သင့်အိပ်ခန်းနဲ့ သင့်ကျန်းမာရေး
အိပ်ချိန်လုံလောက်စွာရပြီး ကောင်းမွန်နှစ်ခြိုက်စွာ အိပ်ပျော်ခြင်းဟာ သင့်ရဲ့စိတ်ကိုရော ခန္ဓာကိုယ်ကိုပါ ကျန်းမာဖို့ အထောက်အကူ ပေးပါတယ်။ ကောင်းစွာအိပ်စက်အနားယူခြင်းက အဝလွန်ခြင်းနဲ့ နာတာရှည်ရောဂါတွေ ဖြစ်ပွားနိုင်ခြေကို လျှော့ချပေးပါတယ်။
အိပ်ရေးမဝပါက မျက်ကွင်းညိုတာ၊ အစားသောက်ပျက်တာတွေ ဖြစ်နိုင်ပါတယ်။ ရေရှည်အိပ်ရေးပျက်ပါက ဦးနှောက်ရဲ့ ဆောင်ရွက်မှုတွေ ကမောက်ကမဖြစ်ပြီး စိတ်ဓါတ်ကျတာ၊ အာရုံစူးစိုက်လို့ မရတာတွေအထိ ဖြစ်နိုင်ပါတယ်။
ကောင်းမွန်နှစ်ခြိုက်စွာ အိပ်ပျော်နိုင်ဖို့အတွက် အိပ်တဲ့နေရာ (အိပ်ခန်း) ကလည်း ကျန်းမာရေးနဲ့ညီညွတ်ပြီး သက်တောင့်သက်သာရှိဖို့ လိုပါတယ်။ ဒါကြောင့် နှစ်ခြိုက်စွာ အိပ်ပျော်ဖို့ ကျန်းမာရေးနဲ့ညီညွတ်ဖို့ အတွက် မိမိအိပ်ရာ အိပ်ခန်းနဲ့ ပတ်သက်ပြီး ဘယ်အချက်တွေ လုပ်ဆောင်ရမလဲ ဆိုတာကို သိသလောက် တင်ပြလိုက်ရပါတယ်။
(၁) ခေါင်းအုံးနဲ့ ခေါင်းအုံးစွပ်
သင့်ခေါင်းအုံးက သင့်ခေါင်းကို မတင်ဖို့ရာအတွက် မစွမ်းလောက်အောင် ပြားနေပြီ သို့မဟုတ် နှစ်ခေါက်ခေါက်လိုက်လို့ သူ့အလိုလို ပြန်မဆန့်တော့ဘူးဆိုရင် ဒါခေါင်းအုံးသက်တမ်း ကုန်ပြီလို့ အကြမ်းအားဖြင့် ပြောနိုင်ပါတယ်။
ခေါင်းအုံးကို ဖြစ်နိုင်လျှင် တစ်နှစ်တစ်ကြိမ် အသစ်လဲသင့်ပါတယ်။ အခက်အခဲရှိရင်လည်း အနည်းဆုံး နှစ်နှစ်တစ်ကြိမ်ကတော့ လဲသင့်ပါတယ်။ ညအိပ်ချိန်တွင် လူ့ခန္ဓာကိုယ်အတွင်းမှ စွန့်ထုတ်သော ညစ်ညမ်းသည့် အခိုးအငွေ့၊ အာပုတ်ရည်များ၊ ခေါင်းအရေပြားမှ ချွေးများသည် ခေါင်းအုံးအတွင်းပိုင်းသို့ စိမ့်ဝင်သွားတတ်သည်။ ဦးခေါင်းမှ စိမ့်ထွက်သော ချွေးစေးနှင့် အဆီများသည်လည်း ခေါင်းအုံးကို ညစ်ညမ်းစေနိုင်သည်။
ဒါကြောင့် ခေါင်းအုံးကို သန့်စင်အောင် ခေါင်းအုံးစွပ်၊ ခေါင်းအုံးဖုံးပဝါ ဖုံးအုပ်ထားရမည်။ ဒါ့အပြင် ခေါင်းအုံးစွပ်၊ ခေါင်းအုံးဖုံးပဝါတွေကို မကြာခဏ လျှော်ဖွပ်ပေးပြီး နေပူလှမ်းတာ မီးပူတိုက်တာတွေလုပ်ပေးသင့်တယ်။
