ဝက်ခြံဆိုတဲ့ စကားလုံးကြားလိုက်ရင် အလှဖျက်တဲ့ အဖု၊ ယောင်ယမ်းနေတဲ့ အနာ၊ ဝက်ခြံကြောင့်ဖြစ်တဲ့ အမာရွတ်၊ အမည်းစက်တွေကို စဉ်းစားမိကြပါလိမ့်မယ်။ ဒီလိုအလှဖျက်တဲ့ စိတ်ညစ်စရာ ဝက်ခြံဟာ အသားအရေထိန်းသိမ်းမှုတွေ လုပ်နေပေမယ့်ဘာကြောင့်ဖြစ်ရပါသလဲ? မျိုးရိုးဗီဇ၊ ဟော်မုန်းမညီမျှခြင်း၊ ချွေးပေါက်ပိတ်ခြင်း၊ ဘက်တီးရီးယားပိုးနှင့် မှိုပိုးဝင်ခြင်းဆိုတဲ့ အကြောင်းအရင်းတွေအပါ အခြားအကြောင်းအရင်းများ mutifactorial စုဆုံပြီး ဝက်ခြံပေါက်ခြင်း ဖြစ်လာပါတယ်။
မျက်နှာအရေပြားရှိ ချွေးပေါက်များကို အဆီ၊ချွေး၊ ဖုန်နှင့်အညစ်အကြေးများပိတ်ဆို့ခြင်းဟာ ဝက်ခြံကို ဖြစ်စေနိုင်ပါတယ်။ ဒါ့ကြောင့် ချွေးပေါက်များ ပိတ်ဆို့စေနိုင်တဲ့ မိတ်ကပ်၊ သနပ်ခါး ထူထူလိမ်းခြယ်ခြင်း မပြုဘဲ တစ်နေကုန် ကပ်ငြိနေတဲ့ သနပ်ခါး၊ မိတ်ကပ်၊ ဖုန်၊ ဘက်တီးရီးယားပိုးမွှား၊ အညစ်အကြေးတွေကို နေ့စဉ်သေချာသန့်စင်ပေးရန် လိုအပ်ပါတယ်။ မျက်နှာအရေပြား ချွေးပေါက်များထိ သန့်စင်ပေးတဲ့ double cleansing ခေါ် အဆင့်နှစ်မျိုးဖြင့် သေသေချာချာ သန့်စင်ပေးခြင်းကို ပုံမှန်ပြုလုပ်ရပါမယ်။
နေ့ခင်းဖက်မှာ နေရောင်ခြည်ဒါဏ်နဲ့ ထိတွေ့မှုကြောင့် အသားအရေ ပျက်စီးပြီး ဝက်ခြံထွက်ခြင်းကို ဖြစ်စေနိုင်ပါတယ်။ ဒါ့ကြောင့် ခရမ်းလွန်ရောင်ခြည်ဒါဏ်မှ ကာကွယ်ရန် sun protection factor SPF နှင့် ခရမ်းလွန်ရောင်ခြည် UVA rays များမှ ကာကွယ်ပေးသည့် PA++ ပါဝင်သော နေရောင်ကာလိမ်းဆေးများကို အိမ်မှာနေ့စဉ်ရော အပြင်မထွက်ခင်ပါ ဂရုတစိုက် လိမ်းပေးသင့်ပါတယ်။
မိမိမျက်နှာနှင့် ထိတွေ့ရတဲ့ မိုဘိုင်းဖုန်းမျက်နှာပြင် ခေါင်းအုံးစွပ်၊ မျက်နှာသုတ်ပုဝါ၊ မိတ်ကပ်လိမ်းခြယ်သောဖော့၊ စုတ်တံမျက်နှာပြင် သန့်ရှင်းမှုမရှိခြင်း၊ အိပ်ရေးဝအောင် အိပ်စက်မှုမရှိဘဲ ညည့်နက်အထိ အိပ်ရေးပျက်ခံနေခြင်း၊ ဆေးလိပ်သောက်ခြင်း၊ အရက်သောက်ခြင်းတို့ဟာ အသားအရေ ပျက်စီးပြီး ဝက်ခြံထွက်စေတဲ့ အလေ့အကျင့်ဆိုးများဖြစ်တာကြောင့် သတိပြုရပါမယ်။ ဝက်ခြံ၊ အဆီဖုများကို လက်ဖြင့်ကိုင်ခြင်း၊ ညှစ်ခြင်း၊ ကုတ်ဖဲ့ခြင်းဖြင့် ဝက်ခြံပိုးဝင် ယောင်ရမ်းပြီး ဝက်ခြံတွေပိုဖြစ်စေလို့ ရှောင်ကျဉ်ရပါမယ်။
လူကြီးတစ်ယောက်ရဲ့ တစ်နေ့တာ ဗီတာမင်စီ လိုအပ်ချက်ပမာဏဟာ ၉၀ မီလီဂရမ်ခန့် ရှိပါတယ်။ ဗီတာမင်စီဓါတ် ချို့တဲ့လျှင် အရေပြားခြောက်သွေ့ ကြမ်းတမ်းပျက်စီးပြီး ဝက်ခြံဖြစ်လွယ်တာကြောင့် ဗီတာမင်စီကြွယ်ဝတဲ့ ချဉ်သောအရသာရှိသည့် အသီးအနှံများ၊ ဖြည့်စွက်ဆေးများ ပုံမှန်မှီဝဲပေးသင့်ပါတယ်။ သကြားဓါတ်၊ အဆီဓါတ်၊ အငန်ဓါတ် ဆိုဒီယမ် လွန်ကဲသော အစားအစာများ ပြုပြင်ထားသော အသင့်စား အစားအစာများ၊ ပရိုတင်းအမှုန့်များ၊ နို့နှင့်နို့ထွက်ပစ္စည်းများ၊ အရက်၊ ဘီယာ၊ ကဖင်းဓါတ်များ အလွန်အကျွံ စားသုံးခြင်းကြောင့်လည်း ဝက်ခြံထွက်စေပါတယ်။
ဟော်မုန်းအပြောင်းအလဲဖြစ်တတ်သော ဆယ်ကျော်သက်အရွယ်၊ ကိုယ်ဝန်ဆောင်ကာလများနှင့် ဟော်မုန်းမညီမျှသော ရောဂါအခြေအနေများကြောင့်လည်း ဟော်မုန်းဝက်ခြံ ပေါက်တတ်ပါတယ်။ ညဖက်အိပ်ချိန်မမှန်ခြင်းနှင့် စိတ်ဖိစီးမှုများခြင်းတို့ဟာ ဝက်ခြံပေါက်ခြင်းကို တိုက်ရိုက်မဖြစ်စေသော်လည်း ဝက်ခြံကို ပိုဆိုးစေတဲ့အတွက် အသားအရေ ထိန်းသိမ်းမှုကို ဂရုစိုက်သကဲ့သို့ မိမိနေထိုင်မှုပုံစံ lifestyle ကိုလည်း သတိထား ဆင်ခြင်ခြင်းဖြင့် ဝက်ခြံပေါက်ခြင်းကို ကာကွယ်နိုင်ပါတယ်။ ဝက်ခြံပေါက်လာလျှင် မှန်ကန်သော ကုသနည်းများဖြင့် မကုသဘဲ ဆေးမြီးတိုများ၊ စတီးရွိုက်ပါဝင်သော အလှကုန်များ အသုံးပြုခြင်းကိုလည်း အထူးဆင်ခြင် သင့်ပါတယ်။
Author: Dr.Yee Mon
