fbpx

Download OnDoctor App on Google Play

Myanmar (Covid-19 Stats)

😷 6,151 Total Cases
😥 98 Deaths
😇 1,445 Recovered

အကောင်းဆုံး အကိုက်အခဲပျောက်ဆေးဆိုတာ

အကောင်းဆုံး အကိုက်အခဲပျောက်ဆေးဆိုတာ

Journal of Neuroscience မှာ ဖော်ပြပါရှိတဲ့ သုတေသနအသစ်တစ်ခုက ခုလို ဆိုပါတယ်။ အိပ်ရေးပျက်ခြင်းဟာ နာကျင်ကိုက်ခဲမှုဝေဒနာကို ပိုမိုဆိုးရွားစေပါသတဲ့။ ဒါဟာ အိပ်ရေးပျက်တဲ့အခါမှာ နာကျင်မှုကို သက်သာအောင် တုန့်ပြန်ပေးတဲ့ ဦးနှောက်ရဲ့စနစ်က ထုံထိုင်းသွားလို့လို့ဆိုပါတယ်။ အိပ်ရေးပျက်ခြင်းကြောင့် ဦးနှောက်ပေါ် သက်ရောက်မှု များစွာရှိပါတယ်။ အများစုသိထားတဲ့ သင်ယူလေ့လာနိုင်စွမ်းကျဆင်းတာ ၊ မှတ်ဉာဏ်ထိခိုက်တာတွေအပြင် အခုနောက်ဆုံးတွေ့ရှိချက်ကတော့ နာကျင်မှုကိုပိုပြီးခံစားရတစေတယ်ဆိုတာပါပဲ။

USA မှာဆိုရင် လူဦးရေရဲ့ ၂၀ % လောက်ဟာ ကာလကြာရှည် နာကျဉ်ကိုက်ခဲမှုကို ခံစားနေရသူများဖြစ်တယ်လို့ ဆိုပါတယ်။ ဒီနာကျင်မှုတွေ သက်သာစေမဲ့ မူးယစ်စေတတ်တဲ့ဆေးတွေအသုံးလွန်ပြီး သေဆုံးနေရတာက တနေ့ကို အယောက် ၁၃၀ နီးပါးလောက် ရှိပါသတဲ့။

ဒီသုတေသနကို ကာလီဖိုးနီးယားတက္ကသိုလ် အာရုံကြောသိပ္ဗံ ပရော်ဖက်ဆာတစ်ဦးဖြစ်တဲ့ Matthew Walker နဲ့ Doctorate ကျောင်းသားတဦးဖြစ်သူ Adam Krause တို့က ပြုလုပ်ခဲ့တာပဲဖြစ်ပါတယ်။ ဒီစမ်းသပ်မှုမှာ ငယ်ရွယ်ပြီး ကျန်းမာတဲ့သူ ၂၄ ဦး ပါဝင်စမ်းသပ်ခံခဲ့ပါတယ်။ သူတို့ရဲ့ ခြေထောက်တွေကို အပူပေးကာ နာကျင်မှုဖြစ်ပေါ်အောင် ပြုလုပ်တာဖြစ်ပြီး ဒီအချိန်မှာ နာကျင်မှုနဲ့သက်ဆိုင်တဲ့ ဦးနှောက်လှိုင်းတွေအပြောင်းအလဲကို လေ့လာကြပါတယ်။

လေ့လာမှုအစပိုင်းမှာတော့ တစ်ဦးတစ်ယောက်မှ အိပ်စက်ခြင်းဆိုင်ရာ ပြဿနာဖြစ်ဖြစ် နာကျင်မှုဆိုင်ရာ ပြဿနာဖြစ်ဖြစ် မရှိခဲ့ကြပါဘူး။ ပထမဦးစွာ အိပ်ရေးဝဝ အိပ်စက်ထားပြီး နောက်တစ်ရက်မှာ တစ်ယောက်ချင်းစီရဲ့ နာကျင်မှုခံနိုင်စွမ်း (Pain Threshold) ကို မှတ်တမ်းယူပါတယ်။ အရေပြားကို ထိနေတဲ့ အပူပမာဏကို နည်းနည်းချင်းစီ တင်သွားရင်းနဲ့ပေါ့။ နာကျင်မှုခံနိုင်စွမ်းကို တွက်ယူလို့ရသွားပြီးတာနဲ့ ဒီပုံစံအတိုင်း နောက်တစ်ရက် ထပ်စမ်းပါတယ်။ ဒါပေမဲ့ ဒီတစ်ခါမှာတော့ မစမ်းခင် တစ်ညလုံး ပေးမအိပ်ထားပါဘူး။ ဒီအခါမှာ အစဦးက ခံနိုင်ရည်ရှိတဲ့ အပူပမာဏခပ်ပျော့ပျော့ကိုတောင်မှ ခံနိုင်ရည် မရှိတော့တာ တွေ့ရပါတယ်။ ဒါဟာ အိပ်ရေးဝဝ မအိပ်စက်ထားခဲ့ရင် နာကျင်မှုကို ခံစားရနိုင်စွမ်း ပိုမိုမြင့်မားလာတာကို ပြသနေပါတယ်။

