ကိုယ်ဝန်ဆောင်ကာလမှာဟော်မုန်းပြောင်းလဲမှုတွေ များတာနဲ့အမျှ အသားအရေ စိုပြေလှပလာသူတွေရှိသလို အရေပြား ပြဿနာတွေ ကြုံတွေ့ရသူများလည်းရှိပါတယ်။ ကိုယ်ဝန်ဆောင်အမျိုးသမီးတွေအတွက် ကျန်းမာတဲ့အရေပြားရရှိနိုင်ဖို့ရာ သင့်လျော်မှန်ကန်တဲ့ အသားရည်ထိန်းသိမ်းမှုများပြုလုပ်ရန် လိုအပ်ပါတယ်။ ရင်သွေးလေးလွယ်ထားရတဲ့ ကိုယ်ဝန်ဆောင်မေမေတို့အနေနဲ့ ဘာပစ္စည်းတွေ သုံးလို့ရမလဲ ဘာတွေရှောင်ရမလဲဆိုတာ လေ့လာစမ်းသပ်ချက်တွေ ပြုလုပ်ဖို့ ခက်ခဲပါတယ်။ ထို့ကြောင့် အသားအရေထိန်းသိမ်းတဲ့ အလှကုန်ပစ္စည်းတွေ မှန်ကန်စွာရေးချယ်ဖို့ အရေးကြီးပါတယ်။
ကိုယ်ဝန်ဆောင်ကာလမှာ ဟော်မုန်းပြောင်းလဲမှုများကြောင့် တင်းတိပ်နှင့် ဟော်မုန်းဝက်ခြံများ၊ အသားညိုမဲခြင်းများ ဖြစ်တတ်သော်လည်း မီးဖွားပြီးလျှင် သက်သာလေ့ရှိပါသည်။ အရေပြားဆရာဝန်များ၏ အကြံပြုချက်အရ တင်းတိပ်၊မှဲ့ခြောက်များကို ဓာတုဆေးအသုံးပြု၍ အရေပြားအပေါ်ယံလွှာ ဖယ်ရှားခြင်း chemical peeling နှင့် ဗီတာမင်စီ၊ သဘာဝအတိုင်း အသားရောင်ဖျော့စေသည့် kojic acid နှင့် နွယ်ချိုမြစ် licorice root ပါဝင်အလှကုန်များကို အသုံးပြုပေးနိုင်သည်။
ကိုယ်ဝန်ဆောင်ကာလ ပထမ၊ဒုတိယပါတ်တို့တွင် အင်ဒရိုဂျင်ဟော်မုန်းကြောင့် ဟော်မုန်းဝက်ခြံပေါက်ခြင်းကို ခံစားရနိုင်သည်။ အရေပြားခြောက်သွေ့ခြင်းလည်း ဖြစ်တတ်ပြီး အချို့အမျိုးသမီးများတွင် မီးဖွားပြီးသည့်တိုင် အသားအရေ ခြောက်သွေ့ခြင်းကို ကြုံတွေ့ရတတ်သည်။ ထို့ကြောင့် မျက်နှာသစ်ဆပ်ပြာ အပျော့စားသုံး၍ မျက်နှာသန့်စင်ခြင်း၊ အစိုဓါတ်ဖြည့်အဆီများ လိမ်းပေးခြင်း၊ အရေပြားခြောက်သွေ့ခြင်းအတွက် hyaluronic acid ပါသော အဆီများလိမ်းပေးခြင်း၊ နေရောင်ကာလိမ်းဆေးများ လိမ်းခြင်းတို့ကို ပုံမှန်ပြုလုပ်ပေးရန်လိုအပ်ပါသည်။
လူသုံးကုန်နှင့် အလှကုန်ပစ္စည်းများ၏ ပါဝင်ပစ္စည်းများတွင် salicylic acid, ဗီတာမင်အေ ဒြပ်ပေါင်းများဖြစ်သည့် (Retin-A, retinol, retinyl palmitate)၊ ဘန်ဇိုင်းပါအောက်ဆိုဒ် benzoyl peroxide၊ hydroquinone စသည်တို့ ပါဝင်လျှင် သန္ဓေသားကို ထိခိုက်စေနိုင်၍ ရှောင်ကျဉ်သင့်ပါသည်။ salicylic acid ပါသည့် ဓါတုနည်း ဖြင့်အရေပြား peeling လုပ်ခြင်း၊ botox နှင့် လေဆာကုထုံးများကိုလည်း မပြုလုပ်ပဲ ရှောင်ကျဉ်သင့်သည်။
အရေပြားဆဲလ်အဟောင်းများ ဖယ်ရှားသည့် exfoliator ကို လက်တစ်အက်ဆစ် နှင့် glycolic အက်ဆစ်ပါသည့် အပျော့စား ချေးချွတ်ဆေးများကို နှစ်ပါတ်တစ်ကြိမ်ခန့် အသုံးပြုနိုင်ပါသည်။ ဟော်မုန်းဝက်ခြံအတွက် epidermal growth factors ပါဝင်သော ပစ္စည်းများနှင့် တစေးမှထုတ်လုပ်သည့် ထုတ်ကုန်များ yeast extract အသုံးပြုနိုင်သည်။ အုန်းဆီ၊ အယ်လ်မွန်စေ့အဆီ၊ shea butter/cocoa butter ကဲ့သို့ အစေ့အဆန်များမှရသော အဆီ၊ လာဗင်ဒါပန်းဆီ၊ ကလန်ကျူလာပန်းဆီcalendula extract စသော သဘာဝအခြေခံ အဆီများကို အသုံးပြုနိုင်ပါသည်။
အချို့မိခင်လောင်းများတွင် ကိုယ်ဝန်ဆောင် နှောင်းပိုင်းကာလ ၆ပါတ်- ၇ပါတ်မှစ အရေပြားအကြောပြတ်ရာများ ထွက်ပေါ်တတ်သဖြင့် ကိုယ်ဝန်ဆောင်ကာလ အစောပိုင်းကစ၍ အရေပြားကို အစိုဓါတ်ဖြည့်အဆီခရမ် moisturizing cream ၊ အဆီ oils ၊ အကြောပြတ်သက်သာသည့်လိမ်းဆေး စသည်တို့လိမ်းပေးနိုင်သည်။ အဓိကအားဖြင့် ကိုယ်ဝန်ဆောင် အမျိုးသမီးများသည် ပြင်းထန်သော ဓါတုပစ္စည်းမပါဝင်သည့် အပျော့စား ဓါတုလျော့သဘာဝပစ္စည်း အခြေခံထုတ်ကုန် ပစ္စည်းများကိုသာ ရွေးချယ်သုံးသင့်ပါသည်။
Author: Dr. Yee Mon
