ဆောင်းရာသီမှာ ကိုယ်ဝန်ဆောင်မေမေတို့ ကျန်းမာအောင် ဘယ်လိုနေထိုင်လဲ

ဆောင်းရာသီဟာ ​အေးမြ​ခြောက်​သွေ့တဲ့ရာသီဖြစ်တာ​ကြောင့် အ​အေးမိဖျားနာတာ​တွေအဖြစ်များတဲ့ကာလပဲဖြစ်ပါတယ်။ ကိုယ်ဝန်​ဆောင်​​မေ​မေတို့ဟာ ဝမ်းဗိုက်ထဲမှာက​လေး​လေးကိုထမ်းပိုးထားရတဲ့အတွက် ​မေ​မေ​တို့ကအခြားသူ​တွေထက်ကိုယ်ခံအား​လျော့နည်း​နေ​လေ့ရှိပါတယ်။ ​ကိုယ်ခံအား​လျော့နည်း​နေချိန်ဆိုရင် ​ရောဂါပိုးမွှား​တွေဟာဝင်​ရောက်ဖို့လွယ်ကူ​နေပါတယ်။ ဒါ​ကြောင့် ​အ​အေးမိဖျားနာ​တွေအဖြစ်များတဲ့ ​ဆောင်းရာသီမှာ​မေ​မေတို့ဆီကို ​ရောဂါပိုးမွှား​တွေမကူးစက်နိုင်​​အောင် ကိုယ်ခံအား​တွေပြည့်ဝ​နေဖို့လိုအပ်ပါတယ်။ ​မေ​မေတို့ ကိုယ်ခံအားမြင့်တက်ပြီးကျန်းမာ​နေဖို့ ဘယ်လို​မျိုးနေထိုင်ရမလဲဆိုတာကို ​ဆက်လက်ဖတ်ကြည့်ကြပါမယ်။

အစာအာဟာရပြည့်ဝအောင် စားသုံးပါ

ကိုယ်ခံအားမြင့်တက်​စေဖို့ အာဟာရပြည့်ဝစွာစားသုံးခြင်းက အ​ရေးကြီးဆုံးဖြစ်ပါတယ်။ အစာအုပ်စု၃အုပ်စုကို မျှတ​အောင်စား​ပေးရပါမယ်။ ပရိုတင်းဓာတ်ရရှိ​စေမယ့် အသား၊ငါး၊ နို့နဲ့နို့ထွက်ပစ္စည်း၊ကြက်ဥ၊ ပဲအမျိုးမျိုးတို့အပြင် ဗီတာမင်ကြွယ်ဝစွာပါဝင်တဲ့ အသီးအနှံများ(လိ​မ္မော်သီး၊ ငှက်​ပျောသီး၊ ပန်းသီး)နှင့် အသီးအရွက်များ (ဟင်းနုနွယ်၊ ဆလတ်ရွက်၊ ပန်း​ဂေါ်ဖီ) စတာ​တွေဟာ ​​ရောဂါပိုးမွှား​တွေတိုက်ထုတ်နိုင်ဖို့အ​ထောက်အကူဖြစ်​စေပါတယ်။ ဒီအစားအစာ​တွေကို ​မေ​မေတို့က နေ့စဥ်မျှတစုံလင်​​အောင် စားသုံး​ပေးရမှာဖြစ်ပါတယ်။ က​လေးရဲ့ဦး​​နှောက်ဖွံ့ဖြိုးမှုအတွက်အ​ရေးပါတဲ့ အိုင်အိုဒင်းဓာတ်ရရှိ​အောင် ပင်လယ်စာ၊ ဥနဲ့ အိုင်အိုဒင်းဆား​တွေကိုလည်း သင့်တင့်သ​လောက်စားသုံး​ပေးသင့်ပါတယ်။

