အိပ်ရေးပျက်ခြင်းဟာ လူတစ်ယောက်ရဲ့ ခန္ဓာကိုယ်နဲ့ စိတ်ကျန်းမာရေးအပြင် အရေပြားကျန်းမာရေးကိုပါ ထိခိုက်စေနိုင်တဲ့ အမူအကျင့်တစ်ခုဖြစ်ပါတယ်။ ညည့်နက်တဲ့အထိ အလုပ်အလွန်အကျွံလုပ်တာ၊ ညဖက်အိပ်ချိန်နောက်ကျတာ၊ နေ့ညအလုပ်လုပ်ချိန် ပြောင်းပြန်လုပ်ရသူတွေမှာ အိပ်ရေးပျက်တဲ့ပြဿနာကို ကြုံရတတ်ပြီး အရေပြားကျန်းမာရေး ထိခိုက်မှုပါ ရှိတတ်ပါတယ်။
၂၀၁၅ ခုနှစ်က ထုတ်ဝေခဲ့တဲ့ Clinical and Experimental Dermatology ဂျာနယ်မှာတော့ ကျန်းမာသော အမျိုးသမီးစုစုပေါင်း အယောက် (၆၀) ကို အုပ်စု နှစ်စု အညီအမျှ ခွဲကာ အုပ်စုတစ်စုတွင် တစ်ညအား ပုံမှန် ၈ နာရီ အိပ်ရေးဝအောင် အိပ်စက်စေပြီးတော့ နောက်တစ်စုတွင် ၅ နာရီသာ အိပ်စက်ခွင့်ပြုပြီး နှိုင်းယှဉ်လေ့လာခဲ့ပါတယ်။ ပြင်ပမှ ပိုးမွှားများ ဝင်ရောက် မထိုးဖောက်နိုင်အောင် တားဆီးပေးသော အရေပြားကို စမ်းသပ်စစ်ဆေးဖို့အတွက် ကော်တိပ်အသုံးပြုပြီးတော့ အရေပြားအပေါ်လွှာကို ရယူသော နည်းကို အသုံးပြုခဲ့ကြတယ်။ အရေပြား အိုမင်းရင့်ရော်မှုအတွက်လဲ SCINTEXA (TM) ကိရိယာကို အသုံးပြု စစ်ဆေးခဲ့ပါတယ်။
စမ်းသပ်ချက်တွင် ပါဝင်သူများကို နေရောင်ခြည်နဲ့ ထိတွေ့ရာမှ အရေပြားနီရဲလာပြီးတော့ ပြန်ကောင်းသွားချိန်အထိ အုပ်စုနှစ်ခုကို နှိုင်းယှဉ်လေ့လာခဲ့ပါတယ်။ နောက်ဆုံးတွေ့ရှိချက်များအရ အိပ်ရေးဝသူများတွင် အရေပြားအိုမင်းရင့်ရော်မှုနှုန်း ပို၍ လျော့နည်းနေပြီးတော့ ပြင်ပမှအရာများ မဝင်ရောက်နိုင်အောင် တားဆီးပေးသော လုပ်ဆောင်နိုင်စွမ်းကလည်း အိပ်ရေးပျက်သူများထက် ၃၀% ပို၍ သာလွန်ကောင်းမွန်နေတာကို တွေ့ရတယ်။ အိပ်ရေးဝဝအိပ်သူများရဲ့ အရေပြားဟာနေရောင်ခြည်နဲ့ ထိတွေ့ရာမှ အရေပြား နီမြန်းပျက်စီးမှုများ ပို၍မြန်မြန် ပြန်ကောင်းလာတာကို တွေ့ရပါတယ်။
အိပ်ရေးပျက်သူ၊ ကောင်းစွာ မအိပ်စက်ရသူများတွင် မျက်ကွင်းညိုလာပြီးမျက်ကွင်းတွေချောင်ကျကာ၊ မျက်လုံးတွေ မို့အစ် နီးမြန်းနေပြီးတေ့ာ အရေပြားတွေ ခြောက်သွေ့နေတတ်ပါတယ်။ အိပ်စက်ခြင်းဟာ ခန္ဓာကိုယ်အရေပြားကို ထောက်ပံ့ပေးတဲ့ ကော်လာဂျင်ပရိုတင်း ထုတ်လုပ်ခြင်းကို လှုံ့ဆော်ပေးပြီး အရေပြားတင်းရင်းမှုကို ထိန်းသိမ်းပေးပါတယ်။ အိပ်ရေးပျက်ခြင်းဟာ မျက်နှာနဲ့အရေပြားအပေါ် သက်ရောက်မှုတွေ များစွာရှိတဲ့အတွက် လူတစ်ဦးနဲ့ တစ်ဦး ပေါင်းသင်းဆက်ဆံရာမှာ အပေါ်ယံအမြင်အရ အိပ်ရေးဝတဲ့ သူတွေနဲ့ ယှဥ်လိုက်ရင် သိသိသာသာ ဆွဲဆောင်မှုလျော့ကြနေတတ်ပါတယ်။
အိပ်ရေးပျက်ခြင်း ကြုံနေရသူများအတွက် အောက်ပါ အချက်များကို စမ်းသပ်ကြည့်ကြဖို့ တိုက်တွန်းလိုက်ရပါတယ်။
- ခဏတစ်ဖြုတ်လောက် အိပ်စက်ခြင်းဟာ စွမ်းအားတွေ အများကြီး ပြန်လည် ဖြည့်တင်းနိုင်တာကြောင့် နေခင်းဖက်မှာ မိနစ် ၂၀ လောက် ခဏတာ မှေးစက်ပါ။
- ညဖက်အိပ်ယာဝင်ချိန်မှာ အခန်းကို မီးမှိတ်၊ အသေအချာ အိပ်စက်ဖို့ အချိန်သေချာပေးပြီး သက်တောင့်သက်သာ ဖြစ်စေတဲ့ အိပ်ရာ၊ အခင်းတို့ကို ကြိုတင်ပြင်ဆင်ပါ။
- အိပ်ရာမဝင်ခင် တစ်နာရီ ဒါမှမဟုတ် နှစ်နာရီလောက် အလိုထဲက မိုဘိုင်းဖုန်းကဲ့သို့ ဒစ်ဂျစ်တယ် ပစ္စည်းများကို အဝေးမှာထားပြီး မလိုအပ်ပါက ပိတ်ထားပါ၊ ညနေ ၃နာရီနောက်ပိုင်းမှာ ကဖင်းဓာတ်ပါတဲ့ အစားအသောက်များ မစားသောက်ဘဲနေပါ၊ အိပ်ချိန်နီးတဲ့အခါမှ ပြင်းထန်တဲ့ လေ့ကျင့်ခန်းတွေ လုပ်တာကိုရှောင်ပြီး ကောင်းကောင်း အိပ်စက် အနားယူဖို့ စိတ်ရှည်ရှည် ပြင်ဆင်ပါ။
- ကောင်းစွာ မအိပ်စက်နိုင်၊ ညဖက် အိပ်မပျော် ဖြစ်နေပါက ကျန်းမာရေးအတွက် အရေးပေါ် အခြေအနေဖြစ်လို့ နီးစပ်ရာ ကျွမ်းကျင်သူများနဲ့ ကျန်းမာရေး စစ်ဆေးကုသမှု အမြန်ခံယူသင့်ပါတယ်။
Author: Dr. Yee Mon
