နမိုးနီးယားရောဂါဟာ ဆိုးဝါးပြင်းထန်တဲ့ အဆုတ်ရောင်ရောဂါတစ်ခုဖြစ်ပြီး သေနှုန်းမြင့်မားလှတဲ့ ရောဂါတစ်ခုလည်းဖြစ်ပါတယ်။နမိုးနီးယားရောဂါဟာ ဘက်တီးရီးယား ၊ ဗိုင်းရပ်စ် နှင့် မှိုပိုးများ ကူးစက်ခံရခြင်းကြောင့် ဖြစ်တတ်ပါတယ်။
ကူးစက်ခံရပုံကတော့ လေထဲမှတဆင့် ရောဂါပိုးများ ပါဝင်သော အမှုန်များကို ရှုမိခြင်းမှသော်လည်းကောင်း ၊ ရောဂါပိုး ကပ်ညှိနေသော ပစ္စည်းများကို ကိုင်တွယ်ထားသော လက်မှသော်လည်းကောင်း ကူးစက်နိုင်ပါတယ်။
နမိုးနီးယားရဲ့ ရောဂါ လက္ခဏာတွေကတော့
ချောင်းဆိုးခြင်း ( ချောင်းခြောက်လည်း ဖြစ်နိုင်သလို ဝါဖန့်ဖန့်ရောင် သို့မဟုတ် အစိမ်းဖျော့ရောင် ရှိသော သလိပ်ပါတာမျိုးလည်း ဖြစ်နိုင်တယ်။ တစ်ခါတစ်ရံ သွေးစ အနည်းငယ်ပါတာမျိုး ရှိတယ်။)
ချောင်းဆိုးတဲ့အခါ ဒါမှမဟုတ် အသက်ရှူတဲ့ အခါ ရင်ဘတ်အောင့်တာမျိုး ဖြစ်တတ်တယ်။
မောတာ ၊ အသက်ရှူ ကြပ်တာမျိုး ခံစားရနိုင်တယ်။
ဖျားတတ်တယ်။
ချမ်းတုန်တတ်တယ်။
တချို့မှာ ပျို့တာ ၊ အန်တာတွေ ၊ ဝမ်းသွားတာတွေ ရှိတတ်တယ်
နေမကောင်းသလို ခံစားရပြီး နူန်းချိနေတာမျိုးတွေ ရှိတယ်
ကလေးငယ်တွေမှာဆို နို့ကောင်းကောင်း မစို့တာ ၊ ဂျီတာ အီတာတွေ ရှိတယ်
အသက်ရှူတဲ့အခါ ရင်ဘတ်ကြွက်သား ချိုင့်ဝင်ရလောက်အောင် အားစိုက်ပြီး ရှူနေရတာမျိုး ၊ အသက်ရှူ မြန်တာမျိုးတွေ ရှိတယ်
ပြင်းထန်တဲ့ အဆင့်မှာဆို ကလေးက ဘာမှ မစားမသောက်တော့ဘဲ မှိန်းနေတာ ၊ တက်တာ ၊ သတိလစ်သွားတာတွေထိ ဖြစ်တတ်တယ်။
သက်ကြီးရွယ်အိုတွေမှာ ဖြစ်ရင် မဖျားဘဲ ခန္ဓာကိုယ်က အေးစက်နေတာမျိုးတွေ ရှိသလို
သတိကောင်းကောင်း မရှိတော့ဘဲ စကားတွေ ပြောချင်တာ လျှောက်ပြောနေတာမျိုးတွေ ရှိတတ်တယ်။
ကြွက်သားနာကျင်တာ ၊ ခေါင်းကိုက်တာတွေလည်း ခံစားရနိုင်တယ်။
နမိုးနီးယားရောဂါဟာ လူတိုင်းနီးပါးမှာ ဖြစ်နိုင်တယ်။ ဒါပေမယ့်
၂ နှစ်အောက် ကလေးငယ်တွေ
အသက် ၆၅ နှစ်အထက် သက်ကြီး ရွယ်အိုတွေ
ကိုယ်ခံအား မကောင်းတဲ့သူတွေ
