ရာသီချိန်ခါ အေးလာသည့်အချိန်တွင်အဖြစ်များသည့် ချွဲကပ်ချောင်းဆိုးခြင်း

ရာသီဥတုအပြောင်းအလဲကာလများတွင် လူအများစုကြုံတွေ့ရလေ့ရှိသည့် ဝေဒနာများအနက်တစ်ခုမှာ ချောင်းဆိုးချွဲကပ်ခြင်း ဖြစ်ပါသည်။

ရာသီဥတုအပြောင်းအလဲကာလမှာ ကလေးလူကြီးမရွေး ချောင်းဆိုးလည်ချောင်းနာခြင်းတို့ အတွေ့ရများလာပါသည် ။

အေးသောရာသီဥတုကာလများတွင် များသောအားဖြင့် Sesonal Flu (ရာသီတုပ်ကွေး) ကူးစက်ခံရ၍ ဖျားပြီးချွဲကပ်ချောင်းဆိုးခြင်း ဖြစ်ပွားတတ်ပါသည်။

ဗိုင်းရပ်စ်(Virus)တုပ်ကွေးကြောင့် မဟုတ်ဘဲ ရာသီချိန်ခါချမ်းအေးသည့် ဆောင်းတွင်းတွင် အအေးဓါတ်ကြောင့် လေပြွန်ကျဥ်းပြီး အချွဲများဖြင့်ပိတ်ကာ ချောင်းဆိုးချွဲကြပ်နိုင်ပါသည်။ အထူးသဖြင့် ဆောင်းတွင်းမနက်စောစော အေးသည့်အချိန်များတွင် ပန်းနာရင်ကြပ်ခြင်း၊ နှာရည်ယို နှာခေါင်းပိတ်ပြီး ချွဲကပ်ချောင်းဆိုးခြင်းတို့ အဖြစ်များလေ့ရှိပါသည်။

နာတာရှည် လေပြွန်ရောင်ရောဂါရှိသူများတွင်လည်း ရာသီဥတု အအေးဓါတ်ကြောင့် ချောင်းဆိုးချွဲကပ်ဖြစ်နိုင်သည်။ သောက်သုံးရသော အချို့ဆေးဝါးများကြောင့်လည်း ချောင်းဆိုးချွဲကြပ် ဖြစ်နိုင်ပါသည်။

ထို့ကြောင့် ချောင်းဆိုးချွဲကြပ်လျှင် အခြားသော လက္ခဏာများကိုလည်း စောင့်ကြည့်ရပါမည်။ ဖျားခြင်း। အသက်ရှူရခက်ခဲခြင်း। တရွှီရွှီမြည်ပြီး ရင်ကြပ်ခြင်း। ရင်ဘတ်အောင့်ခြင်း စသောလက္ခဏာများနှင့်လည်း တွဲတတ်ပါသည်။

ရာသီတုပ်ကွေး (Senson flu) ကူးစက်ခံရလျှင် ဖျားခြင်း। ခေါင်းကိုက်ခြင်း। ချောင်းဆိုးသလိပ်ထွက်ပြီး အဆုတ်ရောင်ရမ်းခြင်းထိ ခံစားရတတ်ပါတယ်။ လက်ရှိကာလမှာ ကမ္ဘာ့ကပ်ရောဂါအဖြစ်ရှိနေသည့် Covid -19 ကိုဗစ်ရောဂါခံစားရသူများတွင်လည်း ချောင်းဆိုးသည့် လက္ခဏာရှိနိုင်သော်လည်း ၎င်းမှာချောင်းခြောက် (သလိပ်မပါ) ပဲ ဆိုးခြင်းဖြစ်သည်။

Covid-19 ရောဂါတွင် အခြားလက္ခဏာများဖြစ်သည့် ဖျားခြင်း। နုံးခြင်း। အနံ့ အရသာ ပျောက်ခြင်းနှင့် Pneumonnia (အဆုတ်ရောင်) ခြင်းကြောင့် အဓိကအားဖြင့် အသက်ရှူခက်ခဲခြင်းတို့ရှိတတ်ပြီး အသက်ဆုံးရှုံးရသည်အထိ ရှိနိုင်ပါသည်။

