ဆေးရဲ့ဆိုးကျိုးများ (၂)
ဘေးထွက်ဆိုးကျိုး
ဆေးတွေရဲ့ နောက်ထပ် ဆိုးကျိုးကတော့ ဘေးထွက်ဆိုးကျိုးပါ ဆေးတိုင်းမှာဘေးထွက်ဆိုးကျိုးဆိုတာရှိပါတယ် ဆေးတစ်မျိုးမျိုးပေးတော့မယ်ဆိုရင် ဒီဆေးက လူနာအတွက် ကောင်းကျိုးဆိုးကျိုး နှစ်မျိုးလုံးကိုပေးနိုင်ပါတယ် ။
ဆေးရဲ့ ဘေးထွက်ဆိုးကျိုးဆိုတာက ဆေးပမာဏ ဘယ်လောက်မှဖြစ်မယ်လို့ ကြိုမပြောထားပါဘူး ဆေးကိုကြာရှည်စွဲသောက်တဲ့သူတွေမှာတော့ ပိုဖြစ်နိုင်ပါတယ် ဒီလူနာမှာ ဒီဆေးပမာဏနဲ့ ဘေးထွက်ဆိုးကျိုးဖြစ်ပေမယ့် နောက်လူနာမှာ ဒီဆေးပမာဏမှာပဲ ဘေးထွက်ဆိုးကျိုးပေးချင်မှ ပေးမှာပါ ။ရောဂါတစ်မျိုးမျိုးအတွက် ဆေးပေးတယ်ဆိုရင် ဒီဆေးက ရောဂါကို အပြီးကောင်းစေတာလည်းဖြစ်နိုင်သလို ရောဂါကိုအခြေအနေမဆိုးအောင်ထိန်းပေးတာလည်းဖြစ်နိုင်တယ် ရောဂါကိုထိန်းပေးတာမျိုးဆိုရင်တော့ဆေးကိုကြာရှည်စွဲသုံးရဖို့ များပါလိမ့်မယ် ။
လူနာတစ်ယောက်ဟာ ဆေးတစ်မျိုးမျိုးကို အချိန်ကြာမြင့်စွာသုံးစွဲဖို့လိုလာပြီ ဆိုတာနဲ့ ဆေးရဲ့ ဘေးထွက်ဆိုးကျိုးဆိုတာတွေကို သိထားဖို့လည်း လိုလာပါတယ် ဘေးထွက်ဆိုးကျိုးသိထားရုံမျှမကဘူး ဘေးထွက်ဆိုးကျိုးကို သက်သာအောင်ဘာတွေလုပ်ဖို့လိုအပ်လဲဆိုတာကိုပါ သိထားဖို့ လိုအပ်လာပါတယ်။ဥပမာအားဖြင့် သွေးလေးဘက်နာရောဂါသည်တွေ SLE ရောဂါသည်တွေမှာ ပေးနေတဲ့ Methotrexate ဆေးတွေက ရိုးတွင်းခြင်ဆီကိုအားနည်းစေတယ် သွေးအားနည်းစေတယ် ဒီဆေးသောက်သုံးနေတုန်း ကလေးယူခွင့်မရှိဘူး စသဖြင့် သတ်မှတ်ချက်တွေရှိပါတယ် ။
အကိုက်အခဲပျောက်ဆေးတွေက လူနာတွေကို အဖျားကျစေတယ် ခေါင်းကိုက်တာကိုယ်လက်ကိုက်တာတွေကို သက်သာစေတယ် ဒါပေမယ့် အကိုက်အခဲပျောက်ဆေးတွေရဲ့ ဘေးထွက်ဆိုးကျိုးက အစာအိမ်ထိတတ်တဲ့အတွက် ဗိုက်အောင့်တတ်တယ် ပါရာစီတမောမဟုတ်တဲ့ တစ်ခြားသော အကိုက်အခဲပျောက်ဆေးတွေဆိုရင် သုံးစွဲတဲ့ ဆေးပမာဏများလာရင် ကျောက်ကပ်ထိခိုက်နိုင်တယ် ။
