ဒူးရင်းသီးကို အင်္ဂလိပ်လို Durian လို့ခေါ်သည်။ ဒူးရင်းသီးရဲ့ ရုက္ခဗေဒနာမည်မှာ Durio zibethinus ဖြစ်သည်။ ဒူးရင်းသီးနာမည်ဖြစ်လာပုံကတော့ ဗုဒ္ဓမြတ်စွာဘုရားလက်ထက်တော်တွင် ဒူရကနတ်သားသည် ဗုဒ္ဓကို သစ်သီးတစ်မျိုးဆက်ကပ်ခဲ့သည်။ ထိုသစ်သီးအမည်ကို ဒူရကနတ်သားအား အစွဲပြုပြီး ဒူရကသီးဟု ခေါ်ခဲ့ကြသည်။ ထိုသို့ခေါ်ဆိုရာမှ နှစ်ကာလတွေ ပြောင်းလဲလာသောအခါ ဒူရကသီးကနေ ဒူးရင်းသီးဖြစ်လာသည်။
ကျွန်တော်တို့ မြန်မာနိုင်ငံတွင် ထိုင်းဒူးရင်းသီး၊ မော်လမြိုင်ဒူးရင်းသီး၊ တောင်ငူဒူးရင်းသီးစသဖြင့် (၃)မျိုး အများအားဖြင့်တွေ့ရသည်။ ဘယ်ကလာသော ဘာဒူးရင်းသီးဖြစ်ဖြစ် ကျွန်တော်ကတော့ ဒူးရင်းသီးဆိုလျှင် အသေအလဲကြိုက်သည်။ ပက်ပက်စက်စက် စားသည်။
တချို့က ဒူးရင်းသီး ရဲ့ အနံ့ စူးစူးကြောင့် မကြိုက်ကြပါ။ ကျွန်တော့်လိုပဲ ဒူးရင်းသီးကြိုက်တဲ့သူတွေအတွက် ဒူးရင်းသီးရဲ့ကောင်းကျိုးဆိုးကျိုးလေးတွေကို သိအောင် ဒီတစ်ပါတ်မှာ ဒူးရင်းသီးအကြောင်း တင်ပြလိုပါတယ်။
ဒူးရင်းသီးဟာ ကယ်လိုရီပါဝင်မှုများတဲ့ အသီးပါ။ အကြမ်းအားဖြင့် အရွယ်တော် ဒူးရင်းသီးတစ်လုံးမှာ ကယ်လိုရီ ၈၀၀ကျော် ၉၀၀နီးပါး ပါပါတယ်။ ဒူးရင်းသီးမှာ ကိုလက်စထရောဓါတ်တော့ မပါပေမယ့်အဆီဓါတ်တော့ ပါဝင်မှုများပါတယ်။ တခြားပါဝင်တာတွေ အနေနဲ့ကတော့ အမျှင်ဓါတ်၊ ပရိုတင်းဓါတ်၊ ဗီတာမင်ဓါတ်၊ သံဓါတ်၊ သတ္ထုဓါတ်၊ ကယ်လ်ဆီယံဓါတ်၊ ကာဘိုဟိုက်ဒရိတ်ဓါတ် စသဖြင့် ပါပါတယ်။
ဒူးရင်းသီးကို ပုံမှန်ပမာဏစားသုံးခြင်းဖြင့် ရနိုင်တဲ့ အကျိုးကျေးဇူးတွေကတော့
၁။ ဒူးရင်းသီး ၁၀၀ ဂရမ်မှာ နေ့စဉ်လိုအပ်တဲ့ ကာဗွန်ဟိုက်ဒရိတ်ဓါတ် ၂၁% ပါဝင်သောကြောင့် နေ့စဉ်အလုပ်လုပ်ရန်အတွက်ခွန်အားတွေကို တိုးပွားစေပါတယ်။
၂။ ဒူးရင်းသီးစားခြင်းဖြင့် စိတ်ကျရောဂါဖြစ်နိုင်ခြေကို လျော့ကျစေနိုင်တယ်။
ဒီခေတ်မှာ အကြောင်းအမျိုးမျိုးကြောင့် အလိုလိုနေရင်းနဲ့ကို တစ်ခါတစ်လေ စိတ်ဓါတ်ကျနေတတ်ပါတယ်။ အဲဒီအတွက် ဒူးရင်းသီးက အကျိုးကျေးဇူးများပါတယ်။ ဒူးရင်းသီးမှာ ဗီတာမင်တွေ ကြွယ်ဝစွာပါလို့ စိတ်ကို လန်းဆန်းတက်ကြွစေပါတယ်။
၃။သွား နဲ့ အရိုး ကျန်းမာရေးကိုအထောက်အကူပြုပါတယ်။ ဒူးရင်းသီး မှာပါဝင်တဲ့ ကယ်လ်ဆီယမ် ဓါတ်ဟာ သွားနဲ့ အရိုးကို ကျန်းမာစေပါတယ်။
၄။ဗီတာမင်စီ ကြွယ်ဝသောကြောင့် ကိုယ်ခံအားကိုလည်း ကောင်းစေကာ ဖျားနာခြင်းမှ ကာကွယ်ပေးနိုင်ပါတယ်။
၅။အမျှင်ဓါတ်ကြွယ်ဝစွာပါလို့ အစာချေစနစ်ကို အထောက်အကူ ပေးရုံမက ဝမ်းမှန်စေပါတယ်။
၆။ သွေးသန့် စေရုံသာမက သွေးနီဥဆဲလ် များကို ထုတ်လုပ်ပေးပြီး၊ သံဓာတ်နှင့် ဖောလစ်အက်ဆစ်ပါဝင်မှု ကြွယ်ဝတဲ့အတွက် သွေးအားနည်းရောဂါကိုလည်း ကာကွယ်ပေးပါတယ်။
ဒါတွေကတော့ သိသလောက် ဒူးရင်းသီးရဲ့ ကောင်းကျိုးတွေပါ။ သို့သော် တန်ဆေးလွန်ဘေးဆိုတဲ့စကားအတိုင်း ဒူးရင်းသီးကို အလွန်အကျွံစားမိပါက အပူကန်တာ၊ လေပွတာ၊ အစာမကြေတာတွေဖြစ်နိုင်ပါတယ်။
နောက်ပြီး ဒူးရင်းသီးက အရက်၊ဘီယာ တို့ ကိုကာကိုလာ အချိုရည်တို့နဲ့လည်း မတည့်ပါဘူး။ ဝနေတဲ့သူတို့၊ ကိုယ်အလေးချိန်လျှော့ဖိုလိုတဲ့သူတွေတို့၊ ဆီးချိုရောဂါဝေဒနာရှင်တွေတို့ဆို ဒူးရင်းသီးမစားသင့်ပါဘူး။ ဒူးရင်းသီးဟာ အပူစာဖြစ်တဲ့အတွက် ဒူးရင်းသီးစားပြီးပါက မင်းကွတ်သီးကိုပါ စားပေးခြင်းဖြင့် ခန္ဓာကိုယ်တွင်းက အပူအအေးမျှတစေပါတယ်။
Author : Dr. 528
