ငှက်ပျောသီးအကြောင်း
ငှက်ပျောသီးကို အင်္ဂလိပ်လို Banana လို့ခေါ်ပါတယ်။ မြန်မာနိုင်ငံသား အကုန်နီးပါး ငှက်ပျောသီးကိုစားဖူးကြ ကြိုက်နှစ်သက်ကြလိမ့်မယ်လို့ ထင်ပါတယ်။ ရှေးယခင်ကတည်းက ခုထိ ကျွန်တော်တို့ မြန်မာတွေဟာ နတ်တို့ ဘိုးတော်တို့ကို ဆက်သတဲ့ ကန်တော့ပွဲမှာဖြစ်ဖြစ် လမ်းတံတားဆောက်တဲ့အခါ သို့မဟုတ် သစ်ကြီးပင်ကြီးတွေကို ခုတ်တဲ့အခါ လုပ်တဲ့ ပူဇော်ပွဲတွေမှာဖြစ်ဖြစ် အုန်းသီးနဲ့ငှက်ပျောသီးကို မပါမဖြစ် ထည့်လေ့ရှိပါတယ်။ ဒါကြောင့် ကန်တော့ပွဲဆိုတာနဲ့ အုန်းပွဲငှက်ပျောပွဲကို မျက်စိထဲတန်း မြင်ကြပါတယ်။
နတ်တို့ဘိုးတော်တို့ကို ဆက်တဲ့ကန်တော့ပွဲမှာ အုန်းသီးနဲ့ ငှက်ပျောသီး ထည့်ကပ်တာနဲ့ ပတ်သက်ပြီး မေးကြည့်တဲ့အခါမှာ အုန်းခနဲ အမြင့်ကနေကျတဲ့ အခါမျိုးမှာ (စီးပွားကျတဲ့ အခါမျိုးမှာ) အကျမနာအောင် ငါ့အတွက် နတ်တွေကို ဘိုးတော်တွေကို ပြောပေးပါဆိုတဲ့ အဓိပ္ပာယ်နဲ့ အုန်းသီးနဲ့ငှက်ပျောသီးကို ကန်တော့ပွဲတွေမှာ မပါမဖြစ် ထည့်တာလို့တော့ အထက်ဂိုဏ်း ဆရာကြီးတစ်ယောက်က ပြန်ပြောတာ ကြားဖူးပါတယ်။
ငှက်ပျောသီးမှာ အမျိုးအစား အများကြီးရှိပါတယ်။ အစားများပြီး လူတိုင်းသိကြတာကတော့ ဖီးကြမ်းနဲ့ သီးမွှေးပါ။ ဖီးကြမ်းနဲ့ သီးမွှေးက အလွယ်တကူလည်း ဝယ်လို့ရသလို ဈေးကလည်း လူတန်းစားမရွေး လက်လှမ်းမီပါတယ်။ ဒီနှစ်မျိုးအပြင် ရခိုင်ငှက်ပျော၊ ရွှေငှက်ပျော (ရွှေနီ)၊ သူငယ်စာ၊ နံသာပု၊ဆင်အံ၊ မယားမန် စသဖြင့်လည်း အများကြီး ရှိပါသေးတယ်။
ငှက်ပျောသီး တစ်လုံးမှာ ပါတဲ့ အာဟာရဓါတ်တွေကတော့ အောက်ပါအတိုင်း ဖြစ်ပါတယ်။
– Carbohydrates (ကစီဓါတ်) 22.84 g
– Sugars (သကြားဓါတ်) 12.23 g
– Dietary fiber (အမျှင်ဓါတ်) 2.6 g
– Fat (အဆီဓါတ်) 0.33 g
– Protein (ပရိုတင်းဓါတ်) 1.09 g
– Thiamine (B1) (3%) 0.031 mg
– Riboflavin (B2) (6%) 0.073 mg
– Niacin (B3) (4%) 0.665 mg
– Pantothenic acid (B5) (7%) 0.334 mg
– Vitamin B6 (31%) 0.4mg
– Folate (B9) (5%) 20 μg
– Choline (2%) 9.8 mg
– Vitamin C (10%) 8.7 mg
