ရင်သားမှာဖြစ်သော ကင်ဆာမဟုတ်တဲ့ အလုံးအကျိတ်များအကြောင်း အပိုင်း ၂
အပိုင်း၁ မှာ အသားကျိတ်ခေါ် Fibroadenoma အကြောင်းကို ပြောပြဆွေးနွေးခဲ့ပါတယ်။
ခုအပိုင်း၂ မှာတော့ ကင်ဆာမဟုတ်တဲ့ ရင်သားမှာဖြစ်တတ်တဲ့ Fibroadenosis ဆိုတဲ့ အမျိုးအစားကြောင်းကို ပြောပြချင်ပါတယ်။ အင်္ဂလိပ်လို နာမည်အသံထွက်ကတော့ အရင်တခုနဲ့ ခပ်ဆင်ဆင်လေးပေမယ့် မတူပါဘူး။
Fibroadenosis ရောဂါဟာ Fibrocystic disease အမျိုးအစား ဖြစ်တယ်။ နာမည် အမျိုးမျိုးနဲ့ ခေါ်တယ်။ Mammary dysplasia, Chronic cystic mastitis or Hyperplastic cystic disease လို့လည်း ခေါ်ကြပါသေးတယ်။
လိင်ပိုင်းဆိုင်ရာဟော်မုန်းတွေ အတက် အကျ ပြောင်းလဲမှုကြောင့်ဖြစ်တာပါ။ အသက် ၂၅ နဲ့ ၃၅ နှစ်ကြားအရွယ်တွေမှာ အဖြစ်များပါတယ်။ အများအားဖြင့်တော့ အသက် ၃၀ ကျော်သည်အထိအိမ်ထောင်မပြုတဲ့ အမျိုးသမီးတွေ၊ အိမ်ထောင်ပြုပြန်တော့လည်း ကလေးမယူတဲ့အမျိုးသမီးတွေ၊ ကလေးယူပြန်တော့လည်း ကလေးကိုမိမိနို့ချို မတိုက်ကျွေးတဲ့ အမျိုးသမီးတွေမှာ အဖြစ်များပါတယ်။
Fibroadenosis ကို ကင်ဆာမဟုတ်တဲ့ အလုံးအကျိတ်လို့ပြောပေမယ့် အဖုအကျိတ်ကြီးအနေနဲ့မဟုတ်ဘဲ လက်နဲ့စမ်းမိရုံလောက်ပဲ တင်းတင်းလေး မာမာလေးရှိတတ်ပါတယ်။ တခါတရံကျ အရည်အိတ်(Cyst) အနေနဲ့လည်း တွေ့ရလေ့ရှိပါတယ်။ ရင်သားနှစ်ဖက်လုံးမှာဖြစ်နိုင်သလို ချိုင်းမှာလည်း ဖြစ်နိုင်ပါတယ်။
ဒီ Fibroadenosis ကနေကင်ဆာမပြောင်းတတ်ပါဘူးလို့ အများစုကဆိုကြပါတယ်။ သို့သော် တချို့လေ့လာမှုစာတမ်းတွေကလည်း Fibroadenosis ထဲက မျိုးကွဲတခုဖြစ်တဲ့ Atypical ductal (ADH) Atypical Lobular hyperplasia (ALH) ဆိုရင်တော့ တချိန်မှာ Breast cancer ဖြစ်စေနိုင်တဲ့ အလားအလာရှိနိုင်တယ်လို့လည်းပြောကြပါတယ်။
စမ်းသပ်စစ်ဆေးမှုတွေအနေနဲ့ကတော့ ဆရာဝန်က ရောဂါရာဇဝင်ယူပြီးစမ်းသပ်တာတွေအပြင် ရင်သားဓါတ်မှန်(Mammogram)ရိုက်တာ၊အာထရာဆောင်းရိုက်တာ (Ultrasound scan) ၊ Fine Needle Aspiration Cytology(FNAC) လို့ခေါ်တဲ့ အပ်သေးသေးလေးနဲ့အသားစယူစစ်ဆေးတာ စသဖြင့် လုပ်ရနိုင်ပါတယ်။
Fibroadenosis ကို များသောအားဖြင့် သောက်ဆေး(Medical treatment)ပဲ ပေးလေ့ရှိပါတယ်။ ပြီးတော့ အစားသောက်နဲ့ နေထိုင်မှုပုံစံ ပြောင်းလဲဖို့လည်း ညွန်ကြားလေ့ရှိပါတယ်။(Diet and Lifestyle modification)။ အစားသောက်နဲ့ နေထိုင်မှုပုံစံ ဘယ်လိုပြောင်းလဲရမလဲဆိုတာကတော့ အဆီများတဲ့အစားစာတွေ ရှောင်တာ၊ ဟင်းသီးဟင်းရွက် သစ်သီးဝလံတွေများများစားတာ၊ လေ့ကျင့်ခန်း ပုံမှန်လုပ်တာ၊ ကိုယ်အလေးချိန် လျှော့တာ၊ စိတ်ဖိစီးမှုနည်းအောင်နေတာ စသဖြင့်ပြောင်းလဲရပါမယ်။
>>>> ရင်သားမှာဖြစ်သော ကင်ဆာမဟုတ်တဲ့ အလုံးအကျိတ်များအကြောင်း (အပိုင်း ၁) ဖတ္ရန္ <<<<
Author : Dr. 528
