ကလေးများတွင် နှာရည်ယိုနှာစေးနှာပိတ်ဖြစ်ခြင်းသည် မကြာခဏ ကြုံတွေ့ရတတ်သော ပြဿနာတစ်ခုဖြစ်ပါသည်။ လေထဲရှိအမှုန်အမွှားများကို ရှူရှိုက်မိသောအခါ နှာခေါင်းထဲရှိ အမွေးနုလေးများမှ ၎င်းတို့ကိုသယ်ယူပေးကာ နှာရည်အဖြစ်ပြောင်းပြီး နှာခေါင်းတွင်းကို သန့်ရှင်ပေးပါသည်။ အများအားဖြင့် ဗိုင်းရပ်စ်နှင့် ဗက်တီးရီးယား ရောဂါပိုးဝင်ရောက်ခြင်း၊ ဓာတ်မတည့်မှုကြောင့် ကာလရှည်ရောင်ရမ်းခြင်းတို့ကြောင့် ကလေးများတွင် နှာစေးနှာပိတ်ဖြစ်ရသည်။ ကလေးများတွင် နှာစေးနှာပိတ်တာရှည်နေလျှင် စိတ်မကြည်ဘဲဂျီကျခြင်း၊ အိပ်မပျော်ခြင်း၊ နို့တိုက်အစာကျွေးရခက်ခဲခြင်း၊ အသက်ရှူမဝခြင်းတို့အထိ ဖြစ်နိုင်ပါသည်။
ရာသီဥတုအပြောင်းအလဲ အအေးမိခြင်း၊ ကလေးနှာခေါင်းနောက်ဘက်ရှိ လေအိတ်အပေါက်များ ပိုးဝင်ရောင်ရမ်းခြင်း Sinusitis၊ နှာခေါင်းအတွင်းရှိ တစ်သျှူးများရောင်ရမ်းခြင်း၊ အာသီးရောင်ခြင်း၊ နှာခေါင်းတွင်းရှိ အသားပို Nasal Polyp တို့ကြောင့်လည်း နာတာရှည်နှာစေးနှာပိတ်ဖြစ်တတ်သည်။ ကလေးနေထိုင်သော အခန်း၏ပတ်ဝန်းကျင် လေထုတွင် စိုစွတ်မှုနည်းပြီး ခြောက်သွေ့ခြင်း၊ ဓာတ်မတည့်ခြင်းဖြစ်စေသည့် ပန်းဝတ်မှုန်၊ ဖုန်မှုန့်များ ရှိခြင်းတို့ကြောင့်လည်း နှာစေးနှာပိတ် တာရှည်တတ်သည်။
နှာစေးနှာပိတ်သောအခါ နှာချေပြီး ကျလာသောနှာရည်သည် အကြည်ရောင်ဖြစ်လျှင် အများအားဖြင့် အအေးမိဖျားနာနှင့် ဓာတ်မတည့်ခြင်းကြောင့်ဖြစ်နိုင်သည်။ ကျလာသောနှာရည်သည် ပျစ်ခဲပြီး အစိမ်းရောင်၊အဝါရောင်ရှိကာ ဖျားနာခြင်း၊ချောင်းဆိုးခြင်းတို့နှင့် အတူတွေ့ရလျှင် အသက်ရှူလမ်းကြောင်းတွင်း ပိုးဝင်ခြင်းဖြစ်နိုင်သည်။
ကလေးအခန်းတွင်းရှိ အိပ်ရာ၊ အခင်း၊ စောင်၊ ခေါင်းအုံး၊ ခြင်ထောင်၊ လေအေးပေးစက်၊ ကစားစရာများ၊ အမွှေးပွရုပ်များ စသည့် အသုံအဆောင်များတွင် ကပ်နေသည့် ဖုန်မှုန့်များ၊ မှိုများသည် အသက်ရှူလမ်းကြောင်းအတွင်းသို့ ဝင်ရောက်ပြီး ဓာတ်မတည့်ခြင်းဖြစ်၍ နှာခေါင်းပိတ်တတ်ပါသည်။ ထို့ကြောင့် ကလေးအခန်းတွင်းကို