ပန်းနာရင်ကြပ်ရောဂါလို အဆုတ်ရောဂါ တစ်ခုခု ရှိနေသူတွေ
နှလုံး ၊ ကျောက်ကပ် ၊ အသည်းရောဂါ ရှိသူတွေ
ဆေးလိပ်သောက်တတ်တဲ့သူတွေမှာ ဖြစ်ရင် အသက်အန္တရာယ် ဖြစ်နိုင်တဲ့ အထိ ဆိုးဝါးပြင်းထန်တတ်ပါတယ်။
နမိုးနီးယားရောဂါဟာ ပိုးသတ်ဆေး သောက်ခြင်း ၊ ထိုးခြင်းဖြင့် ကုသပျောက်ကင်းနိုင်ပါတယ်။ မိမိမှာ တကယ်လို့ အထက်ပါ ရောဂါ လက္ခဏာထဲက တစ်ခုခုကို ခံစားနေရရင် ဒီရောဂါမှန်း သိနိုင်အောင် သွေးစစ်ကြည့်တာ ၊ ဓာတ်မှန်ရိုက်တာမျိုးတွေ လုပ်သင့်ပါတယ်။
မကုသဘဲထားရင် နောက်ဆက်တွဲ ဆိုးကျိုးတွေ အနေနဲ့ သွေးဆိပ်တက်တာ ၊ အဆုတ် အလုပ်မလုပ်တော့တာတွေ ဖြစ်ပြီး အသက်အန္တရာယ် ရှိနိုင်တယ်။ အဆုတ်ထဲမှာ အနာဖြစ်တဲ့အတွက် ကောင်းကောင်း မကျက်ရင် အဆုတ်ပြည်တည်နာတွေ ဖြစ်တတ်တယ်။ အဆုတ်ထဲမှာ ရေဖုံးတာတွေလည်း ဖြစ်တတ်ပါတယ်။
နမိုးနီးယား ရောဂါကို ကာကွယ်ဖို့အတွက် နည်းလမ်းတွေ ရှိပါတယ်။ အဓိက က ကိုယ်ခံအား ကောင်းမွန်ဖို့နဲ့ ကျန်းမာစွာ နေထိုင်တတ်ဖို့ အရေးကြီးပါတယ်။ ကိုယ်ခံအား ကောင်းမွန်စေဖို့ ကလေးတွေမှာ အသက် ၆ လ အထိ မိခင်နို့ တစ်မျိုးတည်းကို ကောင်းစွာ တိုက်ကျွေးသင့်ပါတယ်။ ကိုယ်ခံအားကောင်းမွန်စေတဲ့ အစားအစာတွေ ဗိုက်တာမင်စီကြွယ်ဝစွာပါဝင်တဲ့ လတ်ဆတ်တဲ့ ဟင်းသီးဟင်းရွက် သစ်ဥသစ်ဖုတွေကို စားသုံးသင့်ပါတယ်။ အိပ်ချိန်ပြည့်အောင် အိပ်သင့်သလို ဗိုက်တာမင်စီပါဝင်တဲ့ အားဆေးတစ်ခုခုလည်း သောက်ပေးသင့်ပါတယ်။
နှာစေး ချောင်းဆိုးနေရင် လက်ကိုင်ပဝါကို အသုံးပြုတာ ၊ လက်ကို မကြာခဏ ဆေးကြောသန့်စင်တာမျိုး လုပ်သင့်တယ်။ ဆေးလိပ်သောက်တတ်ရင် ဖြတ်သင့်တယ်။ အရက်ကို ကြာရှည်စွာ သောက်သုံးတာကလည်း ကိုယ်ခံအား နည်းစေလို့ နမိုးနီးယား ဖြစ်လာနိုင်စေတယ်။ ဖြစ်နိုင်ရင် တုပ်ကွေးကာကွယ်ဆေးတွေ တခြား pneumococcal ကာကွယ်ဆေးလိုမျိုးတွေ ထိုးထားနိုင်ရင် ပိုကောင်းပါတယ်။
အားလုံး ကျန်းမာချမ်းသာပြီး ရောဂါ ဘယ ကင်းစင်ပါစေ ဆုတောင်းရင်း …..
Author : ရွက်သစ်
