အရေပြားတွင် အရေးအကြောင်းများပေါ်ပေါက်ခြင်း၊ အရေပြားလျော့တွဲလာခြင်း စတဲ့ အိုမင်းရင့်ရော်မှုကိုပြတဲ့လက္ခဏာတွေဟာ လူတိုင်း တစ်နေ့နေ့တစ်ချိန်ချိန် ကြုံတွေ့ကြရမယ့် ရှောင်လွှဲမရနိုင်တဲ့ အရာများ ဖြစ်ကြပါတယ်။
အိုမင်းရင့်ရော်မှုကိုပြတဲ့ လက္ခဏာတွေ စတင်မပေါ်ပေါက်မီအချိန်မှာ အရေပြားကို အားဖြည့်ထိန်းသိမ်းပြီး ကာကွယ်မှုများပြုလုပ်ထားခြင်းဟာ ငယ်ရွယ်နုပျိုမှုကို ကြာရှည်ထိန်းသိမ်းထားနိုင်တဲ့ အကောင်းဆုံးနည်းလမ်းတစ်ခုလည်း ဖြစ်ပါတယ်။
အသက်အရွယ်ကြီးရင့်လာတာနဲ့အမျှ Collagen နဲ့ Elastin ပရိုတင်းများ ထုတ်လုပ်မှုလျော့နည်းလာခြင်းကြောင့်လည်းကောင်း၊ မျက်နှာမှာရှိတဲ့ အဆီများ ဆုံးရှုံးလာခြင်းနဲ့ မညီမညာပျံ့နှံ့ခြင်းများကြောင့်လည်းကောင်း၊ မျက်နှာတွင်ရှိသော ကြွက်သားများ တဖြည်းဖြည်း အားနည်းယုတ်လျော့လာမှုကြောင့် လည်းကောင်း အရေပြားရဲ့တင်းရင်းမှုများ ကျဆင်းလာတတ်ပါတယ်။
Collagen နဲ့ Elastin ပရိုတင်းများဟာ အရေပြားကို ချောမွေ့တင်းရင်းစေပြီး အရေးအကြောင်းများ ကင်းစင်စေဖို့အတွက် ထိန်းသိမ်းပေးနိုင်တဲ့ ဂုဏ်သတ္တိရှိပါတယ်။
နှစ်ပေါင်းများစွာကြာအောင် နေရောင်ခြည်နဲ့ ထိတွေ့ပျက်စီးမှုများကြောင့်သော်လည်းကောင်း၊
ပတ်ဝန်းကျင်မှာရှိတဲ့ အညစ်အကြေးများနဲ့ထိတွေ့မှုကြောင့်သော်လည်းကောင်း၊
နေထိုင်မှုဆိုင်ရာ အလေ့အကျင့်မမှန်မှုများကြောင့် လည်းကောင်း၊
အသက်အရွယ်ကြီးရင့်လာမှုများကြောင့်လည်းကောင်း စတဲ့ အကြောင်းရင်းများကြောင့် Collagen နှင့် Elastin ပရိုတင်းများဟာ မျက်နှာတစ်ဝိုက်မှာ ပြိုကွဲပျက်စီးသွားတတ်ကြပါတယ်။
အသက်အရွယ်ကြီးရင့်လာခြင်းကို ပြန်လည်ငယ်ရွယ်အောင် ပြုလုပ်ဖို့ မဖြစ်နိုင်ပေမယ့် အသက်အရွယ်ကြီးရင့်မှုကြောင့် ဖြစ်ပေါ်လာတဲ့ အိုမင်းရင့်ရော်မှုရဲ့ လက္ခဏာများကိုတော့ နှေးကွေးသွားအောင် လုပ်ဆောင်နိုင်တဲ့ နည်းလမ်းများစွာရှိပါတယ်။
ရှားစောင်းလက်ပပ်
ရှားစောင်းလက်ပပ်ဟာ အရေပြားလျော့တွဲခြင်းကို တင်းရင်းစေတဲ့ အကောင်းဆုံး ပစ္စည်းတစ်ခုဖြစ်ပါတယ်။ ရှားစောင်းလက်ပပ်မှာပါဝင်တဲ့ Malic Acid ဟာ အရေပြားရဲ့ ရုန်းပြန်မှုကို တိုးတက်စေပြီး အရေပြားလျော့တွဲခြင်းကို ပျောက်ကင်းသက်သာစေပါတယ်။ ဒါ့ပြင် ရှားစောင်းလက်ပပ်ဟာ အရေပြားကို ရေဓာတ်ဖြည့်တင်းပေးတဲ့သဘာဝ ပစ္စည်းတစ်ခုလည်းဖြစ်ပါတယ်။ ရှားစောင်းလက်ပပ်မှ အနှစ်များကိုထုတ်ယူကာ မျက်နှာနှင့် လည်ပင်းတွင် လိမ်းကျံကာ ၁၅ မိနစ် မိနစ် ၂၀ ခန့်ထားပြီး မျက်နှာသစ်နိုင်ပါတယ်။ သီတင်းပတ်တစ်ပတ်လျှင် အကြိမ်ပေါင်းမြောက်များစွာ ပြုလုပ်ပေးနိုင်ပါတယ်။
