လူ့ခန္ဓာကိုယ်အတွင်းမှာ ကြွက်သားပရိုတင်းတည်ဆောက်ခြင်းနဲ့ ဖြိုခွဲခံရခြင်းတို့ဟာ နေ့စဥ်ပုံမှန်ဖြစ်ပေါ်နေလေ့ရှိပါတယ်။ ကြွက်သားဖြိုခွဲခံရခြင်းက တည်ဆောက်ခြင်းထက် ပိုမို မြန်ဆန်များပြားလာပြီဆိုရင် ကြွက်သားဆုံးရှုံးမှုတွေ ဖြစ်ပေါ်လာပါတော့တယ်။ အသက်အရွယ်ကြီးမြင့်လာတာနဲ့အမျှ ကြွက်သားဆုံးရှုံးမှုပမာဏ ပိုမိုမြန်ဆန်များပြားလာပါတယ်။ ရလဒ်အနေနဲ့ ကောင်းစွာမလှုပ်ရှားနိုင်တာ၊ မောပန်းတာ၊ ခွန်အားမရှိတာတွေခံစားလာကြရပါတယ်။ ကြွက်သားတွေ ကျန်းမာကြံ့ခိုင်ဖို့အတွက် ပရိုတင်းဓာတ်ဟာ ဘယ်လောက်အရေးပါတယ်ဆိုတာ လူတိုင်းသိပြီးကြမှာပါ။ ထို့အပြင် ကြွက်သားဆုံးရှုံးမှုကို ကာကွယ်ဖို့အတွက် HMB ကလည်း ဘယ်လောက်အရေးပါတယ်ဆိုတာကို လူတိုင်းသိထားသင့်ပါတယ်။
▪ HMB ဆိုတာဘာလဲ?
နေ့စဉ်စားသောက်နေကျအစားအသောက်တွေဖြစ်တဲ့ အသား၊ ကြက်ဥ၊ ပဲအမျိုးမျိုးနဲ့ နွားနို့ စတာတွေကနေ ပရိုတင်းဓာတ်ကို ရရှိပါတယ်။ ပရိုတင်းဟာ လူ့ခန္ဓာကိုယ်အတွင်းကိုရောက်ရှိတဲ့အခါ ဇီဝကမ္မဖြစ်ပျက်မှုတွေအရ အဆင့်ဆင့်ဖြိုခွဲခံရပြီး အမိုင်နိုအက်စစ်တစ်မျိုးဖြစ်တဲ့ leucine သို့ပြောင်းလဲပြီး နောက်ဆုံးမှာ ကြွက်သားကျန်းမာရေးအတွက်အရေးပါတဲ့ HMB ဆိုတဲ့ ဓာတ်တစ်မျိုးအဖြစ်ပြောင်းလဲရရှိပါတယ်။ HMB ရဲ့အရှည်ကောက်ဟာ beta-hydroxy beta-metylbutyrate ဖြစ်ပါတယ်။
▪ HMB ကကြွက်သားကျန်းမာရေးအတွက် ဘယ်လို အလုပ်လုပ်သလဲ?
HMB ဟာ ခန္ဓာကိုယ်တွင်း ပရိုတင်းဖြိုခွဲမှုကို လျော့ချပေးခြင်းအားဖြင့် ကြွက်သားဆုံးရှုံးမှုကို ကာကွယ်ပေးပါတယ်။ ကြွက်သားကျန်းမာကြံ့ခိုင်ရေးအတွက်လည်း အထောက်အကူဖြစ်စေပါတယ်။ HMB ကခန္ဓာကိုယ်တွင်း အဆီတွေဖြိုခွဲရာမှာလည်း အရေးပါကြောင်း တွေ့ရှိရပါတယ်။
▪ HMB ကို အစားအသောက်တွေကနေရနိုင်လား?
ပရိုတင်းပါဝင်တဲ့ အစားအသောက်တွေဖြစ်တဲ့ အသား၊ ကြက်ဥနဲ့ ပဲအမျိုးမျိုးတို့ကနေ HMB ရရှိနိုင်ပါတယ်။ ဒါ့အပြင် HMB ဟာ leucine ကိုဖြိုခွဲခြင်းမှရရှိလာတဲ့ အတွက် leucine ပါဝင်တဲ့ စပျစ်သီး၊ ငါးခူစတဲ့ အစားအသောက်တွေကို စားသုံးပေးနိုင်ပါတယ်။ သို့သော် စားသုံးခြင်းမှရရှိတဲ့ leucine ပမာဏထဲမှ အနည်းငယ်ကသာ HMB အဖြစ်သို့ ပြောင်းလဲနိုင်တာဖြစ်တဲ့ အတွက် HMB ကို အစားအသောက်ကနေ လုံလောက်စွာရရှိနိုင်ဖို့ အလွန်ခက်ခဲပါတယ်။ ဒါကြောင့် လူကြီးတွေအနေနဲ့ HMB ပါဝင်တဲ့ ဖြည့်စွက်စာတွေကို သင့်တော်တဲ့ ပမာဏအတိုင်း သောက်သုံးပေးနိုင်ပါတယ်။
▪ တစ်နေ့ကို HMB ပမာဏ ဘယ်လောက်ရရှိဖို့လိုလဲ?
ပျမ်းမျှအားဖြင့် လူကြီးတစ်ယောက်ဟာ တစ်နေ့ကို HMB ၃ဂရမ်လောက် ရရှိဖို့လိုအပ်ပါတယ်။ တစ်နေ့ကြက်ဥအလုံး ၅၀ လောက်စားသုံးမှသာ HMB ၁.၅ဂရမ်ပမာဏကို ရရှိနိုင်မှာပါ။ ဒါကြောင့် HMB ပမာဏလုံလောက်စွာပါဝင်တဲ့ ဖြည့်စွက်စာ သောက်သုံးခြင်းက ကြွက်သားဆုံးရှုံးမှုကိုလျော့ချဖို့အတွက် ပိုမိုလွယ်ကူထိရောက်စေမှာဖြစ်ပါတယ်။
▪ HMB ကတခြားဘာကောင်းကျိုးတွေပေးသေးလဲ?
HMB ကကြွက်သားဆုံးရှုံးမှုကို ကာကွယ်ရုံသာမက သွေးတွင်းအဆီဓာတ်လျော့ကျစေခြင်း၊ သွေးပေါင်ချိန်ထိန်းညှိပေးခြင်း၊ နှလုံးကျန်းမာရေးအတွက် အထောက်အကူပြုခြင်းစတဲ့ ကောင်းကျိုးများစွာရရှိနိုင်ပါတယ်။
