အခုဆိုရင် နွေရာသီကနေ မိုးရာသီ အကူးအပြောင်းကာလကို ရောက်ရှိလို့ လာတာနဲ့အတူ ရာသီအကူးအပြောင်းနဲ့ မိုးရာသီမှာ ဖြစ်တတ်တဲ့ တုပ်ကွေးနဲ့ အအေးမိ နှာစေး၊ ခေါင်းကိုက်တာတွေလည်း အဖြစ်များလာတော့မှာပါ။ အအေးမိ၊ တုပ်ကွေးတွေ မဖြစ်စေဖို့အတွက် ကိုယ်ခံအားကောင်းအောင် နေထိုင်စားသောက်သင့်သလို တုပ်ကွေးကာကွယ်ဆေးပါ ထိုးထားနိုင်ရင် ပိုကောင်းပါတယ်။ကာကွယ်ထားရဲ့သားနဲ့ပဲ ဖြစ်ဖြစ်၊ မကာကွယ်ထားလို့ပဲ ဖြစ်ဖြစ် နှာစေး၊ ခေါင်းကိုက်တာလို ရောဂါလက္ခဏာတွေ ခံစားရတဲ့အခါ ဘယ်လိုဆေးမျိုးတွေ သောက်သင့်သလဲ ဆိုတာကိုလည်း သိထားဖို့ လိုပါလိမ့်မယ်။
နှာစေး၊နှာပိတ်တဲ့အခါ…
အအေးမိတာဖြစ်ဖြစ်၊ တုပ်ကွေးကွေးတာဖြစ်ဖြစ် နှာရည်တရွှဲရွှဲနဲ့ နှာချေနေတာ ဒါမှမဟုတ် နှာခေါင်းပိတ်ပြီး အသက်ရှူမဝတာက ဖြစ်လေ့ဖြစ်ထရှိတဲ့ ရောဂါလက္ခဏာ တစ်ခုပါပဲ။ ဒီလိုဖြစ်တာဟာ နှာခေါင်းနဲ့ အနီးတဝိုက်မှာ ရှိတဲ့ sinus လို့ခေါ်တဲ့ အခေါင်းပေါက်လေးတွေ ပိတ်ဆို့တာကြောင့်ပါ။
အခေါင်းပေါက်လေးတွေ ပွင့်သွားပြီး အသက်ရှူရ အဆင်ပြေအောင် decongestant လို့ခေါ်တဲ့ pseudoephedrine သို့မဟုတ် phenylephrine ပါဝင်တဲ့ဆေးကို သုံးလို့ရပါတယ်။ Decongestant ဟာ ဆရာဝန် ညွှန်ကြားချက် မလိုတဲ့ဆေးဖြစ်ပြီး သောက်ဆေးအနေနဲ့ရော နှာခေါင်းဖျန်းဆေး အနေနဲ့ရော လာပါတယ်။ နှာခေါင်းဖျန်းဆေးအနေနဲ့ သုံးတဲ့အခါ ၃ ရက်ထက်ပိုပြီး မသုံးသင့်ပါဘူး။
ဆရာဝန်ညွှန်ကြားချက်မလိုဘူး ဆိုသော်လည်း pseudoephedrine နဲ့ phenylephrine နှစ်မျိုးလုံးဟာ သွေးပေါင်နဲ့ နှလုံးခုန်နှုန်းကို တက်စေတဲ့အတွက် သွေးတိုးနဲ့ နှလုံးရောဂါအခံရှိရင်တော့ ဆရာဝန်နဲ့ ပြသပြီးမှ သုံးစွဲသင့်ပါတယ်။
နှာခေါင်းတွင်းက ယားယံကာ ခဏခဏနှာချေပြီး နှာရည်တွေ တောက်လျှောက်ကျနေရင် antihistamine ပါတဲ့ ဆေးသောက်သင့်ပါတယ်။ Burmeton လို့ လူသိများတဲ့ chlorpheniramine, cetrizine, levocetrine, fexofenadine စသဖြင့် antihistamine အုပ်စုဝင်ဆေး အမျိုးမျိုးရှိပြီး ဆရာဝန်ညွှန်ကြားချက် မလိုဘဲ သောက်လို့ရပါတယ်။ Antihistamine ရဲ့ ဘေးထွက်ဆိုးကျိုးကတော့ လေးလံထိုင်းမှိုင်းပြီး အိပ်ငိုက်တာပဲ ဖြစ်ပါတယ်။
ခေါင်းကိုက်တဲ့အခါ…
ခေါင်းတွေက ကွဲထွက်တော့မလို ကိုက်ခဲနေပြီး တစ်ကိုယ်လုံးလည်း နာကျင်ကိုက်ခဲနေတာက ရာသီဥတုကြောင့် ဖြစ်တဲ့ ခံရခက်တဲ့ ဝေဒနာတစ်ခုပါ။ ခေါင်းတွေ ကိုက်နေရင်၊ အဖျားသွေးရှိနေရင် အလွယ်ကူဆုံး သောက်သင့်တဲ့ဆေးက ပါရာစီတမောလ် ဖြစ်ပါတယ်။ ပါရာစီတမောလ်ဟာ အဖျားကျစေတဲ့ အာနိသင်ရှိသလို အပျော့စားနဲ့ အလယ်အလတ်အဆင့် နာကျင်ကိုက်ခဲမှုတွေကို သက်သာစေနိုင်တဲ့ဆေးပါ။ ရောဂါလက္ခဏာ ပြင်းထန်မှု အပေါ်မူတည်ပြီး တစ်နေ့ကို ၂ ကြိမ်၊ ၃ ကြိမ် သောက်လို့ ရပါတယ်။ ဆေးခဲအနေနဲ့ ရှိသလို ကလေးတွေအတွက် ဆေးရည်ပုံစံနဲ့လည်း လာပါတယ်။
ပါရာစီတမောလ်နဲ့ မသက်သာလောက်အောင် နာကျင်ကိုက်ခဲ့နေရင်တော့ NSAIDs ပါတဲ့ အကိုက်အခဲပျောက်ဆေးတွေ (ibuprofen, aspirin, diclofenac စသည်) သောက်လို့ ရပါတယ်။ NSAIDs ပါတဲ့ဆေးတွေဟာ အစာအိမ်နဲ့ အူနံရံကို ထိခိုက်စေလို့ အစာနဲ့ တွဲသောက်သင့်သလို အစာအိမ်ရောဂါ အခံရှိရင်လည်း သတိထားသင့်ပါတယ်။
ဆေးတွေသောက်တဲ့အပြင် လုံလောက်စွာ အနားယူတာ၊ ရေများများသောက်တာ၊ လတ်ဆတ်တဲ့ သစ်သီးဖျော်ရည်နဲ့ စွပ်ပြုတ်ရည်တွေ သောက်တာ၊ အာဟာရဖြစ်အောင် စားတာတွေ လုပ်တာက အမြန်ဆုံး သက်သာဖို့ အထောက်အကူဖြစ်စေပါတယ်။
Author: Dr.Yee Mon
