စိတ်ပူပန်စရာတွေရှိရင် အိပ်မပျော်၊ စားမဝင် ဖြစ်ဖူးကြတယ် မဟုတ်လား? တကယ်တော့ စိတ်ဖိစီးမှုနဲ့ အိပ်မပျော်တာက အပြန်အလှန် ဆက်စပ်လျက် ရှိပါတယ်။ အိပ်ချိန် ၈ နာရီရှိပေမယ့် အိပ်မက်ဆိုးတွေမက်တာ၊ ခဏခဏပြန်နိုးနေတာမျိုးကလည်း ကောင်းစွာအိပ်မပျော်တာပါပဲ။
ခန္ဓာကိုယ်က ပုံမှန်ထုတ်လုပ်နေတဲ့ ဟော်မုန်းတွေထဲမှာ ဦးနှောက်ရဲ့ hypothalamus အပိုင်းကနေ ထုတ်ပေးတဲ့ cortisol ဟော်မုန်းလည်းပါပြီး မနက်အိပ်ယာထချိန်မှာ အများဆုံး ထုတ်လုပ်ပေးပါတယ်။ စိတ်ဖိစီးတဲ့အခါ cortisol တွေကို ပုံမှန်ထက်များစွာ ပိုမိုထုတ်လုပ်ပေးတဲ့အတွက် အိပ်ချင်စိတ်လျော့နည်းပြီး မျက်စိကြောင်နေတတ်ပါတယ်။
အိပ်မပျော်ခြင်းကို ရေတိုခံစားရသူများ…
အိပ်မပျော်တာက ၃ လအောက်ပဲ ရှိသေးတယ်ဆိုရင် အချိန်တိုလို့ ပြောလို့ရပါတယ်။
– လုပ်ငန်းခွင်မှာ အဆင်မပြေတာ
– စီးပွားရေး အဆင်မပြေတာ
– လူမှုပေါင်းသင်းဆက်ဆံရေး အဆင်မပြေတာ
– နောင်တနဲ့ ပူပန်မှုတွေ ဖြစ်နေတာ စတဲ့ စိတ်ဖိစီးမှုတွေကြောင့် ဖြစ်တာများပါတယ်။ အိပ်ယာအပြောင်းအလဲ၊ နေရာအရွေ့အပြောင်းကြောင့်လည်း ဖြစ်တတ်ပါတယ်။
နာတာရှည် အိပ်မပျော်သူများ…
အချိန် ၃ လထက်ကြာပြီး တစ်ပတ်ကို အနည်းဆုံး ၃ ရက်လောက် အိပ်မပျော်ဖြစ်နေတဲ့သူတွေကို နာတာရှည်အိပ်မပျော်တဲ့သူတွေလို့ သတ်မှတ်ပါတယ်။
– အလုပ်မှာ ပြဿနာမျိုးစုံတက်ပြီး လုပ်ငန်းခွင် မပျော်ရွှင်တဲ့သူ
– ကွာရှင်းထားတဲ့သူ၊ အိမ်ထောင်ရေးအဆင်မပြေတဲ့သူ
– မိသားစုနဲ့ ဆက်ဆံရေး အဆင်မပြေသူ
– ချစ်ခင်ရသူ တစ်ယောက်ယောက် ဆုံးရှုံးထားရသူ
– ရောဂါကြီးကြီးမားမား ခံစားနေရသူ၊ ထိခိုက်ဒဏ်ရာရထားသူ
– လူနေမှုအဆင့်အတန်း နိမ့်ကျလွန်းပြီး အရာရာအဆင်မပြေသူတွေမှာ အဖြစ်များပါတယ်။
အိပ်မပျော်တဲ့အခါ…
– မနက်ဘက်မှာ ကြည်ကြည်လင်လင် မရှိတာ
– စိတ်တို၊ စိတ်ရှုပ်နေတတ်တာ
– အာရုံစူးစိုက်မှု မရှိတာ
– အလုပ်မှာ အမှားအယွင်းများတာ
