လျှာဆိုတာဟာ ကြွက်သားနဲ့ဖွဲ့စည်းထားသော ခံတွင်းအင်္ဂါအစိတ်အပိုင်းတခုဖြစ်ပြီး အရသာခံဖို့၊အစာမျိုဖို့၊စကားပြောဖို့အတွက် မရှိမဖြစ်အရေးပါပါတယ်။
လျှာကင်ဆာဟာ ခုနောက်ပိုင်းမှာတော်တော်လေးအဖြစ်များလာစေတဲ့ ခံတွင်းကင်ဆာအမျိုးအစားဖြစ်ပါတယ်။
ပါးစောင်၊လျှာ၊သွားဖုံး၊အာခေါင်မိုး၊တံတွေးဂလင်း၊နှုတ်ခမ်း စတဲ့အာခံတွင်းအစိတ်အပိုင်းနေရာတွေမှာဖြစ်တဲ့ကင်ဆာတွေကို ခံတွင်းကင်ဆာလို့ ခြုံပြီးခေါ်ဆိုပါတယ်။
အများအားဖြင့် အသက်၅၀ကျော်အမျိုးသားတွေမှာအဖြစ်များလေ့ရှိပါတယ်။ သို့သော် အခုနောက်ပိုင်းမှာဆိုရင် အသက်ငယ်ငယ်ရွယ်ရွယ်နဲ့ဖြစ်တဲ့သူတွေကိုလည်း တွေ့လာရပါတယ်။
လျှာကင်ဆာဖြစ်ရတဲ့အကြောင်းအရင်းအတိအကျကိုတော့ သေချာပြောမရပါ။
သို့သော်သုတေသနတွေအရ လျှာကင်ဆာဟာ ဆေးလိပ်သောက်၊အရက်သောက်၊ကွမ်းစားတဲ့သူတွေ၊အကင်တွေအစားများတဲ့သူတွေ၊ခံတွင်းသန့်ရှင်းမှုအားနည်းတဲ့သူတွေ၊တရားလွန်ပူသော စပ်သော အစားသောက်များကို ရေရှည် ခဏခဏ စားသောက်တဲ့သူတွေ၊HPV ပိုးရှိသူနဲ့ပါးစပ်ဖြင့်လိင်ဆက်ဆံခဲ့ခြင်းကြောင့် HPV ပိုးကူးစက်ခံရသူတွေ၊မိဘမျိုးရိုးမှာ လျှာကင်ဆာဖြစ်ဖူးတဲ့ရာဇဝင်ရှိသူတွေ မှာဆိုရင် ဖြစ်နိုင်ခြေများတတ်ပါတယ်။
ဒါ့အပြင် တချို့တွေမှာ သွားချွန်သွားတက်တွေရှိနေပြီး အဲ့သွားတွေက လျှာကိုမကြာခဏသွားထိခိုက်မှုဖြစ်စေတာမျိုး သို့မဟုတ်
တချို့တွေမှာ သွားတုတပ်ရာကနေ ပုံစံမကျချောင်နေခြင်းကြောင့် မကြာခဏလျှာကိုသွားထိခိုက်တာမျိုးတွေမှတဆင့် ရေရှည်မှာ လျှာကင်ဆာဖြစ်လာတာမျိုးရှိပါတယ်။
လျှာကင်ဆာဖြစ်ပါက လျှာမှာအနာသို့မဟုတ် အလုံးအကျိတ်တွေဖြစ်လာတာ၊ဖြစ်တဲ့အနာသို့မဟုတ် အလုံးအကျိတ်က ၃ပတ်ကျော်သည်ထိမပျောက်တာ၊လျှာနဲ့လျှာဘေးပတ်လည်နေရာတွေမှာ အနီကွက် သို့မဟုတ် အဖြူကွက်လေးတွေဖြစ်ပြီး ထိုအကွက်လေးတွေကပွားလာတာ၊အစာမျိုချင်ရင်နာတာ၊စကားပြောရခက်တာ၊လျှာထုံတာ၊လျှာကထိခိုက်မိတာမရှိဘဲရောင်ရမ်းနာကျင်နေတာ၊ခိုက်မိတာမရှိဘဲ လျှာကနေသွေးထွက်တာ မျိုးတွေဖြစ်နိုင်ပါတယ်။
ဒီလိုလက္ခဏာတွေဖြစ်ပြီဆိုရင်တော့ ဆရာဝန်နဲ့ပြသပြီး လျှာကင်ဆာဟုတ်မဟုတ် စမ်းသပ်စစ်ဆေးကြည့်ဖို့လိုပါတယ်။
လုပ်နိုင်တဲ့စစ်ဆေးမှုတွေကတော့ ဓါတ်မှန်ရိုက်တာ၊စီတီရိုက်တာ၊အသားစယူစစ်ဆေးတာစသဖြင့်ပါ။
ဒီလိုတွေစမ်းသပ်စစ်ဆေးကြည့်လို့ လျှာကင်ဆာဖြစ်နေပြီဆိုရင် ဆရာဝန်နဲ့ပြသပြီးစောစီးစွာကုသဖို့လိုပါတယ်။
ကုသမှုအနေနဲ့ကတော့ ရောဂါအခြေအနေ နဲ့ လူနာကိုယ်ခံအားအခြေအနေ၊အသက်အရွယ်ပေါ်မှုတည်ပြီး ခွဲစိတ်တာ၊ကင်ဆာဆေးသွင်းကုသတာ၊ဓါတ်ရောင်ခြည်နဲ့ကုတာ စသဖြင့် နည်းလမ်းတွေရှိပါတယ်။လိုအပ်ပါက နည်းနှစ်နည်းပေါင်းကုတာမျိုးလည်းရှိပါတယ်။ဥပမာ-အလုံးအကျိတ်ခွဲစိတ်ပြီးနောက် ဓါတ်ကင်တာမျိုးပါ။
အဆုံးသတ်အနေနဲ့ အကြံပေးချင်တာကတော့ လျှာကင်ဆာဖြစ်နိုင်ခြေနည်းအောင်
အရက်ဆေးလိပ်ကွမ်း ရှောင်ပါ။ခံတွင်းကျန်းမာရေးဂရုစိုက်ပါ။အစားအသောက်တွေကို ပူပူလောင်လောင်အနေအထားမျိုးနဲ့စားတဲ့အကျင့်ကိုရှောင်ပါ။သွားချွန်သွားတက်တွေရှိပါက သွားဆရာဝန်နဲ့ပြသတိုင်ပင်ပါ။ပါးစပ်ဖြင့်လိင်ဆက်ဆံခြင်းမျိုးကိုရှောင်ကြပါလို့ တိုက်တွန်းအကြံပြုချင်ပါတယ်။
Dr 528
