ဘယ်လောက်တိုးရင် သွေးတိုးရောဂါလဲ
သွေးတိုးရောဂါဆိုတာဟာ မကူးစက်နိုင်တဲ့နာတာရှည်ရောဂါအမျိုးအစားဖြစ်ပါတယ်။ အရင်ခေတ်တုန်းကတော့ သွေးတိုးရောဂါဟာ အသက်ကြီးမှဖြစ်တဲ့ရောဂါလို့ထင်မြင်ခဲ့ကြပါတယ်။
ဒါပေမဲ့ ယခုခေတ်လေ့လာချက်တွေ သုတေသနစာတမ်းတွေအရ သွေးတိုးရောဂါဟာ အသက်၂၀အောက်အရွယ်တွေမှာပါ ဖြစ်နိုင်ကြောင်းသိရှိရပါတယ်။
အကြမ်းအားဖြင့် သွေးပေါင်ချိန်ကြည့်လို့ အပေါ်သွေး၁၄၀၊ အောက်သွေး၉၀နဲ့အထက်ရှိရင် သွေးတိုးနေတယ်လို့ သတ်မှတ်ပါတယ်။
သွေးတိုးရောဂါရှိတယ်လို့ သတ်မှတ်ဖို့အတွက်ကတော့ ၇ ရက်ဆက်တိုက် သွေးပေါင်ချိန်ကြည့်ဖို့လိုပါတယ်။ ဒီလို ၇ ရက်ဆက်တိုက်သွေးပေါင်ချိန်တဲ့အခါ ချိန်လိုက်တဲ့အကြိမ်တိုင်းမှာ အပေါ်သွေး၁၄၀၊ အောက်သွေး၉၀ နဲ့အထက်ရှိနေမှ သွေးတိုးရောဂါရှိပြီလို့သတ်မှတ်ပါတယ်။
၇ရက်ဆက်တိုက်မချိန်ကြည့်ဘဲ ရံဖန်ရံခါ တစ်ခါတလေ မှသွေးပေါင်ချိန်ကြည့်လို့ သွေးပေါင်ချိန်အပေါ်သွေး ၁၄၀ အောက်သွေး ၉၀ ရှိတာနဲ့ သွေးတိုးရောဂါရှိတယ်လို့ပြောမရပါ။
သွေးတိုးရောဂါဖြစ်ရတဲ့အကြောင်းတွေ
မျိုးရိုးလိုက်တာ
အဆီအဆိမ့်အငန်အစားများတာ
အဝလွန်တာ
ဆေးလိပ်၊အရက်သောက်တာ
ကျောက်ကပ်ရောဂါနဲ့အခြားရောဂါအခံတွေရှိတာ
သန္ဓေတားဆေးတွေရေရှည်သောက်တာ
ကိုယ်လက်လှုပ်ရှားမှုနည်းတာ
စသဖြင့် အကြောင်းတွေအများကြီးရှိပါတယ်။ ဒီလိုသွေးတိုးစေတဲ့အကြောင်းတွေအများကြီးရှိပေမဲ့ သွေးတိုးရောဂါဖြစ်တဲ့သူတွေရဲ့ ၉၅ရာခိုင်နှုန်းလောက်မှာ ဘာကြောင့်သွေးတိုးရသလဲဆိုတဲ့ တိကျတဲ့အကြောင်းရင်းရှာမရတတ်ပါဘူး။ ၅ ရာခိုင်နှုန်းလောက်မှာပဲ ဘာကြောင့်သွေးတိုးရသလဲဆိုတဲ့ အကြောင်းရင်းကိုရှာလို့ရပါတယ်။
သွေးတိုးရောဂါဟာ ရောဂါလက္ခဏာအနေနဲ့တော့ ထွေထွေထူးထူးပြလေ့မရှိပါဘူး။ ဒီလိုထွေထွေထူးထူးပြလေ့မရှိတဲ့အတွက်လူအများစုဟာ မိမိကိုယ်မိမိ သွေးတိုးရှိမှန်းမသိကြသလို သွေးတိုးရောဂါရှိမှန်းသိတဲ့သူတွေကလည်း သေချာကုသမှုမခံယူကြတာများပါတယ်။
