ကိုယ်အလေးချိန်လျှော့နိုင်ရန်အတွက် လေ့ကျင့်ခန်းပြုလုပ်ခြင်းနဲ့ အစားအစာရွေးချယ်စားသုံးခြင်းက အဓိကနေရာမှာ ပါ၀င်ပါတယ်။ ဒါပေမဲ့ တချို့အခြေအနေတွေမှာ လေ့ကျင့်ခန်းပုံမှန်ပြုလုပ်ဖို့ဆိုတာ အခက်အခဲရှိနေနိုင်ပါတယ်။ ဒါကြောင့်အားကစားပြုလုပ်စရာမလိုဘဲ ကိုယ်အလေးချိန်လျှော့ချနိုင်မယ့်နည်းလမ်းကောင်းတွေကို ဝေမျှပေးလိုက်ပါတယ်။
၁။ အစာကိုကျေညက်စွာဝါးစားပါ
အစာကိုကျေညက်စွာဝါးစားခြင်းဖြင့် အစာစားသုံးမှုပမာဏကို ပုံမှန်ထက်လျှော့ချနိုင်ပြီး ဆာလောင်မှုကိုလည်း လျင်မြန်စွာဖြည့်ဆည်းပေးနိုင်ပါတယ်။ လေ့လာတွေ့ရှိချက်များအရ အစာကိုကျေညက်စွာမဝါးဘဲ လျင်မြန်စွာစားသောက်သူတွေမှာ ကိုယ်အလေးချိန်မြင့်တက်လာခြင်းနဲ့ အ၀လွန်ခြင်းတွေ ပိုမိုဖြစ်ပေါ်နိုင်ပါတယ်။ ဒါကြောင့် အစာကိုဖြည်းဖြည်းမှန်မှန်နဲ့ ကျေညက်စွာဝါးစားသင့်ပါတယ်။
၂။ ပရိုတင်းဓာတ်ကြွယ်၀သော အစားအစာများကို စားသုံးခြင်း
ပရိုတင်းဓာတ်ပြည့်၀တဲ့ အစားအစာတွေကို စားသုံးခြင်းဖြင့် မကြာခဏအစာစားချင်စိတ်ကို ဟန့်တားပေးနိုင်ပါတယ်။ ပရိုတင်းဓာတ်ကြွယ်၀တဲ့အစားအစာတွေမှာ ကြက်ရင်အုံ၊ ငါးအမျိုးမျိုး၊ ဒိန်ချဉ်၊ နွားနို့၊ အစေ့အဆန်ပါတဲ့အသီးအနှံတွေပဲ ဖြစ်ပါတယ်။
၃။ အမျှင်ဓာတ်ကြွယ်၀သော အစားအစာများစားသုံးခြင်း
ကောက်ပဲသီးနှံနဲ့ပြုလုပ်တဲ့အစားအစာတွေနဲ့ အမျှင်ဓာတ်ကြွယ်ဝစွာပါဝင်တဲ့အသီးအနှံတွေ (ဥပမာ-ကန်စွန်းဥ၊ ငှက်ပျောသီး၊ သင်္ဘောသီးတွေကို နေ့စဉ်ပုံမှန်စားသုံးပေးခြင်းဖြင့် အစာချေဖျက်အားကိုလျင်မြန်စေပြီး မလိုလားအပ်တဲ့အဆီတွေစုပုံခြင်းမှကာကွယ်ပေးနိုင်သလို ကိုယ်အလေးချိန်လျှော့ချမှုကို အများကြီးအထောက်အကူပြုနိုင်ပါတယ်။
၄။ ကယ်လိုရီလွန်ကဲစွာပါ၀င်သော အစားအစာများနှင့် ကစီဓာတ်ကိုလျော့ချပါ
ကယ်လိုရီလွန်ကဲစွာပါ၀င်တဲ့ အသင့်စားအစားအစာတွေနဲ့ ပြုပြင်ထုပ်ပိုးထားတဲ့ အစားအစာတွေစားသုံးမှုကို လျှော့ချသင့်တဲ့အပြင် သကြားဓာတ်လွန်ကဲစွာပါ၀င်တဲ့အချိုရည်တွေကို သောက်သုံးခြင်းမှ ရှောင်ကြဉ်သင့်ပါတယ်။ အသင့်စားအာလူးကြော်၊ အဖြူရောင်ပေါင်မုန့်နှင့် အဆီဓာတ်များပြားတဲ့ဆန်တွေမှာ ကစီဓာတ်ပါ၀င်မှု များပြားတာကြောင့် ကိုယ်အလေးချိန်လျှော့ချမှုကို အဟန့်အတားဖြစ်ပေါ်စေပါတယ်။