ဖုန်နှင့်အမှုန်အမွှားများ ကင်းစင်အောင် သန့်ရှင်းရေးပုံမှန်ပြုလုပ်ပေးခြင်း၊ လေအေးပေးစက်ကို ပုံမှန်ဆေးပေးခြင်း၊ လေထုကို ခြောက်သွေ့ခြင်းမရှိဘဲ သန့်စင်စေရန် အစိုဓာတ်ထိန်းလေသန့်စင်စက် Humidifier အသုံးပြုပေးခြင်းတို့ ပြုလုပ်ပေးသင့်သည်။
အိမ်မွေးတိရစ္ဆာန် ခွေး၊ ကြောင်၊ ငှက် အမွေးအမျှင်များ၊ ၎င်းတို့နှင့် ကပ်ပါလာသော ဖုန်နှင့်သဲများ၊ ပိုးမွှားများသည်လည်း ဓာတ်မတည့်မှုကြောင့် တာရှည်နှာပိတ်ခြင်းကို ဖြစ်စေတတ်ပါသည်။ ထို့ကြောင့် အိမ်မွေးတိရစ္ဆာန်များကို ကလေးနှင့်အိပ်ရာပေါ်တွင် အတူသိပ်ခြင်း၊ အတူဆော့ကစားစေခြင်းကို ရှောင်ကြဉ်သင့်ပါသည်။ ကလေး၏ အနီးပတ်ဝန်းကျင်တွင် ဆေးလိပ်ငွေ့၊ မီးခိုးငွေ့များ၊ ခြင်ဆေးငွေ့များ မရှိအောင် အထူးဂရုစိုက်သင့်သည်။
ကလေးများ နှာစေးနှာပိတ်လျှင် ရေဓာတ်လုံလောက်စွာ ဖြည့်တင်းပေးရန် လိုအပ်ပါသည်။ နို့ဝင်အောင်တိုက်ခြင်း၊ ဖြည့်စွက်စာစားသည့်အရွယ်ကလေးဖြစ်လျှင် စွပ်ပြုတ်၊ ကလေးဓာတ်ဆားများတိုက်ခြင်းတို့ ပြုလုပ်ပေးရမည်။ကလေးနှာခေါင်းပိတ် သက်သာစေရန် ဆားရည်သုံးသန့်စင်ပေးခြင်း Saline Nasal Wash၊ Nasal Bulb နှာခေါင်းဆေးကိရိယာဖြင့် နှာခေါင်းဆေးပေးခြင်းတို့ ပြုလုပ်နိုင်ပါသည်။ ရေနွေးငွေ့ရှူပေးခြင်း၊ ရေနွေးဖြင့်ရေချိုးပေးခြင်းဖြင့် နှာပိတ်ခြင်းကို သက်သာစေနိုင်သည်။
ကလေးများတွင် နှစ်ပတ်ထက်ပိုကြာပြီး နှာစေးနှာပိတ် တာရှည်ဖြစ်လျှင် အကြောင်းရင်းရောဂါအခံများကို သိရှိနိုင်ရန် ကလေးအထူးကု၊ နားနှာခေါင်းလည်ချောင်း အထူးကုတို့နှင့် တိုင်ပင်ဆွေးနွေးကုသမှု ခံယူသင့်ပါသည်။ ဓာတ်မတည့်ခြင်းကို ကုသရန် Antihistamine ဟစ်စတမင်းဆန့်ကျင်ပစ္စည်းပါဝင်သော Diphenhydramine ဆေးများ Loratadine Cetirizine၊ Fexofenadine သောက်ဆေးနှင့် နှာခေါင်းတွင်းဖြန်းဆေးများ၊ စတီးရွိုက်ပါဝင်သောနှာခေါင်းတွင်း ဖြန်းဆေးများ၊ ပဋိဇီဝပိုးသတ်ဆေးများကို ဆရာဝန်ညွှန်ကြားမှုဖြင့် အသုံးပြုကုသနိုင်ပါသည်။
Dr. Yee Mon