ရေများများသောက်ပါ

နွေရာသီလိုပူပြင်းတဲ့ရာသီဥတုမျိုးဆိုရင် ​ရေမကြာခဏ​သောက်တတ်ကြ​ပေမဲ့ အေးမြတဲ့ဆောင်းရာသီမှာ​တော့ ​ရေ​များများသောက်ဖို့​မေ့​လျော့​နေတတ်ကြပါတယ်။ ဆောင်းရာသီမှာဆိုရင် ခြောက်သွေ့တဲ့လေ​ကြောင့် ခန္ဓာကိုယ်ကရေဓာတ်ပိုမိုပိုလိုအပ်တာဖြစ်လို့ ​တစ်ရင်ကိုရေ ၃ဖန်ခွက်ခန့်သောက်သုံး​ပေးရပါမယ်။ ​ရေဓာတ်ပြည့်ဝပြီး​ကျန်းမာနေတဲ့ခန္ဓာကိုယ်ကသာ ရောဂါပိုး​တွေကိုတိုက်ထုတ်နိုင်မှာဖြစ်ပါတယ်။ ဒါ့ပြင် ဂတ်စ်ပါဝင်မှုများတဲ့အဖျော်ယမကာ​တွေကို​ ရှောင်ကြဥ်သင့်ပါတယ်။ အဲဒါတွေအစား ​စွပ်ပြုတ်ရည် ဒါမှမဟုတ် လတ်ဆတ်တဲ့သစ်သီးဖျော်ရည်တွေလိုမျိုး ကျန်းမာရေးနဲ့ညီညွတ်တဲ့ ​သောက်စရာ​လေး​တွေကို ​မေ​မေတို့​ရွေးချယ်​သောက်သုံးသင့်ပါတယ်။

တက်ကြွစွာ​နေပါ

အေးမြတဲ့ရာသီဥတုဟာ ​မေ​မေတို့ကို​လေးလံထိုင်းမှိုင်း​စေပါတယ်။ ဒါ​ပေမဲ့ ​ဗိုက်ထဲမှာရှိတဲ့က​လေး​လေး​ နွေး​ထွေးစွာ​နေထိုင်နိုင်ဖို့အတွက် ​မေ​မေတို့ကတက်ကြွလှုပ်ရှား​ပေး​နေဖို့လိုပါတယ်။ လမ်းလျှောက်ခြင်း၊ ​ယောဂကျင့်ခြင်းစတာ​လေး​တွေဆိုရင် အိမ်ထဲမှာဘဲအလွယ်တကူလုပ်​ဆောင်​ပေးလို့ရပါတယ်။ ​​မေ​မေတို့ချော်လဲနိုင်ပြီးထိခိုက်ဒဏ်ရာရ​စေနိုင်တဲ့ ​ခက်ခဲတဲ့လေ့ကျင့်ခန်းမျိုး​တွေကို​တော့ ​ရှောင်ကြဥ်ရမှာဖြစ်ပါတယ်။ ကိုယ်လက်လှုပ်ရှားမှုပြုလုပ်ခြင်းက ကိုယ်ဝန်​ဆောင်ချိန်ကြုံ​တွေ့ရတတ်တဲ့နာကျင်ကိုက်ခဲမှု​တွေကိုလည်း သက်သာ​စေနိုင်ပါတယ်။ လေ့ကျင့်ခန်း​နေ့စဥ်ပုံမှန်ပြုလုပ်ခြင်းဟာ ကျန်းမာရေးအကျိုးကျေးဇူးများစွာတွေရရှိတဲ့အပြင် ​မေ​မေတို့ရဲ့ကိုယ်ခံအားစနစ်ကိုလည်း မြင့်တက်စေပါတယ်။

နွေးနွေးထွေးထွေးနေပါ

ဆောင်း​တွင်းအလွန်​အေး​နေတဲ့အချိန်မှာ ​မေ​မေတို့အလုပ်ကိစ္စနဲ့အပြင်ထွက်​တော့မယ်ဆိုရင် ​နွေး​ထွေးလုံခြုံစွာဝတ်စားသွားဖို့လိုအပ်ပါတယ်။ အ​ရမ်း​အေးလွန်းတဲ့​ဒေသ​တွေမှာဆိုရင် အ​အေးဒဏ်ခံနိုင်မယ့် အ​နွေးထည်၊ ဦးထုပ်၊ ​ဘောင်းဘီရှည်စသဖြင့်​နွေး​နွေး​ထွေး​ထွေး ဝတ်ဆင်ရပါမယ်။ ​မေ​မေ​တို့အ​​နေနဲ့ အရမ်း​အေးတဲ့အချိန် အပြင်မှာအကြာကြီးအချိန်ဖြုန်းတာမျိုးကို ​ရှောင်ကြဥ်ရပါမယ်။ ​စိုထိုင်း​တဲ့ရာသီဥတု​ကြောင့် ​စိုစွတ်​နေတဲ့မြေပြင်မှာလမ်း​လျှောက်ရင်လည်း ​ချော်လဲမကျ​အောင်သတိထားရပါမယ်။

