အိပ်စက်ခြင်းသည် လူတို့အတွက် ဇီ၀ကမ္မလိုအပ်ချက်ဖြစ်ပါသည်။
ထို့ပြင် ခုခံအားစနစ်ကို ကောင်းမွန်စေရန် ကူညီပေးသည့်အပြင် ခန္ဓာကိုယ်၏ အခြားရုပ်ပိုင်းဆိုင်ရာလက္ခဏာများ၊ စိတ်ပိုင်းဆိုင်ရာအခြေအနေများစွာတို့ကိုလည်း တိုးတက်ကောင်းမွန်စေရန်လည်း လုပ်ဆောင်ပေးပါသည်။
အိပ်စက်ခြင်းနှင့် ပတ်သက်လျှင် အိပ်ချိန်ပြည့်၀ရန်လိုအပ်သလို၊ နှစ်ခြိုက်စွာ အိပ်စက်နိုင်ရန်လည်း လိုအပ်ပါသည်။ ထို့ပြင် အိပ်ရာဝင်ပြီးမကြာမီမှာပင် ကောင်းစွာ အိပ်ပျော်ရန်လည်း အရေးကြီးပါသည်။
အချို့က အိပ်စက်ချိန် မလုံလောက်သည့် ပြဿနာကို ကြုံတွေ့နေရသည့်အချိန်တွင် အချို့ အိပ်ရာဝင်ချိန် မမှန်သည့် အခြေအနေနှင့် ရင်ဆိုင်နေရပါသည်။ အချို့မှာမူ အိပ်ရာဝင်ချိန်မှန်ကန်သော်လည်း ချက်ချင်း အိပ်မပျော်ဘဲ နှစ်ခြိုက်စွာ အိပ်ပျော်နိုင်ရန် အချိန်များစွာပေးနေရသည့် အခက်အခဲနှင့် တွေ့ကြုံနေရပါသည်။
ထို့ကြောင့် အိပ်ရာဝင်ပြီးသည်နှင့် လျင်မြန်စွာ အိပ်မောကျခြင်းကို ကူညီပေးနိုင်မည့် နည်းလမ်းများကို ဆွေးနွေးတင်ပြပေးပါမည်။ အပိုင်း (၁) တွင် အချက် (၉) ချက်ကို ဆွေးနွေးတင်ပြပြီးဖြစ်ပါသည်။ ယခုအပိုင်း (၂) တွင် နောက်ထပ် အချက် (၈) ချက်ကို ထပ်မံဆွေးနွေးတင်ပြပေးသွားပါမည်။
၁၀။ နေ့စဉ်လေ့ကျင့်ခန်းပြုလုပ်ပါ
နေ့စဉ်လေ့ကျင့်ခန်းများပြုလုပ်ခြင်းသည် ခန္ဓာကိုယ်ကိုပိုမိုကျန်းမာသန်စွမ်းစေပါသည်။ ထို့ပြင် ခန္ဓာကိုယ်၏ဇီဝဖြစ်စဉ်များအား ကောင်းမွန်စွာလည်ပတ်စေခြင်း၊ ခန္ဓာကိုယ်ရှိကြွက်သားများနှင့် အကြောအခြင်များအားလည်း ပြေလျော့စေကာ ညဘက်အိပ်စက်သည့်အခါ လျင်မြန်စွာအိပ်မောကျစေရန် အကူအညီပေးပါသည်။
၁၁။ နေ့ဘက်အချိန်တွင် သဘာဝအလင်းရောင်များနှင့်ထိတွေ့ပါ
ခန္ဓာကိုယ်တွင်နေ့ဘက်အချိန်နှင့် ညဘက်အချိန်ကို ခွဲခြားသိနိုင်စွမ်းသော သဘာဝနာရီပါရှိပါသည်။ ထိုနာရီ၏စေ့ဆော်ပေးမှုဖြင့် ညဘက်အချိန်တွင် အိပ်စက်ခြင်းကိုအထောက်အကူပြုအားပေးသည့် ဟော်မုန်းများထွက်လာစေရန် လုပ်ဆောင်ပေးပါသည်။ ထို့ကြောင့် သဘာဝအလင်းရောင် နေရာင်ခြည်များနှင့်ထိတွေ့ခြင်းသည်လည်း ခန္ဓာကိုယ်တွင်ရှိသော သဘာ၀နာရီကို နေ့ဘက်အချိန်နှင့် ညဘက်အချိန်ကိုခွဲခြားရာတွင် အထောက်အကူဖြစ်စေ၍ ညဘက်အချိန်တွင် အလျင်အမြန်နှစ်ခြိုက်စွာ အိပ်မောကျနိုင်စေရန်အထောက်အကူပေးပါသည်။
၁၂။ အိပ်ရာဘေးတွင် Note စာအုပ်ထားပါ
အိပ်ရာမဝင်ခင်တွင် မိမိဘဝ၏ကျေးဇူးတင်လိုသော အရာ ၃ ခုကိုချရေးပါ။ ထို့ပြင် မိမိဖြတ်သန်းခဲ့သော တစ်နေ့တာတွင် ပြုလုပ်ခဲ့သော ကောင်းမွန်သည့်အရာ ၃ ခုကိုချရေးပါ။ ထိုသို့ပြုလုပ်ခြင်းအားဖြင့် စိတ်ကြည်လင်ချမ်းမြေ့လာစေကာ အလျင်အမြန် အိပ်မောကျစေရန် အထောက်အကူပေးနိုင်ပါသည်။
