အိပ်စက်ခြင်းသည် လူတစ်ယောက်အတွက် မရှိမဖြစ်အရေးပါသော အရာဖြစ်သည်။ အရွယ်ရောက်ပြီးသူတစ်ယောက်တွင် အိပ်စက်ချိန်တစ်နေ့လျှင် အနည်းဆုံး ရှစ်နာရီလိုအပ်ပါသည်။ အိပ်စက်ချိန်နည်းပါးလျှင် ကျန်းမာရေးဆိုးကျိုးများစွာ ရရှိနိုင်ပါသည်။ ထို့ကြောင့် အိပ်စက်ခြင်းကို ထိခိုက်စေနိုင်မည့် နေထိုင်မှုအစားအသောက်ပုံစံများကို ရှောင်ကြဉ်သင့်ပါသည်။
၁။ နွားနို့ပူပူတစ်ခွက်သောက်သုံးပေးခြင်း
နွားနို့ပူပူတစ်ခွက်သည် အိပ်စက်ခြင်းကို ကောင်းမွန်စေပြီး အိပ်မက်ကောင်း မက်စေနိုင်သည်ဟု သုတေသနများအရ သိရသည်။ အဘယ့်ကြောင့်ဆိုသော် နို့နှင့်နို့ထွက်ပစ္စည်းများတွင် ထရိုတိုဖင်ဓာတ်ပါဝင်ပြီး ၎င်းသည် အိပ်စက်ခြင်းကို ကူညီပေးသော ဓာတ်ဖြစ်သည်။ အခွံမာသီးနှင့် အစေ့အဆန်များ၊ ငှက်ပျောသီး၊ ပျားရည်နှင့် ဥအမျိုးမျိုးတွင်လည်း ထရိုတိုဖင်ဓာတ် ကြွယ်ဝစွာ ပါဝင်သည်။
၂။ အိပ်ရာမဝင်ခင် အစားအစာ အနည်းငယ်စားပေးခြင်း
အကယ်၍ အိပ်မပျော်ဝေဒနာ ခံစားနေရသူဖြစ်ပါက အိပ်ရာမဝင်ခင် အစာအိမ်အတွင်းတွင် အစာအနည်းငယ်ရှိလျှင် အိပ်စက်ခြင်းကို အကူအညီပေးနိုင်ပြီး မုန့်အနည်းငယ် စားပေးသင့်ပါသည်။ သို့ရာတွင် အစာအများကြီး စားသုံးခြင်းကိုမူ ရှောင်ကြဉ်သင့်ပြီး အစာအများကြီးစားသုံးပါက အစာမကြေခြင်းကို ဖြစ် ပေါ်စေကာ အိပ်စက်ခြင်းကို ထိခိုက်စေနိုင်ပါသည်။ ထို့ကြောင့် အိပ်ရာမဝင်ခင် အစားအစာ အနည်းငယ်သာ စားသင့်ပါသည်။
၃။ ဘာဂါနှင့် ဆီကြော်စာများ လျှော့စားသုံးခြင်း
အဆီမြင့်မားစွာ ပါဝင်သော အစားအစာများသည် ခန္ဓာကိုယ်အလေးချိန် မြင့်မားစေရုံသာမက အိပ်စက်ခြင်းကိုလည်း ထိခိုက်စေနိုင်ကြောင်း သုတေသနများအရ သိရသည်။ ဆီကြော်စာများ စားသုံးခြင်းသည် အစာမကြေခြင်းကို ဖြစ်ပေါ်စေနိုင်ပြီး အိပ်မပျော်စေနိုင်ပါသည်။ ထို့ကြောင့် အဆီမြင့်မားစွာ ပါဝင်သော အစားအစာများကို လျှော့စားသင့်ပါသည်။
၄။ ကဖင်းဓာတ်ပါဝင်သော အစားအစာများကို ရှောင်ကြဉ်ခြင်း
ညပိုင်းကော်ဖီသောက်သုံးပေးခြင်းသည် အိပ်စက်ခြင်းကို ထိခိုက်စေနိုင်ပါသည်။ ကဖင်းဓာတ်အတော်သင့်ကပင် အိပ်စက်ခြင်းကို အနှောင့်အယှက်ပေး စေနိုင်သည်။ သို့ရာတွင် ကဖင်းဓာတ်အနည်းငယ်ပါဝင်သော ချောကလက်၊ လက်ဖက်ရည်နှင့် ကဖင်းဓာတ်လျော့ချထားသော ကော်ဖီကို သောက်သုံးပေး နိုင်ပါသည်။ ကောင်းမွန်သော အိပ်စက်ခြင်းကို ရရှိစေနိုင်ရန်အတွက် အိပ်ရာမဝင်ခင် လေးနာရီမှခြောက်နာရီအတွင်း ကဖင်းဓာတ်ပါဝင်သည့် အစားအစာများကို ရှောင်ကြဉ်သင့်ပါသည်။
၅။ ကဖင်းဓာတ်ပါဝင်သော ဆေးဝါးအချို့ကို သတိပြုရှောင်ကြဉ်ခြင်း