ဒဏ်ရာပမာဏက အတူတူ ဖြစ်ပေမဲ့ အိပ်ရေးမဝတဲ့အခါ ဦးနှောက်ရဲ့ တုန့်ပြန်မှုက မတူတာကို တွေ့မြင်နိုင်ပါတယ်။ ဦးနှောက်ရဲ့ နာကျင်တာကို သိနိုင်တဲ့အစိတ်အပိုင်းဖြစ်တဲ့ somatosensory cortex ဟာ အိပ်ရေးပျက်ထားရင် ပိုပြီးတော့ အလုပ်လုပ်လာတယ်လို့ သုတေသီတွေက တွေ့ရှိခဲ့ပါတယ်။ ဒါကြောင့် အိပ်ရေးပျက်ခြင်းဟာ နာကျင်မှုကိုသိရှိဆောင်ရွက်တဲ့ ဦးနှောက်ရဲ့လုပ်ငန်းဆောင်တာတွေကို ထိခိုက်စေတယ်လို့ ကောက်ချက်ချနိုင်ပါတယ်။

နောက်ထပ်တွေ့ရှိတဲ့ အံ့သြဖွယ်ရာတချက်က အိပ်ရေးပျက်ပြီးတဲ့နောက်တရက်မှာ ဦးနှောက်ထဲက nucleus accumbens ဆိုတဲ့ အစိတ်အပိုင်းဟာ ပုံမှန်ထက် လုပ်ဆောင်မှုနှေးကွေးသွားတယ်ဆိုတာပါပဲ။ဒီအစိတ်အပိုင်းကနေ Dopamine ဆိုတဲ့ Neurotransmitter တစ်ခုထုတ်ပေးပါတယ်။ အဆိုပါ Dopamine က နာကျင်မှုတွေကို သက်သာစေပြီး နေလို့ထိုင်လို့ ကောင်းစေပါတယ်။

ဒါကြောင့် Prof.Walker က ‘’အိပ်ရေးပျက်ခြင်းဟာ နာကျင်မှုတွေကို ပိုမိုခံစားတတ်စေယုံသာမက သဘာဝအတိုင်းနာကျင်မှုသက်သာအောင်လုပ်ပေးတဲ့စနစ်ကိုပါ ပိတ်ဆို့သွားစေတယ်လို့ “ ပြောခဲ့ပါတယ်။

နောက်ဆုံးထပ်တွေ့ရတာကတော့ Insula လို့ ခေါ်တဲ့ ဦးနှောက်ရဲ့အစိတ်အပိုင်းတစ်ခုအကြောင်းပါ။ ဒီအစိတ်အပိုင်းကနေ နာကျင်မှုသင်္ကေတတွေကို ဖတ်ပေးပြီး ခန္ဓာကိုယ်ကနေ အကောင်းဆုံးတုန့်ပြန်နိုင်အောင် ပြင်ဆင်ပေးပါတယ်။ ဒါပေမယ့် အိပ်ရေးပျက်ထားရင်တော့ အဆိုပါ Insula ဟာလည်း အလုပ်ပုံမှန် မလုပ်ပါဘူးတဲ့။

Krause ရဲ့ အပြောအရ ဒီ Insula ဟာ နာကျင်မှုတွေကို အမျိုးအစားခွဲခြားပေးပြီး အကိုက်အခဲသက်သာစေမယ့် ကိုယ်တွင်းပစ္စည်းတွေကို နာကျင်မှုဖြစ်ရာနေရာကို ပို့ပေးတဲ့ အရေးကြီးနေရာတစ်ခုဖြစ်တယ်လို့ သိရပါတယ်။ သူတို့ရဲ့ တွေ့ရှိချက်တွေပိုမိုခိုင်မာစေဖို့ Amazon ရဲ့ ဝန်ထမ်း ၂၃၀ ကျော်နဲ့ ထပ်မံစမ်းသပ်ခဲ့ပါတယ်။ ပါဝင်သူတွေဟာ သူတို့ရဲ့ အိပ်စက်မှုပုံစံတွေနဲ့ နာကျင်မှုကိုခံစားရပုံတွေကို ပုံမှန်သတင်းပို့ပေးကြပါတယ်။ ဒီအခါမှာ အိပ်စက်တဲ့ပုံစံ နဲနဲလေးအပြောင်းအလဲဖြစ်တာတောင်မှ နာကျင်မှုကိုခံစားရတဲ့ပမာဏပါ အပြောင်းအလဲလိုက်ဖြစ်တာကိုတွေ့ရှိရပါတယ်။

ဒါကြောင့် ပရော်ဖက်ဆာ Walker က ခုလို မှတ်ချက်ချခဲ့ပါတယ်။

“ အိပ်စက်ခြင်းဟာ နာကျင်မှုဝေဒနာကို သက်သာလျော့ပါးစေတဲ့ သဘာဝကပေးတဲ့ အကိုက်အခဲပျောက်ဆေး တစ်ခုပါပဲ “

Dr.KG

Ref: https://www.medicalnewstoday.com/articles/324316.php

ဆက်စပ် ဆောင်းပါးများ