၁၃။ အိပ်ရာမဝင်ခင် ၆ နာရီအတောအတွင်း ကော်ဖီကိုရှောင်ရှားပါ
ကော်ဖီကို လူအများစု နှစ်သက်ကြသော်လည်း လျင်မြန်စွာ အိပ်မောကျရန် လိုလားပါက မအိပ်စက်ခင် ၆ နာရီအတောအတွင်း ကော်ဖီကိုမသောက်ဘဲ ရှောင်ရှားရန်လိုအပ်ပါသည်။
၁၄။ စိုးရိမ်ပူပန်မှုများကို ပယ်ဖျောက်နိုင်အောင် ကြိုးစားပါ
တစ်ခါတစ်ရံ အိပ်ရာထဲသို့ဝင်ရောက်သည့်အချိန်တွင် ဟိုတွေးဒီတွေးဖြင့် အတွေးများလွန်နေကာ စိုးရိမ်ပူပန်စိတ်များပေါ်ပေါက်လာတတ်ပါသည်။
တကယ်တော့ အိပ်စက်သည့်အချိန်သည် စိုးရိမ်ပူပန်မှုများကို ဖြစ်ပေါ်စေရမည့်အချိန်မဟုတ်ပါ။ တစ်နေ့လျှင် ၈ နာရီ အိပ်စက်မည်ဆိုပါက စိုးရိမ်ပူပန်မှုများဖြစ်ရန် ၁၆ နာရီခန့် ကျန်ရှိပါသေးသည်။ ထို့ကြောင့် စိုးရိမ်ပူပန်မှုများဖြစ်မည်ဆိုပါက ထို ၁၆ နာရီတွင် ဖြစ်စေကာ အိပ်စက်သည့်အချိန် ၈ နာရီအတွင်းတွင်တော့ စိုးရိမ်ပူပန်မှုများမရှိအောင် ဂရုစိုက်သင့်ပါသည်။ ဤနည်းသည်လည်း လျင်မြန်စွာအိပ်မောကျစေရန်အတွက် အကူအညီပေးနိုင်သည့်နည်း တစ်ခုဖြစ်ပါသည်။
၁၅။ စာအုပ်ဖတ်ပါ
အိပ်ခါနီးအချိန်တွင် ပေါ့ပေါ့ပါးပါးစာအုပ်များကို ဖတ်ခြင်းသည်လည်း လျင်မြန်စွာအိပ်မောကျနိုင်စေရန်အထောက်အကူပြုပါသည်။
သို့ရာတွင် သတိပြုရမည်မှာ သည်းထိတ်ရင်ဖိုစွန့်စားခန်းစာအုပ်များ၊ ကြောက်စရာစာအုပ်များကို အိပ်ခါနီးအချိန်တွင် မဖတ်မိရန်လိုပါသည်။ သို့မဟုတ်ပါက ကြောက်ရွံ့ ထိတ်လန့်စိတ်ကြောင့်လည်းကောင်း၊ ဇာတ်လမ်းအဆုံးတွင် ဘာဖြစ်မည်ကိုသိချင်ဇောဖြင့် စာအုပ်ကို လက်ကမချနိုင်ဖြစ်ခြင်းကြောင့်လည်းကောင်း အိပ်စက်ခြင်းကို ပို၍ပင် အနှောင့်အယှက်ဖြစ်စေပါလိမ့်မည်။
၁၆။ ဝင်လေထွက်လေ မှတ်ပါ
တစ်ခါတစ်ရံ စိတ်ဖိစီးခြင်းနှင့် စိုးရိမ်ပူပန်စိတ်များကြောင့် အသက်ရှူမြန်လာတတ်ပါသည်။
ထိုအခါ မိမိ၏အသက်ရှူခြင်းကိုအာရုံစိုက်၍ ဝင်လေထွက်လေကို မှတ်ကာ ပုံမှန်အတိုင်း အသက်ကိုရှူနိုင်အောင် ကြိုးစားခြင်းဖြင့် ခန္ဓာကိုယ်အတွင်း Oxygen နှင့် Carbon dioxide ပမာဏကိုညီမျှစေသည့်အပြင် စိတ်တည်ငြိမ်မှုရစေ၍ လျင်မြန်စွာအိပ်မောကျစေပါသည်။
၁၇။ အခန်းအပူချိန်ကို လျော့ကျအောင် လုပ်ဆောင်ပါ။
လေ့လာတွေ့ရှိချက်များအရ အပူချိန်နိမ့်သောအခန်းတွင် အိပ်သောသူများသည် ပိုမို၍လျင်မြန်စွာအိပ်မောကျစေကြောင်း တွေ့ရှိရပါသည်။ ထို့ကြောင့် မိမိအိပ်စက်မည့် အခန်း၏အပူချိန်ကို ပုံမှန်ထက်အနည်းငယ်လျော့နည်းစေရန် ပြုလုပ်ဆောင်ရွက်သင့်ပါသည်။
အထက်ပါနည်းလမ်းများကို သင့်တော်သလို အသုံးပြုခြင်းအားဖြင့် လျင်မြန်စွာ အိပ်မောကျကာ အိပ်မက်လှလှမက်ပါစေကြောင်း ဆုမွန်ကောင်းတောင်းပေးအပ်ပါသည်။
Dr. မွန်
