မိုးရာသီ ရောက်လာတာက တခြားရာသီဥတုတွေထက်စာရင် ဝဲရောဂါ ပိုဖြစ်လွယ်တယ်။ ရိုးရိုးဝဲရော သဲဝဲစားတာရော ဖြစ်နိုင်တယ်။ မိုးတွင်းရောက်ပြီဆိုရင် လမ်းပေါ်မြေကြီးပေါ်တွေမှာ ရေအိုင်တတ်တယ်။ အဲလိုအခါ အိုင်တွေ့တိုင်းခြေဆေးတတ်တဲ့သူတွေဆို လမ်းပေါ်ကရေအိုင်တွေ ဗွက်အရောင်ထနေလည်း ရှောင်သွားဖို့စိတ်မကူးဘဲ ခြေဝင်ဆေးလိုက်တာပဲ။ ကလေးတွေလည်း မိုးရေထဲကစားနေရင်း ဗွက်အိုင်ထဲမှာ ခြေဆေးတတ်ကြတယ်။
ဗွက်အိုင်မှာ ခြေမဆေးလည်း မိုးတွင်းမှာ မိုးရေတွေ စိုစိစိတွေနဲ့ ဘတ်စ်ကားစီးတဲ့အခါပဲဖြစ်ဖြစ် မိုးရေထဲ လမ်းလျှောက်ရတာဖြစ်ဖြစ် ခြေထောက်တွေ အရမ်းညစ်ပတ်လွယ်ပါတယ်။ ညစ်ပတ်ပြီး ချက်ချင်းရေပြန်ဆေးဖို့ မဖြစ်နိုင်တဲ့အခါတွေမှာ ဝဲ တွေဖြစ်လွယ်ပါတယ်။
တချို့တွေကျတော့လည်း နေပူမိုးရွာမရှောင် တစ်နေကုန်အလုပ်လုပ်ရတယ်။ အဲလိုအခါတွေမှာ ဖိနပ်တွေ ရေစိုလည်း ဒါပဲစီးရတယ်။ ရွေးချယ်ခွင့်မရှိဘူး။ ပြန်ဆေးလို့မလွယ်ဘူး။ ဖိနပ်ညစ်ပတ်တာတွေကတဆင့်လည်း ဝဲ တွေ ဖြစ်လွယ်တယ်။ ခြေထောက်မှာ သဲဝဲစားတာလည်းဖြစ်လွယ်တယ်။
ဝဲ ကဘယ်လိုပုံစံလဲ
ဝဲ ဖြစ်ပြီဆိုရင် အရေပြားမှာ အထူးသဖြင့် ခြေချောင်းကြားနဲ့ လက်ချောင်းကြားတွေမှာ အရည်ကြည်ဖုသေးသေးလေးတွေ ဖြစ်ပါတယ်။ များလည်းများနိုင်တယ်။ တစ်ခါတစ်ခါ ဆို လက်တွေခြေတွေကြားမှာ အမြောင်းလေးတွေတောင် တွေ့ရပါသေးတယ်။ အရမ်းလည်းယားတတ်တယ်။ တစ်နေကုန်ယားတယ် ဆိုပေမယ့် ညပိုင်းတွေကပိုသိသာပါတယ်။ အိပ်လို့မရအောင် ယားတယ်။ ကုတ်နေရင်းနဲ့ အရှိန်ပါလာတတ်ပြီး အနာတွေအထိဖြစ်နိုင်တယ်။ အနာတွေပိုးဝင်လာတယ်ဆိုရင် ပြည်တည်နာအထိဖြစ်လာနိုင်ပါတယ်။
သဲဝဲစားတာတွေကျတော့ ရေစိုစိုတွေနဲ့ ကြာကြာထိတွေ့ရတဲ့နေရာတွေမှာ အဓိကဖြစ်တတ်ပါတယ်။ ခြေချောင်းလေးတွေရဲ့ အရင်းနေရာ ခြေဖဝါးဘက်အခြမ်းမှာ ပိုဖြစ်နိုင်ပါတယ်။ လက်မှာလည်း ဖြစ်နိုင်တယ်။ လက်ချောင်းအရင်းပိုင်းတွေလောက်မှာပါ။ သဲဝဲစားတာက အရည်ကြည်ဖုလိုမျိုးမဖြစ်တတ်ပါဘူး။ ခြေလက်အခြေနေရာတွေမှာ အရေပြားပွန်းပဲ့နေပြီး ရေကြာကြာစိုထားတဲ့ အရေပြားလို အရေပြားက နူးအိနေတတ်တယ်။ အဲ့အထဲမှာမှ ပေါက်ပြဲနေတဲ့အရေပြားကိုတွေကိုပါ တွေ့နိုင်ပါတယ်။ သဲဝဲစားတာက အရမ်းမယားတတ်ပါဘူး။ နာတတ်ပါတယ်။ ဒီလိုဖြစ်တာထက်ပိုဆိုးလာတဲ့အခါ နာတာတင်မကပဲ ရောင်ရမ်းတာတွေပါ ဖြစ်လာနိုင်ပါတယ်။ လမ်းတောင်ကောင်းကောင်းမလျှောက်နိုင်တာတွေထိ ဖြစ်နိုင်ပါတယ်။
ဝဲပဲဖြစ်ဖြစ်၊ သဲဝဲစားတာပဲဖြစ်ဖြစ် မဖြစ်ပွားဖို့ ကြိုတင်သတိထားပြီး လုပ်ဆောင်ကြဖို့လိုပါတယ်။
ဘာကြောင့်လဲဆိုရင် တစ်ယောက်မှာ ဖြစ်ပြီဆိုတာနဲ့ တစ်အိမ်လုံးကူးနိုင်တာကြောင့်ပါ။
ဘယ်လိုကာကွယ်မလဲ ?
မိုးရေဖြစ်ဖြစ်ဗွက်ရေဖြစ်ဖြစ် စိုလာပြီဆိုရင် အိမ်ပြန်ရောက်တာနဲ့ ရေအသန့် နဲ့သေချာဆေးပါ။
ဆပ်ပြာတိုက်ပါ။ အဝတ်သန့်နဲ့ အခြောက်ပြန်သုတ်ပါ။ ဖိနပ်တွေ စိုနေရင် သေချာခြောက်အောင်လှမ်းပြီးမှ ပြန်ဝတ်ပါ။
ဖိနပ်အစိုကြီးကိုပဲ ထပ်မစီးပါနဲ့။ တခြားဖိနပ်ရှိတယ်ဆို အလဲအလှယ်လုပ်ပြီးစီးပါ။
အကောင်းဆုံးကတော့ မိုးတွင်းထဲမှာဆိုရင် ဂျပန်ဖိနပ်လို မိုးတွင်းစီးဖိနပ်လိုမျိုးတွေ စီးပါ။
ဒါမှ ဖိနပ်မှာ ရေစိမ့်မဝင်ဘဲ မြန်မြန်ပြန်ပြီး ခြောက်နိုင်တာပါ။
အရေးကြီးဆုံးအချက်ကတော့ ဝဲဖြစ်စေ၊ သဲဝဲဖြစ်စေ ဖြစ်လာတဲ့အခါ မိမိစိတ်ကူးပေါက်ရာ သို့မဟုတ် သူများညွှန်ရာဆေးတွေ လျှောက်လိမ်းတာမျိုးထက် နားလည်တတ်ကျွမ်းတဲ့ ဆရာဝန်တစ်ယောက်နဲ့ ပြသတိုင်ပင်ပြီးမှ စနစ်တကျ ကုသဖို့ပဲဖြစ်ပါတယ်။
Author: Dr. CST
