နေရောင်ခြည်ထဲက ခရမ်းလွန်ရောင်ခြည်တွေက အသားအရေကို ထိခိုက်ပြီး အရေပြားကင်ဆာ ဖြစ်စေနိုင်သလို မျက်စိကိုလည်း ထိခိုက်စေနိုင်တယ် ဆိုတာ သိပြီးကြပြီလား?
ခရမ်းလွန်ရောင်ခြည်တွေ ဖြစ်တဲ့ UVA, UVB, UVC သုံးမျိုးစလုံးက အရေပြားကိုရော၊ မျက်စိကိုရော ထိခိုက်စေနိုင်တဲ့ ရောင်ခြည်တွေ ဖြစ်ပါတယ်။
ခရမ်းလွန်ရောင်ခြည်ကြောင့် ဖြစ်နိုင်တဲ့ မျက်စိပြဿနာများ…
1. Pinguecula
Sclera လို့ခေါ်တဲ့ မျက်သားဖြူပေါ်မှာ ပရိုတင်းနဲ့ အဆီတွေ ပါဝင်တဲ့ အဝါရောင်မျက်သားတက်ခြင်း ဖြစ်ပြီး မျက်စိယားယံပြီး ခိုးလို့ခုလု ဖြစ်စေပါတယ်။
2. Pterygium (Surfer’s Eye)
Pterygium ကလည်း မျက်သားဖြူကနေ မျက်ကြည်လွှာအထိ မျက်သားတက်ခြင်း တမျိုးဖြစ်ပါတယ်။ Pterygium က မျက်ကြည်လွှာအထိ ရောက်တဲ့အတွက် အမြင်အာရုံကို ထိခိုက်နိုင်ပါတယ်။
3. အတွင်းတိမ်
နေရောင်ခြည်နဲ့ ထိတွေ့မှုကြောင့် မျက်စိမှန်ဘီလူး အတွင်းမှာ အတွင်းတိမ် (cataract) ဖြစ်တတ်ပါတယ်။ အတွင်းတိမ်က အမြင်ဝါးတာ၊ အမြင်မကြည်တာ၊ အရောင်တွေ မကွဲပြားတာကနေ ကာလကြာရင် မျက်စိကွယ်တဲ့အထိ ဖြစ်နိုင်ပါတယ်။
4. အသက်အရွယ်ကြောင့် မြင်လွှာရောင်ခြယ် ပျက်စီးခြင်း
Age-related macular degeneration (AMD) ဆိုတဲ့ မြင်လွှာရောင်ခြယ်ပျက်စီးခြင်းကြောင့် အသက်ကြီးသူတွေမှာ ရှင်းလင်းစွာ မမြင်ရတာ၊ သဲသဲကွဲကွဲ မမြင်ရတာမျိုး ဖြစ်တတ်ပါတယ်။
5. မျက်ခွံကင်ဆာ
ခရမ်းလွန်ရောင်ခြည်တွေက မျက်စိအတွင်းက ကင်ဆာရောဂါတွေနဲ့ ဆက်စပ်ကြောင်း တိကျတဲ့ သုတေသန အဖြေတွေ မရှိပေမယ့် မျက်ခွံအရေပြားကင်ဆာကိုတော့ ဖြစ်နိုင်စေပါတယ်။
ခရမ်းလွန်ရောင်ခြည်တွေရဲ့ ဒဏ်ကနေ မျက်စိကို ဘယ်လို ကာကွယ်ရမလဲ?
• အပြင်ထွက်တဲ့အခါ UV protection ပါတဲ့ နေကာမျက်မှန် တပ်တာ
• ဦးထုပ်ဆောင်းတာ၊ ထီးဆောင်းတာ
• ခရမ်းလွန်ရောင်ခြည်တွေ ထွက်တဲ့ မနက် ၁၀ နာရီကနေ ညနေ ၄ နာရီအတွင်း အိမ်ပြင်မထွက်တာ
• SPF ပါတဲ့ eyecream နဲ့ suncream လိမ်းတာတွေက မျက်စိကိုရော မျက်နှာကိုပါ ခရမ်းလွန်ရောင်ခြည်တွေရဲ့ ရန်ကနေ ကာကွယ်ပေးနိုင်ပါတယ်။
ခရမ်းလွန်ရောင်ခြည်ကြောင့် ဖြစ်လာတဲ့ ဓာတ်တိုးပစ္စည်းတွေကို ချေဖျက်ပေးတဲ့ Lutein, Zeaxanthin နဲ့ Carotenoids တွေကြွယ်ဝတဲ့ အနီရောင်နဲ့ အဝါရောင်ရှိတဲ့ အသီးအရွက်တွေ၊ အစိမ်းရောင် ဟင်းသီးဟင်းရွက်တွေ စားပေးရင် သို့မဟုတ် ဖြည့်စွက်စာအားဆေးတွေ သောက်ရင်လည်း ခရမ်းလွန်ရောင်ခြည်ကြောင့် ဖြစ်တဲ့ မျက်စိပြဿနာတွေကို အနည်းနဲ့အများ ကာကွယ်နိုင်ပါတယ်။
မျက်စိဟာ ခန္ဓာကိုယ်ရဲ့ အရေးအကြီးဆုံး အစိတ်အပိုင်းတွေထဲကတစ်ခုပါ။ အမြင်တွေ ကြည်လင်ရှင်းလင်းပြီး ဘဝအမှောင်မကျစေဖို့ သတိမမူမိတတ်တဲ့ နေရောင်ခြည်ဒါဏ်နဲ့ခရမ်းလွန်ရောင်ခြည်တွေကို ကာကွယ်နိုင်ရန် အရေးကြီးပါတယ်။
Author : Dr.Yee Mon
