ယနေ့ခေတ်မှာဆိုရင် ခေတ်မီသူတိုင်း ကော်လာဂျင်သောက်ကြတယ်လို့ဆိုရမလို ကော်လာဂျင် သောက်တဲ့သူတွေ အများကြီး ရှိနေပါပြီ။ အသက်ရလာတာနဲ့ အကြောင်းအမျိုးမျိုးကြောင့် ခန္ဓာကိုယ်က ကော်လာဂျင်ထုတ်လုပ်မှု လျော့နည်းလာတာကို ပြန်ဖြည့်တင်းပေးတဲ့အနေနဲ့ ကော်လာဂျင်ကို ဖြည့်စွက်ပြီး သောက်သင့်ပါတယ်။ ကော်လာဂျင်ကို သောက်ကြရာမှာ အလှအပရေးရာအတွက် သောက်ကြသလို ကျန်းမာရေးအတွက်လည်း (ဥပမာ- အရိုးအဆစ်တွေ သန်မာဖို့၊ ဒူးနာ၊ ခါးနာတာသက်သာဖို့) သောက်သုံးကြပါတယ်။
ကော်လာဂျင်သောက်ရာမှာ ထိရောက်မှုရှိစေဖို့…
ကော်လာဂျင်ကို ဘယ်အရွယ်မှာ စသောက်ရမလဲ ?
မနက်ပိုင်းသောက်ရမှာလား? ညမအိပ်ခင် သောက်ရမှာလား?
အကိုက်အခဲပျောက်ဆေးတွေလို အစာနဲ့တွဲသောက်ရမှာလား?
ပိုးသတ်ဆေးတွေသောက်သလို အစာနဲ့ဝေးဝေးသောက်မှ အာနိသင်ပိုရှိမှာလား?
ဘယ်အချိန်မှာ ဘယ်လိုသောက်တာက အကောင်းဆုံးဖြစ်မလဲ?
ဆိုတာက အတော်များများသိချင်ကြတာတွေ ဖြစ်သလို ဒွိဟအဖြစ်ရဆုံးအချက်တွေ ဆိုရင်လည်း မမှားပါဘူး။ ဒါကြောင့် ကော်လာဂျင်သောက်ဖို့ အကောင်းဆုံးအချိန်က ဘယ်အချိန်လဲဆိုတာ ဒီဆောင်းပါးလေးမှာ ပြောပြပေးသွားပါမယ်။
အမျိုးသားဖြစ်စေ အမျိုးသမီးဖြစ်စေ အသက်၂၅ နှစ်ကျော်လာတာနဲ့ ခန္ဓာကိုယ်မှာ ကော်လာဂျင်ဓါတ် ထုတ်နိုင်စွမ်းကျဆင်း လာတဲ့အတွက် အသက်ရလာတာနဲ့အမျှ ကော်လာဂျင်ကို ပြန်ဖြည့်တင်းပေးတဲ့အနေနဲ့ စတင်သောက်သုံးသင့်ပါတယ်။တကယ်တော့ ကော်လာဂျင်ကို တစ်နေ့တာရဲ့ ဘယ်အချိန်မှာမဆို သောက်လို့ရပါတယ်။ ဘယ်အချိန်မှာ ပိုသောက်သင့်သလဲ ဆိုတာကတော့ သောက်ရတဲ့ ရည်ရွယ်ချက်နဲ့ သက်ဆိုင်ပါတယ်။
• အိုမင်းရင့်ရော်မှုကို ကာကွယ်ဖို့နဲ့ ဆံပင်၊ လက်သည်းခြေသည်းနဲ့ အသားအရေ လှပဖို့အတွက် သောက်တာဆိုရင် မနက်ပိုင်းမှာ သောက်တာအကောင်းဆုံးပါ။ မနက်ပိုင်းမှာ သောက်တာက အသားအရေကို တင်းရင်းစေသလို ခြေသည်းလက်သည်းတွေ သန်မာစေပါတယ်။
• ကော်လာဂျင်ရဲ့ သုံးပုံတစ်ပုံခန့်ဟာ glycine ဆိုတဲ့ ပရိုတင်းတွေပါ။ Glycine တွေက ကြွက်သားတည်ဆောက်မှုအတွက် အထောက်အကူဖြစ်သလို အဆစ်နာတာတွေကိုလည်း သက်သာစေပါတယ်။ ဒါကြောင့် တစ်နေ့တာလုံး ပင်ပန်းနွမ်းနယ်မှုတွေ သက်သာဖို့၊ အသားအရေ ယောင်ရမ်းပျက်စီးတာတွေ ပြန်ကောင်းဖို့ဆိုရင်တော့ ကော်လာဂျင်ကို ညဘက်သောက်တာ အကောင်းဆုံးပါ။ ကော်လာဂျင်မှာပါတဲ့ gelatin နဲ့ amino acids တွေက အူနံရံတွေကို ချောမွေ့စေပြီး အစာခြေစနစ်ပိုမိုကောင်းမွန်အောင် အထောက်အကူပေးတဲ့အပြင် ညဘက်ကောင်းစွာ အိပ်ပျော်စေလို့ အင်အားအပြည့်နဲ့ လန်းဆန်းစွာ နိုးထလာစေမှာပါ။
• ခန္ဓာကိုယ်ရဲ့ ဇီဝကမ္မလုပ်ဆောင်မှုများအရ အမိုင်နိုအက်ဆစ်နှင့် အခြားဇီဝလုပ်ဆောင်မှုများ ကောင်းစွာပြန်လည် ဖြည့်တင်းလုပ်ဆောင်ပေးသော recovery အချိန်ဖြစ်တဲ့ ညဖက်တွင် ကော်လာဂျင်ကို မှီဝဲသင့်တယ်လို့ အချို့ကယူဆကြပါတယ်။
• အစာနဲ့ တွဲသောက်ရမှာလား?
ကော်လာဂျင်ဟာ အစာနဲ့တွဲသောက်လို့ ရသလို့ အစာမပါဘဲလည်း သောက်လို့ရတဲ့ ဖြည့်စွက်အာဟာရ ဖြစ်ပါတယ်။ ဒါပေမယ့် အစာအိမ်ထဲမှာ အစာတွေပြည့်နေရင် အစာခြေအက်ဆစ်တွေရဲ့ ချေဖျက်မှုကြောင့် ကော်လာဂျင်ရဲ့အာနိသင် လျော့နည်းသွားနိုင်ပါတယ်။ ဒါကြောင့် ကော်လာဂျင်ကို အစာနဲ့ဝေးတဲ့အချိန် ဒါမှမဟုတ် အအေး၊ ကော်ဖီလို သောက်စရာတစ်ခုခုနဲ့သာ တွဲဖက်သောက်သုံးသင့်ပါတယ်။
ကော်လာဂျင်ကို ဖြည့်စွက်သောက်သုံးတဲ့အခါ လိုချင်တဲ့ အာနိသင်ကို ပြည့်ပြည့်ဝဝရအောင် မနက်အိပ်ယာထချိန်၊ ညအိပ်ယာဝင်ချိန် စသည့် အစာနဲ့ဝေးတဲ့ အချိန်များမှာ မှန်ကန်စွာ မှီဝဲနိုင်ဖို့ မျှဝေပေးလိုက်ပါတယ်နော်။
Author: Dr.Yee Mon
