ဇူလိုင်လဆန်းပိုင်းတွင် ဟန်လေး စဖျားသည်။
ကိုဗစ်တတိယလှိုင်း ပြင်းထန်နေသည့်ကာလဖြစ်သည့်အတွက် Positive ဖြစ်နေပြီဟုသိလိုက်ရသည်နှင့်
ဟန်လေး သူ့ကိုယ်သူ စိုးရိမ်မိသည်။
“ဖြစ်ဖြစ်ချင်းတုန်းက အရမ်းလည်း ကြောက်တယ်။ မိသားစုရဲ့အဝေးမှာ
တစ်ယောက်တည်း နေတာဆိုတော့ အားလည်း ငယ်တယ်။ စိုးရိမ်စိတ်တွေလဲ ဖိစီးတာပေါ့။”
ဖျားပြီး နှစ်ရက်လောက်အကြာတွင် သူအနံ့စပျောက်သည်။
ပိုဆိုးသည်က နောက်ရက်များတွင် အရသာပါပျောက်သွားသည်။
ဘာစားစား ဘာအရသာမှမရှိသည့်အတွက် စားရသောက်ရ အဆင်မပြေဖြစ်လာသည်။
“အရသာရချင်ဇောနဲ့ အငန်တွေဘာတွေစားလည်း ငန်လို့ငန်မှန်းမသိဘူး။”
လူငယ်တစ်ဦးဖြစ်သော်လည်း အသက်အရွယ်မရွေးနေ့မြင်ညပျောက်ဖြစ်နေသည့်အချိန်တွင်
ဗိုင်းရပ်စ်ကူးစက်ခံရသူတိုင်းအတွက်က စိုးရိမ်စရာဖြစ်သည်။ ရောဂါက ဘယ်အချိန်တွင်
ဘယ်လောက်ထိ တိုက်ခိုက်မှု ပြင်းထန်လာမလဲ ဘယ်သူမှမသိနိုင်ဘူးမဟုတ်ပါလား။
ထို့အတွက်ကြောင့် ဟန်လေး ကိုယ့်ကိုယ်ကိုယ် အထူးဂရုစိုက်သည်။
ဆေးရုံဆေးခန်းသွားဖို့ခက်ခဲသော်လည်း ဆရာဝန်နှင့် အွန်လိုင်းကပြသည်။
လိုအပ်သည့်ဆေးများကို ဆရာဝန်ညွှန်ကြားချက်အတိုင်းသောက်သည်။ “ကြောက်နေရုံနဲ့ မပြီးဘူးလေ။
အသက်ဆက်ရှင်ဖို့ ကိုယ်တိုင်လုပ်မှ ရမယ်ဆိုတဲ့ စိတ်နဲ့ အားတင်းနေရပါတယ်။
ဆရာဝန်နဲ့ သေချာတိုင်ပင်ပြီး ညွှန်ကြားတဲ့ ဆေးတွေ သောက်တယ်။
အားရှိအောင် အစားတွေ စားတယ်။ ညကို ပုံမှန်အိပ်တယ်။
အောက်စီဂျင် နဲ့ သွေးပေါင်ချိန် ပုံမှန်တိုင်းတယ်။”
ဟု အသက် ၂၈ နှစ်အရွယ်ရှိ မော်ဒယ် ဟန်လေးက ပြောသည်။
ကိုယ်ခံအားကောင်းမှ တွန်းလှန်နိုင်မည်ဖြစ်သဖြင့် အားရှိအောင်
အစားအသောက်ကို မဝင်ဝင်အောင်စားသည်။ အသက်ရှုလေ့ကျင့်ခန်းကို ပုံမှန်လုပ်သည်။
“အနံ့အရသာမရတော့တဲ့ အချိန်မှာဆို ဝမ်းနည်းလွန်းလို့ တစ်ယောက်တည်း