အကိုက်အခဲပျောက်ဆေး၊ ဝိတ်ချဆေး၊ ဆီးဆေးနှင့် အအေးမိပျောက်ဆေးအချို့တွင် ကဖင်းဓာတ်များ ပါဝင်တတ်သည်။ ထိုဆေးဝါးအချို့တွင် ပါဝင်သော ကဖင်းဓာတ်သည် ကော်ဖီတစ်ခွက်တွင် ပါဝင်သည်ထက် ပိုများနိုင်သည်။ ဆေးဝါးများကြောင့် အိပ်မပျော်ခြင်းဖြစ်ပါက ဆရာဝန်နှင့် ပြသတိုင်ပင်ကာ အကြံဉာဏ်ယူသင့်ပါသည်။
၆။ အရက်သောက်ခြင်းကို ရှောင်ကြဉ်ခြင်း
ညအိပ်ရာဝင်ခါနီး အရက်သောက်ခြင်းသည် အိပ်စက်ရာတွင် ခဏခဏလန့်နိုးခြင်း၊ ခေါင်းကိုက်ခြင်း၊ ချွေးထွက်ခြင်း၊ အိပ်မက်ဆိုးမက်ခြင်းများ ဖြစ်စေနိုင်ပါသည်။ ညနေခင်းအရက်သောက်သုံးပါက အရက်တစ်ခွက်စီတိုင်း ရေ တစ်ဖန်ခွက်ရောပေးပြီး အရက်၏ပြင်းအားကို လျှော့ချပေးသင့်ပါသည်။ ကောင်းမွန် သည့်အိပ်စက်ခြင်း ဖြစ်ပေါ်စေရန် အကောင်းဆုံးနည်းလမ်းမှာ ညအိပ်ရာမဝင်ခင် လေးနာရီမှ ခြောက်နာရီအတွင်း အရက်သောက်သုံးခြင်းကို ရှောင်ကြဉ် သင့်ပါသည်။
၇။ အပူအစပ်နှင့် အစားအစာ အများကြီး စားသုံးခြင်းကို လျှော့ချခြင်း
အစားအစာအများကြီး စားသုံးပြီး လှဲလျောင်းနေခြင်းသည် မသက်မသာဖြစ်စေ၍ အစာချေစနစ်ကို နှေးကွေးစေကာ အိပ်စက်ခြင်းကို ထိခိုက်စေနိုင်ပါသည်။ အပူအစပ်များ စားသုံးခြင်းကဲ့သို့ပင် ရင်ပူစေနိုင်ကာ အိပ်စက်ခြင်းကို အနှောင့်အယှက်ပေးနိုင်ပါသည်။ ထို့ကြောင့် ညအိပ်ရာမဝင်ခင် အနည်းဆုံး လေးနာရီအတွင်း အပူအစပ်နှင့် အစားအစာအများကြီး စားသုံးခြင်းကို ရှောင်ကြဉ်သင့်ပါသည်။
၈။ ပရိုတင်းဓာတ်ကို လျော့စားသုံးခြင်း
ပရိုတင်းဓာတ်သည် အရေးပါသော မရှိမဖြစ် အာဟာရဓာတ်ဖြစ်သော်လည်း ညအိပ်ရာဝင်ခါနီး စားသုံးပေးပါက အိပ်စက်ခြင်းကို ထိခိုက်စေနိုင်ပါသည်။ အဆီမြင့်မားသော အစားအစာများကဲ့သို့ပင် ပရိုတင်းကြွယ်ဝသည့် အစားအစာများစားမည့်အစား နွားနို့ပူပူ တစ်ခွက်သောက်သုံးပေးပါက အိပ်စက်ခြင်းကို ကောင်းမွန်စေနိုင်ပါသည်။
၉။ ညအိပ်ရာဝင်ခါနီး ရေသောက်သုံးခြင်းကို လျှော့ချခြင်း
ရေသည် ခန္ဓာကိုယ်အတွက် မရှိမဖြစ် အရေးပါလှပါသည်။ ရေဓာတ်ဆုံးရှုံးလျှင် ကျန်းမာရေး ဆိုးကျိုးများစွာ ဖြစ်စေနိုင်ပါသည်။ သို့ရာတွင် ညအိပ်ရာဝင်ချိန် ရေသောက်ပါက ဆီးခဏခဏ သွားစေပြီး အိပ်စက်ခြင်းကို အနှောင့်အယှက် ဖြစ်စေပါသည်။ ထို့ကြောင့် ညအိပ်ရာဝင်ခါနီး ရေအများကြီး သောက်သုံးခြင်းကို လျှော့ချသင့်ပါသည်။
၁၀။ ဆေးလိပ်သောက်ခြင်းကို ရှောင်ကြဉ်ခြင်း
နီကိုတင်းဓာတ်သည် ကဖင်းဓာတ်ကဲ့သို့ပင် လှုံ့ဆော်မှုကို ပေးစွမ်းနိုင်သော ဓာတ်ဖြစ်ပါသည်။ အိပ်ရာဝင်ချိန်တွင် ဆေးလိပ်သောက်ခြင်းနှင့် တရေးနိုးချိန်၌ ဆေးလိပ်သောက်ခြင်းသည် အိပ်စက်ခြင်းကို ထိခိုက်စေနိုင်သောကြောင့် ရှောင်ကြဉ်ပေးသင့်ပါသည်။
Author: ဒေါက်တာဖြူစင်, Healthcare Journal