၅။ စိတ်ဖိစီးမှုကိုလျှော့ချပြီး အိပ်ရေး၀၀အိပ်ပါ
စိတ်ဖိစီးမှုများပြားတဲ့အခြေအနေတွေမှာ ကော်တီဇုန်းဟော်မုန်း(Cortisone Hormone) ထွက်ပေါ်လာပြီး အဆီတည်ဆောက်မှုကို အားပေးပါတယ်။ ဒါကြောင့် ယောဂလေ့ကျင့်ခြင်း၊ သီချင်းနားထောင်ခြင်း၊သစ်ပင်စိုက်ခြင်းစတဲ့ ဝါသနာပါရာအလုပ်တစ်ခုမှာ အချိန်ပေးပြီးလုပ်ဆောင်ခြင်းဖြင့် စိတ်ဖိစီးမှုကို လျှော့ချနိုင်ပါတယ်။အိပ်စက်ချိန်နည်းလွန်းခြင်းဟာ ကိုယ်ရောစိတ်ပါ လေးလံထိုင်းမှိုင်းစေတဲ့အပြင်၊ အစားအစာကို လိုအပ်တာထက် ပိုမိုပြီး စားသောက်မိစေနိုင်ပါတယ်။ ဒါကြောင့် ကိုယ်အလေးချိန်လျှော့ချချင်တဲ့ လူတွေအနေနဲ့ အိပ်ရေး၀၀အိပ်စက်ရန် လွန်စွာအရေးကြီးပါတယ်။
၆။ ရေဓာတ်ဖြည့်ပါ
ကျွန်တော်တို့ကိုယ်ခန္ဓာအတွက် ရေဓာတ်ဟာ မရှိမဖြစ်လိုအပ်တဲ့ အရာတစ်ခုဖြစ်တဲ့အပြင် မလိုလားအပ်တဲ့အဆိပ်အတောက်တွေနဲ့ အဆီပိုတွေကိုလည်း ဖယ်ရှားပေးနိုင်ပါတယ်။ ပုံမှန်ကိုယ်အလေးချိန်ရှိတဲ့ လူတစ်ယောက်အနေနဲ့ တစ်နေ့လျှင် ရေသုံးလီတာမှ ငါးလီတာကြား အနည်းဆုံးသောက်သုံးသင့်ပါတယ်။ ဖြစ်နိုင်လျှင်အစာမစားမှီရေသောက်ပါ။ ဒါမှသာ အစာအလွန်အကျူးစားမိခြင်းမှ ကာကွယ်နိုင်မှာဖြစ်ပါတယ်။
၇။ အစာကို နည်းနည်းနဲ့ အကြိမ်ရေများများစားပါ
ကျွန်တော်တို့မြန်မာတော်တော်များများက တစ်ရက်ကို မနက်၊ နေ့လယ်၊ ညဆိုပီး အစာကို သုံးကြိမ်စားတတ်ပါတယ်။ ဒါပေမဲ့ ကိုယ်အလေးချိန်လျော့ချချင်တဲ့ လူတယောက်အနေနှင့် တစ်နေ့စာစားသောက်မယ့် အစာပမာဏကို တစ်ကြိမ်တည်းနဲ့ အများကြီးမစားဘဲနည်းနည်းနဲ့ အကြိမ်ရေများများခွဲပြီးစားသောက်သင့်ပါတယ်။ ဒါမှသာ အစာအိမ်က အစာကိုကျေညက်စွာ ချေဖျက်နိုင်ပီးတော့ မလိုလားအပ်တဲ့ အဆီတွေကိုလည်း လျှော့ချပေးနိုင်မှာဖြစ်ပါတယ်။
Author: Dr. Kyaw Tun Zan