တုပ်ကွေးကာကွယ်ဆေးထိုးထားပါ

ဆောင်းတွင်းမှာဆိုရင် ​မိမိတို့ပတ်ဝန်းကျင်မှာ ဖျားနာ၊​ချောင်းဆိုး၊ တုပ်​ကွေးဖြစ်​နေသူ​တွေများစွာရှိ​နေတတ်ပါတယ်။ ​ထိုသူ​တွေဆီကတစ်ဆင့် မေ​မေတို့ဆီကို တုပ်​ရောဂါပိုး​တွေမကူးစက်လာ​အောင် တုပ်​ကွေးကာကွယ်​ဆေးထိုးထားသင့်ပါတယ်။ တုပ်​ကွေးကူးစက်ခံရရင် ​မေ​မေ​မေတို့​နေထိုင်မ​ကောင်းဖြစ်သလို က​လေး​​လေးအတွက် ​နောက်ဆက်တွဲကျန်းမာ​ရေးပြဿနာ​တွေလည်း ဖြစ်​ပေါ်လာနိုင်ပါတယ်။

သန့်ရှင်းစွာ​နေထိုင်ပါ

​ရောဂါပိုးမွှား​တွေအလွယ်တကူမဝင်​ရောက်လာနိုင်​စေဖို့ တစ်ကိုယ်ရည်သန့်ရှင်းမှုကလည်း အလွန်​အ​ရေးပါပါတယ်။ လက်ကိုမကြာခဏ​ဆေးခြင်း၊ ​ရေပုံမှန်ချိုးခြင်းတို့အပြင် မိမိသုံး​နေကျအသုံးအ​ဆောင်ပစ္စည်း​တွေကို အခါအား​လျော်စွာ သန့်ရှင်း​ပေးရပါမယ်။ သန့်ရှင်းစွာ​နေထိုင်ခြင်းက ​​ရောဂါပိုး​တွေကင်း​ဝေး​စေသလို စိတ်ကိုကြည်လင်လန်းဆန်း​စေပါတယ်။ ဒါ့ပြင် ဆောင်းရာသီမှာ အသားအရေခြောက်သွေ့တာ​တွေဖြစ်လေ့ရှိတဲ့အတွက် ကိုယ်ဝန်ဆောင်​မေ​မေတို့ရဲ့ ဝမ်းဗိုက်တစ်ဝိုက်ကအရေပြားတွေယားယံပြီး ခြောက်သွေ့နေနိုင်ပါတယ်။ ဒါ​ကြောင့် ရနံ့မပါတဲ့အစိုဓာတ်ထိန်းခရင်မ်ကို နေ့စဉ်သုံး​ပေးပြီး ပူလွန်းတဲ့​ရေနဲ့ရေချိုးခြင်းကို ​ရှောင်ရှားရပါမယ်။

ကိုယ်ဝန်ဆောင်ကာလမှာ ​မေ​မေတို့ရဲ့ရုပ်ပိုင်းဆိုင်ရာ​စိတ်ပိုင်းဆိုင်ရာ​ပါကျန်းမာ​နေမှ သန်မာကြံ့ခိုင်တဲ့ က​လေး​လေး​မွေးဖွားလာမှာဖြစ်ပါတယ်။ အထူးသဖြင့် ဖျားနာလွယ်တဲ့​ဆောင်းရာသီမျိုးမှာဆို မိမိကိုယ်ကိုပိုပြီးဂရုစိုက်ဖို့လိုအပ်တာဖြစ်လို့ အ​ပေါ်မှာ​ဖော်ပြခဲ့တဲ့နည်းလမ်း​​လေးတွေအတိုင်း လိုက်နာဖို့လိုပါတယ်။ ​​​မေ​မေတို့အ​နေနဲ့ စနစ်တကျ​နေထိုင်မယ်ဆိုရင် ကျန်းမာတဲ့ကိုယ်ပွားက​လေး​လေးကို ​လွယ်ကူစွာမွေးဖွားလာနိုင်မှာဘဲဖြစ်ပါတယ်။

Author: Dr. Aye Myat