အသက်ကြီးရင် တိမ်စီးတတ်ကြပါတယ်။ မိုးပေါ်က တိမ်မဟုတ်ဘဲ မျက်စိမှာ တိမ်စွဲတာကို ဆိုလိုတာပါ။ မျက်စိတိမ်ရောဂါတွေဟာ အသက်ကြီးသူတွေမှာ ပိုအဖြစ်များပေမယ့် အသက်ငယ်သူတွေမှာလည်း ဖြစ်နိုင်တာမို့ အမြင်အာရုံဆုံးရှုံးရမှာ ကြောက်ရင် သတိထားသင့်ပါတယ်။
အတွင်းတိမ်နဲ့ ရေတိမ်ဆိုပြီး အဖြစ်များတဲ့ မျက်စိတိမ် နှစ်မျိုး ရှိပါတယ်။
အတွင်းတိမ်
အတွင်းတိမ်က မျက်စိထဲက lens လို့ခေါ်တဲ့ မှန်ဘီလူးမှာ ဖြစ်တဲ့ရောဂါပါ။ မှန်ဘီလူးက မျက်စိထဲဝင်လာတဲ့ အလင်းကို မြင်လွှာ (retina) ပေါ်မှာ ဆုံချက်ကျအောင် လုပ်ဆောင်ပေးပါတယ်။
မှန်ဘီလူးမှာ တိမ်စွဲနေတဲ့အခါ မြူနှင်းတွေ ကျနေသလို အမြင်ဝါးတာ၊ အမြင်အာရုံ ကွယ်သွားတာ၊ အလင်းရောင်မှိန်နေရင် ကောင်းကောင်းမမြင်ရတာ၊ အရောင်တွေ မသဲကွဲတာတွေ ဖြစ်နိုင်ပါတယ်။
• အကာအကွယ်မပါဘဲ နေရောင်ခြည်နဲ့ UV rays မကြာခဏထိတွေ့တာ
• ဆီးချိုရှိတာ
• ဆေးလိပ်သောက်တာ
• အရက်အလွန်အကျွံ သောက်တာ
• စတီးရွိုက်ဆေးတွေ ကြာရှည်သုံးစွဲတာ
• မိသားစုရာဇဝင်မှာ အတွင်းတိမ်ရှိဖူးသူတွေ
• မျက်စိကို ထိခိုက်ဒဏ်ရာ ရတာ
• ဓာတ်ရောင်ခြည် ကုသမှု ခံယူဖူးတာတွေကြောင့် အတွင်းတိမ် ဖြစ်နိုင်ခြေ များပါတယ်။
အတွင်းတိမ်ဖြစ်ရင် ခွဲစိတ်ကုသပြီး မှန်ဘီလူးကို အစားထိုးတာက အကောင်းဆုံးကုသမှု ဖြစ်ပါတယ်။ အချိန်မီခွဲစိတ်မှုမခံယူနိုင်ရင် အမြင်အာရုံဆုံးရှုံးတဲ့ထိ ဖြစ်နိုင်တဲ့ ရောဂါပါ။
ရေတိမ်
ရေတိမ်ဟာ ဒုတိယမြောက် အဖြစ်အများဆုံးသော မျက်စိကွယ်စေတဲ့ ရောဂါဖြစ်ပါတယ်။ မျက်စိအတွင်းမှာ ဖိအားတွေများလာပြီး မျက်စိနဲ့ ဦးနှောက်ကို ဆက်သွယ်ပေးထားတဲ့ အာရုံကြောဖြစ်တဲ့ optic nerve ထိခိုက်ပျက်စီးတာကြောင့် ရေတိမ် ဖြစ်တာပါ။
ရေတိမ်ဖြစ်နိုင်ခြေများသူတွေထဲမှာ…
• အသက် ၅၅ နှစ်အထက် လူကြီးတွေ
• ဆီးချိုရှိသူ၊ သွေးတိုးရှိသူ
• အနီးမှုန်၊ အဝေးမှုန်သူ
• မိသားစုထဲမှာ ရေတိမ်ဖြစ်ဖူးတဲ့ မျိုးရိုးရှိသူ
• မျက်စိထိခိုက်ဒဏ်ရာရဖူးသူ
• စတီးရွိုက်ပါတဲ့ မျက်စဥ်းဆေးကို ရေရှည်သုံးစွဲ နေသူတွေ ပါဝင်ပါတယ်။
• ရုတ်တရက် မျက်စိက အပြင်းအထန် နာကျင်တာ
• အမြင်ဝါးတာ၊ အလင်းရောင်ကို ကြည့်ရင် သက်တန့်ရောင် ကွင်းတွေလို မြင်နေတာ
• မျက်စိတဝိုက်မှာ တင်းနေ၊ နာနေတာ
• မျက်စိနီနေတာ
• ခေါင်းကိုက်တာ
• ပျို့အန်တာတွေက ရေတိမ်ရောဂါရဲ့ လက္ခဏာတွေ ဖြစ်ပါတယ်။
ရေတိမ်ဟာ အချိန်မီ ကုသမှု မခံယူရင် အမြင်အာရုံ ဆုံးရှုံးတဲ့ထိ ဖြစ်နိုင်ပါတယ်။ ရေတိမ်ကြောင့် ချို့ယွင်းပြီးသား အမြင်အာရုံက ပြန်မကောင်းနိုင်တော့ပေမယ့် ပိုဆိုးမလာအောင်တော့ ကုသလို့ရပါတယ်။
ရေတိမ်ကုသမှု အနေနဲ့…
*မျက်စိအတွင်းဖိအား လျော့စေတဲ့ မျက်စဥ်းခပ်ခြင်း
*လေဆာနဲ့ ကုသခြင်း
*မျက်ရည်ပြွန် ပိတ်နေတာကို ခွဲစိတ်ပြီး စီးဆင်းမှုကောင်းအောင် လုပ်ခြင်းတွေ လုပ်လေ့ရှိပါတယ်။
မျက်စိတိမ်ရောဂါတွေက အဖြစ်များသလို အမြင်အာရုံ ဆုံးရှုံးနိုင်ခြေလည်း များတာမို့ မပေါ့ဆသင့်ပါဘူး။
Author: Dr.Yee Mon
