းအားဖြင့် ညဘက်အိပ်စက်အနားယူသည့်အခါ လျင်မြန်စွာ အိပ်မောကျစေနိုင်ပါသည်။

၆။       မအိပ်ခင်တွင် တရားထိုင်ပါ

အိပ်ရာသို့မဝင်ခင် တရားထိုင်ခြင်းသည်လည်း စိတ်ကိုပိုမိုတည်ငြိမ်စေ၍ အလျင်အမြန် နှစ်ခြိုက်စွာ အိပ်မောကျခြင်းကို များစွာအထောက်အကူပြုကြောင်း တွေ့ရှိရပါသည်။

၇။       လက်နှင့် ခြေထောက်များ သက်တောင့်သက်သာရှိပါစေ

တစ်ခါတစ်ရံ လက်နှင့်ခြေထောက်များ အေးစက်နေခြင်းကလည်း အလျင်အမြန် နှစ်ခြိုက်စွာအိပ်ပျော်ခြင်းမဖြစ်အောင် တားဆီးနေတတ်ပါသည်။ ထို့ကြောင့်လက်နှင့်ခြေထောက်များကို နွေးထွေးနေစေရန် စီမံပြုလုပ်ခြင်းအားဖြင့် အလျင်အမြန်နှစ်ခြိုက်စွာအိပ်မောကျခြင်းကို အထောက်အကူပြုနိုင်ပါသည်။

၈။       အိပ်ချိန်ထချိန် မှန်ကန်ပါစေ

အိပ်ချိန်ထချိန် မှန်ကန်အောင်လုပ်ခြင်းအားဖြင့် ပုံမှန်အိပ်နေကျအချိန်တွင် လျင်မြန်စွာ အိပ်မောကျစေရန် အထောက်အကူပြုနိုင်ပါသည်။

အိပ်ချိန်မမှန်ကန်ခြင်းသည် အလျင်အမြန်နှစ်ခြိုက်စွာအိပ်မောကျရန် ခက်ခဲတတ်သလို မနက်ခင်း နိုးထရန်လည်း အခက်အခဲများစွာ ရှိတတ်ပါသည်။

၉။       သရေစာများစားပါ

ကာဗိုဟိုက်ဒရိတ်နည်းပါးသော ပေါ့ပေါ့ပါးပါးသရေစာများကို အိပ်စက်ခါနီးအချိန်တွင်စားခြင်းကလည်း လျင်မြန်စွာအိပ်မောကျစေရန် အကူအညီပေးနိုင်ပါသည်။ သို့သော် ဗိုက်ပြည့်အင့်အောင် ပမာဏများစွာ စားသုံးခြင်းကိုမူ မပြုလုပ်သင့်ပေ။

အထက်ပါနည်းလမ်းများသည် လျင်မြန်စွာ အိပ်မောကျစေရန် အထောက်အကူပေးနိုင်သည့် နည်းလမ်းများထဲမှ အချို့ဖြစ်ပါသည်။ လျင်မြန်စွာ အိပ်မောကျစေရန် အထောက်အကူပေးနိုင်သည့် နောက်ထပ်နည်းလမ်း ၈ ချက်ကို အပိုင်း ၂ တွင် ဆက်လက်ဆွေးနွေး တင်ပြသွားပါမည်။

Dr. မွန်