– ကားမောင်းရတဲ့အခါမျိုးမှာ အက်ဆီးဒန့် ဖြစ်နိုင်ခြေများတာ
– ကိုယ်ခံအား ကျလာတာတွေ ဖြစ်နိုင်ပါတယ်။
ဒါတွေအပြင် စိတ်ဖိစီးမှု ကာလကြာရှည်လာတဲ့အခါ…
– နှလုံးခုန်မြန်ပြီး သွေးဖိအားများလာတာကြောင့် သွေးတိုးတာ၊ လေဖြတ်တာ၊ နှလုံးအမောဖောက်တာ
– အစာမကြေ ရင်ပြည်ရင်ကယ်ဖြစ်တာ၊ စားချင်သောက်ချင်စိတ် မရှိတာ
– ခေါင်းတစ်ခြမ်းကိုက်တာ
– လိင်စိတ်ဆန္ဒမရှိတာ၊ မျိုးပွားနှုန်းကျတာတွေ ဖြစ်နိုင်ပါတယ်။
စိတ်ဖိစီးမှု ရှိနေလည်း အိပ်ပျော်ဖို့…
*အိပ်ချိန်ကို ပုံမှန်သတ်မှတ်ထားပါ။
*အိပ်ယာကို သက်တောင့်သက်သာ ဖြစ်အောင် ပြင်ဆင်ပါ။ အလင်းရောင် မဝင်အောင်၊ တိတ်ဆိတ်ငြိမ်သက်အောင် ဂရုပြုပါ။
*အခန်းထဲမှာ တီဗီဖွင့်တာ၊ ဖုန်း၊ ကွန်ပြူတာ သုံးတာမျိုး ရှောင်ပါ။ မအိပ်ခင် ၂ နာရီလောက်တည်းက မသုံးတော့ဖို့ သတိထားပါ။
*ဆေးလိပ်သောက်တာ၊ အရက်သောက်တာ၊ လက်ဖက်ရည်၊ ကော်ဖီသောက်တာမျိုးတွေ ရှောင်ပါ။
*နေ့စဉ်ပုံမှန် ကိုယ်လက်လှုပ်ရှား လေ့ကျင့်ခန်းလုပ်ပါ။
*အိပ်မပျော်နိုင်ရင် စာဖတ်တာ၊ တရားထိုင်၊ တရားနာတာ၊ အိပ်ပျော်စေတဲ့ ဂီတသံစဉ်လေးတွေ ဖွင့်တာမျိုးလုပ်ပါ။
*မနက်ကြုံရမယ့် အလုပ်တွေ၊ ပြဿနာတွေကို အိပ်ခါနီး မစဉ်းစာဒမိအောင်
နေပါ။ ညဘက် တစ်ရေးနိုးတဲ့အခါ နာရီမကြည့်ပါနဲ့။
ဘယ်လိုလုပ်လို့မှ အိပ်မပျော်ဘူး ဆိုရင်တော့ နားလည်တတ်ကျွမ်းတဲ့ ဆရာဝန်နဲ့ တိုင်ပင်ပြီး လိုအပ်ရင် ဆေးအကူအညီ ရယူပါ။
တစ်နေ့တာလုံး တက်ကြွလန်းဆန်းနိုင်အောင် ညဘက် ကောင်းကောင်းအိပ်ပျော်ဖို့ အရေးကြီးပါတယ်။ စိတ်ဖိစီးတဲ့အခါ အိပ်မပျော်တတ်သလို အိပ်မပျော်တာ များလာတဲ့အခါ စိတ်ဓာတ်ကျ၊ စိတ်ဖိစီးပြီး ကိုယ်ကျန်းမာရေးနဲ့ စိတ်ကျန်းမာရေးကို ထိခိုက်လာနိုင်တာပါပဲ။ ဒါကြောင့် အိပ်မပျော်နိုင် ဖြစ်နေရင် ပေါ့ဆမနေဘဲ အထက်မှာ ပြောခဲ့တဲ့ နည်းလမ်းလေးတွေနဲ့ အိပ်ပျော်ဖို့ ကြိုးစားကြပါနော်။
Author: Dr.Yee Mon