– Minerals Iron (2%) 0.26 mg
– Magnesium (8%) 27 mg
– Manganese (13%) 0.27 mg
– Phosphorus (3%) 22 mg
– Potassium (8%) 358mg
– Sodium (0%) 1 mg
– Zinc (2%) 0.15 mg
– ရေဓါတ် 75mg ( >70%)
ရေဓါတ်များတဲ့အတွက် အသားအရေ စိုပြည်မှုနဲ့ ဆံကေသာအတွက် အထောက်အကူ ပြုပါတယ်။ အမျှင်ဓါတ်လည်း ကြွယ်ဝစွာ ပါဝင်သောကြောင့် ဝမ်းချုပ်ခြင်းကိုမဖြစ်စေဘဲ ဝမ်းမှန်စေကာ အူမကြီးကင်ဆာဖြစ်နိုင်ခြေကို လျော့နည်းစေပါတယ်။ ဒါ့အပြင် အစာအိမ်နဲ့ အူလမ်းကြောင်းမှာရှိတဲ့ အချွဲမြှေးလွှာပျက်စီးမှုကို ကာကွယ်ပေးတဲ့အတွက် အစာအိမ်နာတာ ရောင်တာတွေကိုလည်း သက်သာစေပါတယ်။
ငှက်ပျောသီးမှာ ပိုတက်ဆီယံဓါတ် ကြွယ်ဝစွာ ပါတဲ့အတွက် အရက်ရေရှည်သောက်လာသူတွေမှာ ဖြစ်တဲ့ အောက်ပိုင်းတွေ အားနည်းပြီး မလှုပ်ချင် မကိုင်ချင်ဖြစ်တာတွေ၊ အရက်နာကျတာတွေ အတွက်လည်း အသုံးတည့်ပါတယ်။ အရက်သောက်တဲ့သူတွေဆို ငှက်ပျောသီး စားပေးသင့်ပါတယ်။
သို့သော် တစ်ခုရှိတာက ပိုတက်ဆီယံဓါတ် ကြွယ်ဝစွာပါသောကြောင့် ကျောက်ကပ်မကောင်းတဲ့သူတွေဆို မစားသင့်ပါဘူး။ ပုံမှန်လူတွေမှာ ပိုတက်ဆီယံဓါတ် သွေးထဲမှာများလာရင် ဆီးကနေတဆင့် စွန့်ထုတ်နိုင်ပေမယ့် ကျောက်ကပ်မကောင်းတဲ့လူတွေမှာ မစွန့်ထုတ်နိုင်လို့ပါ။
ငှက်ပျောသီးမှာပါတဲ့ ဗီတာမင်စီဓါတ်ကလည်း ကိုယ်ခံအားကို ကောင်းစေကာ ရောဂါပိုးတွေ ဝင်ရောက်ခြင်းမှ ကာကွယ်ပေးပါတယ်။ ငှက်ပျောသီးကို အမျိုးမျိုး လုပ်စားကြပါတယ်။ အမှည့်ကို ဒီအတိုင်းစားသလို၊ ကြော်စားတာ၊ အခြောက်လှမ်းပြီး ငှက်ပျောခြောက်ကြော် လုပ်စားတာ၊ ဖျော်ရည်လုပ်သောက်တာ စသဖြင့်လည်း ရှိပါတယ်။
အဆုံးသတ်အနေနဲ့ကတော့ ငှက်ပျောသီးဟာ လွယ်လင့်တကူ ရရှိနိုင်တဲ့ အသီးဖြစ်တဲ့အပြင် ဈေးလည်းမကြီးဘဲ လက်လှမ်းမီကာ အာဟာရဓါတ် ကြွယ်ဝစွာပါဝင်တာကြောင့် တစ်နေ့တစ်လုံး ပုံမှန်စားသင့်ပါတယ်။ ဘယ်အချိန်စားစား ရပါတယ်။ သို့သော် မနက်သင်္ဘော ၊ ညငှက်ပျော ဆိုပြီးတော့စကားပုံရှိတဲ့အတွက် ရှေးထုံးမပယ်ချင်တဲ့သူများဆိုရင်တော့ ညဘက်စားပါလို့ အကြံပြုလိုက်ရပါတယ်။
Author: Dr. 528