ငိုရင်းနဲ့ ကြိတ်မှိတ်ပြီး မရမက စားတယ်။”
၁၁ ရက်ကြာအနံ့ပျောက်ပြီးချိန်တွင် ဟန်လေး သက်သာလာသည်။
စားသောက်ရ ပိုအဆင်ပြေလာသလို လူလည်း ပိုလန်းဆန်းလာသည်။
သူ့အနေဖြင့် အသက်ရှူလေ့ကျင့်ခန်းကို များများလုပ်ဖြစ်သလို ယောဂတွေဆော့တာ၊
မနက်နေပူစာလှုံတာတွေ ဂရုတစိုက်လုပ်တာကလည်း အကျိုးရှိကြောင်း ယုံကြည်သည်။
ကိုဗစ်ရောဂါနှင့်ရင်ဆိုင်ကြုံတွေ့ရပါက ဘယ်လိုကျော်ဖြတ်မလဲဆိုသည်နှင့်ပတ်သက်ပြီး
ဟန်လေးက ယခုလို ဝေမျှသည်။
“အဓိကကတော့ စိတ်ပိုင်းနဲ့ပဲဆိုင်တယ်။
ဒီကာလကတော့ ဝင်ငွေကအစ။ ရောဂါဖြစ်တယ်ဆိုတာက
ပိုက်ဆံရှိမှ ကုနိုင်တဲ့သူတွေရှိသလို မကုနိုင်တဲ့သူတွေလည်းရှိတယ်။
ဆုံးသွားတဲ့သူတွေလည်းရှိတယ်။
ကောင်းကောင်းမွန်မွန်ဖြတ်သန်းပါ။
စိတ်ကိုခိုင်ခိုင်ထားရင် အဆင်ပြေမှာပါ။
အားလျှော့ဖို့မလိုဘူး။
အားလုံးအဆင်ပြေသွားမှာပါ။”
စိတ်ဓာတ်ခိုင်မာဖို့အရေးကြီးကြောင်းအပြင်
ဆရာဝန်နှင့် နည်းမှန်လမ်းမှန်ကုသဖို့လည်း သူက အကြံပြုလိုက်သေးသည်။
“ဆေးတွေကို ဆရာဝန်နဲ့ သေချာတိုင်ပင်ပြီး သောက်ပါ။
မလိုအပ်ပဲ တခြားဆေးတွေ သောက်မိရင် နောက်ဆက်တွဲဆိုးကျိုးတွေ ရနိုင်ပါတယ်။
အားရှိမယ့်အစာတွေ စားပါ။
တကယ်လို့ အနံ့ အရသာမရတော့ရင်လည်း အစားဝင်မှ
ငါအသက်ရှင်မှာဆိုတဲ့ စိတ်ကို မွေးပါ။
အမြဲထိုင်စိတ်ညစ်နေမယ့်အစား သူငယ်ချင်းတွေနဲ့ စကားပြောပါ။”
OnDoctor Team
(ယခုဆောင်းပါးသည် ကာယကံရှင်၏အတွေ့အကြုံဖြစ်ရပ်မှန်ကို မေးမြန်းပြီးတင်ပြထားခြင်းဖြစ်ပြီး ဆောင်းပါးပါ ဓာတ်ပုံများသည် ကာယကံရှင်၏ခွင့်ပြုချက်ဖြင့် ဖော်ပြထားခြင်းဖြစ်ပါသည်။ ဆောင်းပါးတွင်ဖော်ပြပါရှိသည့် ဆေးဝါးနှင့် ကုသမှုနည်းလမ်းများသည် ကာယကံရှင်၏အတွေ့အကြုံသာဖြစ်၍ စာဖတ်သူများအနေဖြင့် ဆေးဝါးနှင့်ကုသမှုများလိုအပ်ပါက ဆရာဝန်နှင့်တိုင်ပင်ဆွေးနွေးရန် တိုက်တွန်းအပ်ပါသည်။)