တီဘီဆေးတွေသောက်ရင် အကြားအာရုံထိခိုက်နိုင်တယ် အသည်းယောင်နိုင်တယ် အသည်းအင်ဇိုင်းတွေများလာတတ်တယ် ကျောက်ကပ်အားနည်းတာမျိုးရှိထားတယ်ဆို တီဘီဆေးတစ်မျိုးကိုကျောက်ကပ်က ကောင်းစွာမဖယ်ရှားနိုင်တာကြောင့် မျက်စိထိခိုက်နိုင်တယ် ဒါကြောင့် တီဘီဆေး မပေးခင်း အသည်းနဲ့ ကျောက်ကပ်အတွက် ကြိုတင်ပြီးစစ်ဆေးသင့်တာတွေ စစ်ဖို့လိုတယ် အမြင်အာရုံ အကြားအာရုံတွေ စစ်ဆေးထားဖို့လိုတယ် တီဘီဆေးသောက်ရင်းအာရုံကြောအားဆေးတွေ ထည့်သောက်ကြတယ် ဒါတွေကြောက်လို့ တီဘီဆေးမသောက်ဘူးဆိုရင်တော့ တီဘီကမပျောက်တဲ့အပြင် အဆုတ်လည်းထိခိုက်နိုင်တယ် အသက်လည်းဒုက္ခပေးတတ်တယ် တစ်ခြားသူတွေလည်းကူးနိုင်ပါတယ် ။
ကင်ဆာရောဂါကို ဆေးသွင်းကုသတဲ့အခါ ဆေးတွေကပြင်းပါတယ် ဆေးတွေသွင်းပြီးတိုင်း ကင်ဆာသက်သာလာတာနဲ့အမျှဆေးရဲ့ ဘေးထွက်ဆိုးကျိုးတွေရဲ့ဒဏ်တွေလည်း ခံစားရစေပါတယ် ဆံပင်ကျွတ်တာ သွေးတိုးစေတာ သွေးအားနည်းစေတာ စသဖြင့်အမျိုးမျိုးပါ ။လေဖြတ်ထားတဲ့လူနာတစ်ချို့ရယ် နှလုံးသွေးကြောဆိုင်ရာရောဂါသည်တွေမှာ သွေးကျဲဆေးတွေစွဲသောက်ဖို့လိုလာတတ်တယ် သွေးကျဲဆေးတွေကအစာအိမ်ထိနိုင်တယ် ခန္ဓာကိုယ်ထဲမှာ သွေးစိမ့်ထွက်တတ်တယ် အရေပြားမှာ အညိုအမည်းတွေ အလိုလိုဖြစ်လာတယ်တယ် ။
ပိုးသတ်ဆေးတွေမှာလည်း ဘေးထွက်ဆိုးကျိုးတွေရှိပါတယ် တစ်ချို့ဆေးတွေ ခြေလက်ထုံကျင်စေတတ်တယ် တစ်ချို့ဆေးတွေဝမ်းပျော့တတ်တယ် တစ်ချို့ဆေးတွေ ကျောက်ကပ်ထိခိုက်နိုင်တယ် တစ်ချို့ဆေးတွေကတော့ အရည်ကြည်ဖုတွေဖြစ်ပြီး အရေပြားပေါက်ပြဲလွယ်တယ် ။ဆေးတွေရဲ့ ဘေးထွက်ဆိုးကျိုးတွေမှာ အမှုမဲ့အမှတ်မဲ့ ထားလိုက်လို့ရတာတွေလည်းပါသလို အသက်ကို ချက်ချင်းထိခိုက်စေနိုင်တာတွေလည်း ပါပါတယ် ။
ဒီလို ဘေးထွက်ဆိုးကျိုးအမျိုးမျိုးရှိနေပေမယ့်လည်း တစ်ခါတစ်လေမှာတော့ လူနာအတွက်အကောင်းဆုံးဖြစ်မယ့်ဆေးကို ကောင်းကျိုးနဲ့ ဆိုးကျိုး ယှဉ်ပြီး ပေးနေကြရဦးမှာ ဖြစ်ပါတယ် ။
Dr. CST