ကလေးများချွဲကပ်ချောင်းဆိုးခြင်း

ကလေးများတွင်ချောင်းဆိုးလျှင် အရေးကြီးသော အန္တရာယ်လက္ခဏာ Danger signs များကို ဂရုပြုသင့်သည်။ အဖျားကြီးခြင်း၊ အသက်ရှူနှုန်းမြန်ခြင်း-အသက် ၂ လအောက်ကလေးမှာ အကြိမ်ခြောက်ဆယ်အထက်। ၂ လ-၁ နှစ်ကြားတွင် ငါးဆယ်အထက်၊ ၁-၅ နှစ်ကြားတွင် အကြိမ်လေးဆယ်အထက်မြန်လျှင်। အသက်ရှူစဥ် ရင်ဘတ်အောက်ပိုင်း ချိုင့်ဝင်လျှင်। ပြာနှမ်းလာလျှင်। နို့/အစာကောင်းကောင်းမဝင်လျှင် နီးစပ်ရာဆေးရုံသို့ အမြန်ဆုံးသွားရောက်ရပါမည်။

ချွဲကပ်ချောင်းဆိုးခြင်းသက်သာစေမည့်နည်းများ

၁။ ရေများများသောက်ပါ။ ချွဲသလိပ်ကိုပျော်စေနိုင်တဲ့ ရေခပ်နွေးနွေးသောက်ပါ၊ ရေခဲရေရှောင်သင့်ပါတယ်။

၂။ ဆီကြော်နှင့် ဆီမသန့်သော အစားအစာတွေရှောင်ပါ။

၃။ ဖုန်မှုန့်। သဲမှုန့်များသောနေရာ। လူထူထပ်သောနေရာများကို တတ်နိုင်သမျှရှောင်ပါ။ ရနံ့ပြင်းသော အမွှေးနံ့သာများ ရှောင်ပါ။ ဆေးလိပ်သောက်ခြင်း ရှောင်ပါ။

၄။ အိမ်တွင်လေဝင်လေထွက် ကောင်းမွန်အောင်ထားရှိပါ။ အမွှေးတိုင်। ခြင်ဆေး। မီးသွေးမီးတို့ကြောင့် အိမ်တွင်းလေထုညစ်ညမ်းမှုမဖြစ်အောင် ဂရုပြုပါ။ စိုထိုင်းဆကို ထိန်းထားပေးသည့် လေသန့်စင်စက်। အစိုဓါတ်ထိန်းစက် humidifier များသုံးပါ။

၅။ ရာသီချိန်ခါ အေးလာသည့်အချိန်တွင် နွေးနွေးထွေးထွေးနေပါ။ ရေနွေးစိမ်ခြင်း। ချိုးခြင်းပြုလုပ်ပါ။

၆။ အပြင်က ပြန်လာပြီးတိုင်း လက်ကိုဆပ်ပြာဖြင့် သန့်ရှင်းစင်ကြယ်အောင် ဆေးကြောပေးပါ။

၇။ ဗီတာမင်စီဓါတ် Vitamin C ကြွယ်ဝသော အစားအစာ। vitamin ဆေးများ မှီဝဲပါ။

၈။ ငုံဆေးနှင့် ဆရာဝန်ညွှန်ကြားချက်မလိုသည့် ချောင်းဆိုးပျောက်ဆေးများ သောက်သုံးခြင်းတို့ ပြုလုပ်နိုင်ပါသည်။

အကယ်၍ ချွဲကပ်ချောင်းဆိုးခြင်းအပြင် ချွဲများ ပမာဏများစွာထွက်ခြင်း। အနံ့ဆိုးခြင်း। ချွဲအရောင် ပုံမှန်မဟုတ်ဘဲ ပန်းရောင်သမ်းခြင်း। နှစ်ပတ်ထက်ကြာအောင် ရက်ရှည်ချောင်းဆိုးပြီး ချောင်းဆိုးသွေးပါ।ရက်ရှည်ဖျားခြင်း। အစားအသောက်ပျက်ကာ ကိုယ်အလေးချိန်ကျဆင်းခြင်း। ရင်ဘတ်အောင့်ခြင်း। အသက်ရှူရခက်ခဲခြင်းစသော လက္ခဏာများခံစားလာရပါက နီးစပ်ရာ ကျန်းမာရေးစောင့်ရှောက်မှုဌာနများတွင် တိုင်ပင်ကုသမှုခံယူရန်လိုအပ်ကြောင်း အသိပေးရေးသားလိုက်ရပါတယ်ရှင်……,

Author: Dr.Yee Mon