သံပရာသီး
သံပုရာသီးတွင် ပါဝင်သော ဗီတာမင် C ဟာ Collagen ထုတ်မှုကိုတိုးတက်စေပြီး အရေပြားရဲ့ တင်းရင်းမှုကို ကောင်းမွန်စေပါတယ်။ ဒါ့ပြင် သံပုရာသီးဟာ အရေပြားကို ကျုံ့စေနိုင်သော အစွမ်းသတ္တိရှိတာကြောင့် အရေပြားကို တင်းရင်းစေပြီး အရေးအကြောင်းများကို သက်သာစေပါတယ်။ သံပရာရည်ကို မျက်နှာနဲ့ လည်ပင်းတို့အပေါ်တွင် ဖြည်းညင်းစွာပွတ်လိမ်းပါ။ ၅ မိနစ် ၁၀ မိနစ် ခန့်ထားပေးပြီး နောက်တွင် ရေဖြင့် ဆေးချပါ။ တစ်နေ့လျှင် ၂ ကြိမ် ၃ ကြိမ်အထိ ပြုလုပ်နိုင်ပါတယ်။
သခွားသီး
သခွားသီးဟာ အရေပြားလျော့တွဲမှုကို သက်သာစေတဲ့ သဘာဝ Toner တစ်ခုဖြစ်ပါတယ်။ဒါ့အပြင် အရေပြားကို ပြန်လည်လန်းဆန်းစေတဲ့အပြင် အားအင်လည်း ပြန်လည်ဖြည့်တင်းပေးပါတယ်။ သခွားသီး တစ်ဝက်ခန့်ကို ကြိတ်၍ အရည်ညှစ်ပြီးနောက် အရည်ကို မျက်နှာပေါ်တွင် လိမ်းကျံ၍ ခြောက်သွေ့အောင်ထားပါ။ ပြီးမှ ရေအေးဖြင့် ဆေးချပါ။ တစ်နေ့တစ်ကြိမ် နေ့စဉ် ပြုလုပ်ပေးနိုင်ပါတယ်။
ပျားရည်
ပျားရည်ဟာ အရေပြားလျော့တွဲခြင်းကို ကာကွယ်ပေးနိုင်တဲ့ သဘာဝရေဓာတ်ဖြည့်တင်းပေးသော အရာဖြစ်ပါတယ်။ ဓာတ်တိုးဆန့်ကျင်ဂုဏ်သတ္တိများနဲ့ အိုမင်းရင့်ရော်မှုကို တားဆီးပေးနိုင်တဲ့ အစွမ်းသတ္တိများရှိပါတယ်။ ပျားရည် လက်ဖက်ရည်ဇွန်း ၂ ဇွန်း ၃ ဇွန်းထဲကို သံပရာသီးနဲ့ သံလွင်ဆီ အစက်အနည်းငယ်ရောပါ။ ထို့နောက် မျက်နှာ၊ လည်ပင်းတို့ကို လိမ်းကျံပြီးခြောက်သွေ့အောင် ထားရှိပြီးနောက်ရေနွေးဖြင့် ဆေးချပါ။ တစ်ပတ်လျှင် တစ်ကြိမ်မှ နှစ်ကြိမ်ခန့်အထိ ပြုလုပ်ပေးနိုင်ပါတယ်။
အဆီဖြင့် နှိပ်နယ်ခြင်း
မျက်နှာနဲ့ လည်ပင်းကို သံလွင်ဆီကဲ့သို့သော အဆီတစ်မျိုးမျိုးဖြင့် လိမ်းကျံနှိပ်နယ်ပေးခြင်းအားဖြင့် အရေပြားကို ချောမွေ့စေတဲ့အပြင် တင်းရင်းလှပစေပါတယ်။ သံလွင်ဆီတွင် ဗီတာမင် A ၊ ဗီတာမင် E ကဲ့သို့သော အိုမင်းရင့်ရော်မှုရဲ့ လက္ခဏာများကို ကာကွယ်ပေးနိုင်သောဓာတ်တိုးဆန့်ကျင်ပစ္စည်းများ ပါဝင်ပါတယ်။
Author: Dr. မိုး (ဆေး ၁)