(၂) အခန်းထဲကို အလင်းရောင်ဝင်ရောက်မှု တအားမများပါစေနဲ့။
အိပ်ခန်းမျက်နှာကျက်မှာ မီးအလင်းရောင် တောက်တောက်တွေ ထွန်းထားတာမျိုးမလုပ်ပါနဲ့။ အလင်းရောင်မှိန်မှိန်လေးပဲ ထွန်းထားခြင်းဖြင့် မယ်လ်တိုနင် ဟော်မုန်းထုတ်လုပ်မှုကို အားပေးစေပြီး အလွယ်တကူ အိပ်ပျော်စေနိုင်ဖို့ အထောက်အကူ ပေးပါတယ်။ ဒါကြောင့် အိပ်ခန်းထဲမှာ အလင်းသိပ်မစူးတဲ့ မီးခပ်မှိန်မှိန်လေးတွေသာ တပ်ထားသင့်ပါတယ်။
(၃) မွေ့ရာနဲ့ အိပ်ရာခင်း
သင့်မွေ့ရာဟာ ပြားကပ်နေပြီး အထဲက ဂွမ်းတွေ တွန့်လိပ်နေပြီဆိုရင် သို့မဟုတ် မနက်အိပ်ရာထလာတဲ့အခါမှာ သက်တောင့်သက်တာမရှိဘဲ ကျောတွေ ခါးတွေနာနေတယ်ဆိုရင် မွေ့ရာကို အသစ်လဲလှယ်ပေးသင့်ပါတယ်။ အိပ်ရာခင်းကိုလည်း တစ်ပတ်တစ်ခါလျှော်ဖွတ်တာ နေပူလှန်းတာ လုပ်ပေးရပါမယ်။
(၄) အခန်းအပူချိန်နဲ့ လေဝင်လေထွက်
အိပ်တဲ့နေရာ၊ အိပ်ခန်းက အခန်းအပူချိန်မျှတဖို့နဲ့ လေဝင်လေထွက်ကောင်းဖို့ အရေးကြီးပါတယ်။ အိပ်ခန်းအပူချိန်ဟာ ၁၈ ဒီဂရီစင်တီဂရိတ် ကနေ ၂၂ ဒီဂရီစင်တီဂရိတ် အတွင်းရှိသင့်ပါတယ်။ အိပ်ခန်းဟာ လေဝင်လေထွက် ကောင်းစွာရှိသင့်ပါတယ်။ လေဝင်လေထွက်မကောင်းပါက နှစ်ခြိုက်စွာအိပ်မပျော်နိုင်တဲ့အပြင် အသက်ရှူလမ်းကြောင်းနဲ့ ဆိုင်တဲ့ရောဂါတွေ ဖြစ်နိုင်လို့ပါ။
(၅) အိပ်ခန်းထဲမှာ ဖြစ်နိုင်ရင် ဖုန်း၊ ကွန်ပျူတာ၊ တီဗွီတွေ မထားပါနဲ့။ အိပ်ခါနီး ဖုန်း၊ တီဗွီ ၊ ကွန်ပျူတာမကြည့်ပါနဲ့
ဖုန်း၊ တီဗွီ၊ ကွန်ပျူတာတွေက ထွက်တဲ့ အပြာရောင် အလင်းတန်းတွေဟာ အိပ်စက်ခြင်းကို အားပေးတဲ့ မယ်လ်တိုနင်ပမာဏကို လျော့နည်းစေပါတယ်။
အဆုံးသတ်အနေနဲ့ ပြောချင်တာကတော့ နှစ်ခြိုက်စွာ အိပ်ပျော်ခြင်းဟာ သင့်ကို တစ်နေ့တာ တက်ကြွစွာလှုပ်ရှားနိုင်ဖို့ စွမ်းအင်တွေပေးနိုင်ပါတယ်။ သင့်အိပ်ခန်းလေးကို ဖြစ်နိုင်ရင် အရောင်ဖျော့လေးတွေနဲ့သာ အလှဆင်ပါ။ အဝါနု၊ အပြာနုစတဲ့ အရောင်ဖျော့လေးတွေက သင့်ကို စိတ်အေးချမ်းစေရုံသာမက မျက်စိကိုပါ အေးစေပါတယ်။
Author : Dr. 528
