ဆေးရဲ့ ဆိုးကျိုးများ (၁)
ဓာတ်မတည့်ခြင်း
လူတိုင်းနီးပါးဟာ သောက်ဆေး ထိုးဆေး လိမ်းဆေး အမျိုးမျိုးမှာ တစ်ခုမဟုတ်တစ်ခုကိုတော့ နေမကောင်းလို့ဖြစ်စေ အားဆေးအနေနဲ့ဖြစ်စေ ကြိုတင်ကာကွယ်တဲ့အနေနဲ့ဖြစ်စေ သုံးစွံဖူးကြမှာပါ ။
ဆေး လို့ဆိုလိုက်တာနဲ့ ဆေးတိုင်းမှာ ကောင်းကျိုးရှိသလို ဆိုးကျိုးလည်း ရှိပါတယ် ကောင်းကျိုးဆိုတာက ဆေးအာနိသင်အရ သုံးစွဲသူမှာ အကျိုးဖြစ်ထွန်းတာပါ ဒီဆေးကို သောက်သုံးလိုက်ခြင်းကြောင့် လူနာမှာ ခံစားနေရတဲ့ရောဂါဝေဒနာသက်သာတာ ပျောက်ကင်းသွားတာပါ ။
ဆိုးကျိုးလို့ ပြောရင်တော့ နှစ်ပိုင်းပါပါတယ် ဆေးမတည့်တာလား ဆေးရဲ့ဘေးထွက်ဆိုးကျိုးလား ဆိုတာ အမြဲပြန်ကြည့်ရပါတယ် ဘယ်ဆေးမဆိုမှာ ဒီဆိုးကျိုးတွေဖြစ်နိုင်တယ် ။
ဆေးမတည့်ဘူးလို့ပြောရင်တော့ ဆေးမှာပါဝင်တဲ့ပစ္စည်းတွေကို ဓာတ်မတည့်တာပါ ဆေးမတည့်တာက တစ်သမတ်တည်းတည်းတွက်လို့မရပါဘူး ပထမတစ်ခါသုံးစွဲတုန်းက ဘာမှမဖြစ်ဘဲ နောက်ပိုင်းတွေမှ ဓာတ်မတည့်တာတွေ ဖြစ်နိုင်တယ် သောက်ဆေးထိုးဆေးတွေမှာ အမျိုးအစားတစ်ခုကိုတည့်ပြီး နောက်အမျိုးအစားကိုမတည့်တာလည်း ဖြစ်နိုင်တယ် ။
ဆေးမတည့်တာက မျိုးရိုးလိုက်တာလည်းရှိသလို မိသားစုထဲမှာ တစ်ဦးတစ်ယောက်တည်းဖောက်ထွက်ပြီး ဓာတ်မတည့်တာလည်းဖြစ်နိုင်တယ် ။
ဆေးမတည့်တာ အများစုကတော့ ပိုးသတ်ဆေးတွေမှာဖြစ်တတ်ကြတယ် ပင်နီဆလင်အုပ်စုတွေ ဆာဖာလ်အုပ်စုတွေ စသဖြင့်ပါ ဘယ်ပိုးသတ်ဆေးမဆို ပေးတော့မယ်ဆိုတိုင်း ဆေးမတည့်တဲ့ ရာဇဝင်ရှိဖူးလားဆိုတဲ့ မေးခွန်းမေးဖို့လိုပါတယ် မေးခွန်းမေးပြီးတိုင်းဖြေတဲ့အဖြေကိုလည်း သေချာမှတ်သားဖို့လိုပါတယ် ။
ပိုးသတ်ဆေးသောက်ဆေးတွေပေးလိုက်တဲ့အခါ ဘယ်အမျိုးအစားပဲဖြစ်စေ တစ်လုံးသောက်ပြီး ဆေးမတည့်သလိုတွေဖြစ်လာတယ်ဆိုရင်ချက်ချင်းပြန်ပြဖို့ မှာလိုက်ရပါတယ် ထိုးဆေးဆိုလည်း ပထမဆုံးအကြိမ်ဆေးထိုးတဲ့အခါ အရင်ဆုံးဆေးပမာဏအနည်းငယ်ကို ဓာတ်တည့်ခြင်းရှိမရှိ စမ်းသပ်ပြီးမှ ထိုးရပါတယ် ။
ပိုးသတ်ဆေးမှမဟုတ်ပါဘူး အကိုက်အခဲပျောက်ဆေး သွေးကျဲဆေး အစာအိမ်ဆေး ချောင်းဆိုးပျောက်ဆေး စတာတွေမှာလည်း ဓာတ်မတည့်တာတွေဖြစ်နိုင်တယ် ယုတ်စွအဆုံးအားဆေးတွေမှာတောင်မှ ဆေးဓာတ်မတည့်တာဖြစ်နိုင်ပါတယ် တစ်ချို့တွေဆို ဆေးမတည့်တာမှာ သောက်ဖို့လိုတဲ့ ဘာမီတွန်လိုဆေးမျိုး စီထရင်းလိုဆေးမျိုးတွေနဲ့ ဓာတ်မတည့်တာလည်းဖြစ်တတ်ပါတယ် ။
လူနာတွေကဒီဆေးနဲ့ဖြင့်မတည့်ပါဘူးလို့ပြောလာရင် ဆေးမတည့်တာသေချာလားကို ပြန်မေးဖို့လိုပါတယ် ဒီဆေးမတည့်တာဘယ်လိုသိလဲတို့ ဆေးသောက်တုန်းက ဘာတွေခံစားရလဲ စသဖြင့်ပြန်မေးဖို့လိုပါတယ် ။
တစ်ချို့လူနာတွေက ဆေးတစ်ခုခုသောက်ပြီး နုန်းသွားတာပဲ လှုပ်ချင်စိတ်မရှိဘူး ခေါင်းမူးနေသလိုပဲ ဆေးမတည့်ဘူးထင်တယ်ဆိုပြီးပြောတတ်ကြတယ် သူတို့တွေစိတ်ထဲ ဒါမျိုးခံစားရတာတွေက ဆေးမတည့်တာလို့ ထင်တတ်ကြတယ် ဒီလိုမျိုးတွေဖြစ်တာက ဆေးမတည့်တာမဟုတ်ပါဘူး တစ်ခြားသောအကြောင်းတစ်ခုခုဖြစ်ဖို့များပါတယ် ။
ဆေးမတည့်တဲ့အခါ လူနာမှာဖြစ်နိုင်တဲ့ ရောဂါလက္ခဏာတွေက တစ်ကိုယ်လုံး အင်ပြင်တွေထွက်လာနိုင်တယ် တစ်ကိုယ်လုံးယားနိုင်တယ် မျက်နှာတွေယောင်တာ နီရဲတာတွေဖြစ်နိုင်တယ် ပိုဆိုးလာတဲ့အခါ အသက်ရှူကျပ်ပြီး တရွီှရွီှမြည်တာတွေ သွေးပေါင်ကျတာတွေ အထိ ဖြစ်နိုင်ပါတယ် ။
ဆေးမတည့်တဲ့အခါ သုံးစွဲနေတဲ့ ဆေးကို ချက်ချင်းရပ်လိုက်ဖို့အပြင် ဖြစ်တဲ့ လက္ခဏာအလိုက် အနှေးနဲ့အမြန်ကုသပေးဖို့ လိုအပ်ပါတယ် ။
Dr. CST