အဲဒီအခါ ရေရှည်ကြာလာတာနဲ့အမျှ သွေးတိုးရောဂါရဲ့နောက်ဆက်တွဲအနေနဲ့ ဆီးချိုရောဂါပါတွဲဖြစ်လာတာ၊နှလုံးကြီးခြင်း၊နှလုံးသွေးကြောကျဉ်းခြင်း၊ ပိတ်ခြင်း စတဲ့နှလုံးရောဂါတွေဖြစ်တာ၊ မျက်စိထိခိုက်ပြီးမျက်စိကွယ်တာ၊ ကျောက်ကပ်ပျက်စီးတာ၊ ရုတ်တရက် သွေးဆောင့်တိုးသောကြောင့် ရုတ်တရက် ဦးနှောက်သွေးကြောပေါက်ပြီးလေဖြတ်တာ စတဲ့ဆိုးကျိုးတွေဖြစ်ပြီး အသက်အန္တရာယ်စိုးရိမ်ရတဲ့အခြေအနေတွေဖြစ်လာနိုင်ပါတယ်။
ဒါကြောင့် အသက်ကြီးကြီးငယ်ငယ် မိမိမှာသွေးတိုးရောဂါရှိမရှိ ဆရာဝန်နဲ့ပြသပြီးစမ်းသပ်ကြည့်ဖို့လိုပါတယ်။ သွေးပေါင်ချိန်မကြာခဏချိန်ကြည့်သင့်ပါတယ်။
စမ်းသပ်ကြည့်လို့ သွေးတိုးရောဂါရှိနေပြီဆိုရင်တော့ ဆရာဝန်ကညွန်တဲ့သွေးပေါင်ချိန်ထိန်းဆေးကို စွဲသောက်ဖို့လိုပါတယ်။ သွေးတိုးရောဂါအတွက်ဆေးများသည် အမျိုးအစားအများကြီးရှိကာ လူနာတစ်ဦးနဲ့တစ်ဦးမှာ အာနိသင်နဲ့ဆိုးကျိုးတွေ ရရှိပုံခြင်းမတူနိုင်သောကြောင့် ဆရာဝန်နဲ့ပြသပြီးမှ သောက်သင့်ပါတယ်။ အရပ်ထဲကသွေးတိုးရောဂါဖြစ်တဲ့သူအချင်းချင်းညွှန်တဲ့သွေးတိုးကျဆေးတွေ၊ ဆေးဆိုင်ကညွှန်တဲ့သွေးတိုးကျဆေးတွေ မသောက်သင့်ပါဘူး။
သွေးတိုးရောဂါဖြစ်ပွားနိုင်ခြေနည်းအောင်
ဆေးလိပ်ဖြတ်ပါ။
အရက်ကိုအလွန်အကျွံမသောက်ပါနဲ့။
မိနစ်၃၀မှ ၁နာရီအထိ နေ့တိုင်းနီးပါး လမ်းလျှောက်ပါ။
စက်ဘီစီးပါ။ ရေကူးပါ။
အဝမလွန်အောင် ကိုယ်အလေးချိန်ကိုထိန်းပါ။
အမျှင်ဓာတ်နဲ့ဗီတာမင်ဓါတ်များတဲ့ လတ်ဆတ်တဲ့ ဟင်းသီးဟင်းရွက်တွေ၊ သစ်သီးဝလံတွေ များများစားပါ။
အဆီ၊အဆိမ့်၊အငန်ကို တတ်နိုင်သလောက်လျှော့စားပါ။
ငါးကို တစ်ပတ်လျှင် အနည်းဆုံး နှစ်ကြိမ်စားပါ။
တစ်ပတ်ကို တစ်ခါလောက်သွေးပေါင်ချိန်ပါ။ ဆီးချိုရှိမရှိနဲ့သွေးတွင်းအဆီဓါတ်များမများကို ခြောက်လတစ်ကြိမ်စစ်ဆေးပါ။
Author : Dr. 528
