ချောင်းဆိုးရောဂါဝေဒနာကို အစောပိုင်းကာလတွင် လူအများစုက လျစ်လျူရှုထားလေ့ရှိကာ ဆိုးရွားပြင်းထန်လာသောအခါတွင်မှ ကုသမှုခံယူရန် စဉ်းစားတတ်ကြပါသည်။ ထိုအခါတွင် မလိုလားအပ်သော နောက်ဆက်တွဲ ပြဿနာများ ပိုမို ဖြစ်ပေါ်လာနိုင်ပါသည်။ ထို့ကြောင့် ချောင်းဆိုးခြင်း စတင်ဖြစ်ပေါ်သည့်အချိန်မှ စတင်ကာ ပိုမိုမဆိုးရွားလာဘဲ အမြန်ပျောက်ကင်းအောင် ဂရုစိုက်ခြင်းအားဖြင့် နောက်ဆက်တွဲ ပြဿနာများကို များစွာ လျှော့ချနိုင်မည် ဖြစ်ပါသည်။
အောက်ပါအချက်များသည် ချောင်းဆိုးဝေဒနာခံစားနေရစဥ် ရှောင်ကြဉ်သင့်သော အချက်များဖြစ်ပါသည်။
( ၁ ) အေးသော အစားအစာများစားသောက်ခြင်းမှ ရှောင်ကြဉ်ပါ
ရေခဲမုန့်၊ ရေခဲချောင်း၊ အအေးနှင့် အေးသောအဖျော်ယမကာများ စသောအစားအစာများသည် ချောင်းဆိုးခြင်းကို ပိုမိုဆိုးရွားစေနိုင်ကြောင်းတွေ့ရှိရပါသည်။
ထိုအေးသောအစားအစာများသည် အသက်ရှူလမ်းကြောင်း၏အနားသတ်ကို ခြောက်သွေ့စေခြင်းကြောင့် မအီမသာခံစားရကာ ချောင်းဆိုးခြင်းဝေဒနာကို ပို၍ဆိုးရွားလာစေခြင်း ဖြစ်ပါသည်။
( ၂ ) ညအိပ်ခါနီးတွင် အစာပမာဏများစွာ စားခြင်းမှ ရှောင်ကြဉ်ပါ
အထူးသဖြင့် အစာရေမျိုပြွန်အတွင်းသို့ အစာအိမ်အတွင်းမှ အစာခြေအက်စစ် ချဉ်ရည်ဆန်တက်သော ရောဂါရှိသူများသည် ညဘက်တွင် အစားအစာ များများမစားသင့်ပါ။
အဘယ်ကြောင့်ဆိုသော် ထိုသို့သောရောဂါရှိသူများတွင် အစာများများစားလိုက်သောအခါ အစာအိမ်မှ အက်စစ်များသည် အထက်သို့ပို၍ ဆန်တက်လာကာ လည်ချောင်းတွင်မအီမသာခံစားရခြင်းကြောင့် ချောင်းဆိုးခြင်းကို ပိုမိုအားပေးကြောင်းတွေ့ရှိရပါသည်။
( ၃ ) ချောင်းဆိုးနေသည့်အခါ ပက်လက်အိပ်ခြင်းမှ ရှောင်ကြဉ်ပါ
အိပ်စက်သည့် အနေအထားပုံစံသည်လည်း ချောင်းဆိုးခြင်းကို အကျိုးသက်ရောက်မှု ရှိနိုင်ပါသည်။
ပက်လက်အနေအထားဖြင့် အိပ်စက်သည့်အခါ တစ်နေ့တာလုံး ထွက်ရှိစုဝေးနေသော ချွဲသလိပ်များသည် လည်ချောင်းဆီသို့ ဆန်တက်ကာ ချောင်းဆိုးခြင်းကို ပိုမိုဆိုးရွားလာစေပါသည်။
ထို့ကြောင့် ချောင်းဆိုးရောဂါခံစားနေရချိန်တွင် ပက်လက်မအိပ်ဘဲ ဘေးစောင်းအနေအထားဖြင့် အိပ်စက်ခြင်းဖြင့် ရောဂါလက္ခဏာများကို သက်သာစေမည်ဖြစ်ပါသည်။
( ၄ ) ဆီကြော်အစားအစာများကို စားသုံးခြင်းမှ ရှောင်ကြဉ်ပါ
ဆီကြော်အစားအစာများတွင် လည်ချောင်းယားယံခြင်းနှင့်ချောင်းဆိုးခြင်းကို ဖြစ်စေသော Acrolein ဟူသော ဒြပ်ပေါင်းတစ်မျိုးပါဝင်ကြောင်းတွေ့ရှိရပါသည်။
ထိုအချက်ကြောင့် ဆီကြော်အစားအစာများသည် ချောင်းဆိုးနေစဉ်တွင် မစားသင့်သော အစားအစာများတွင် ပါဝင်နေခြင်းဖြစ်ပါသည်။
(၅) ဆေးလိပ်သောက်ခြင်းမှ ရှောင်ကြဉ်ပါ
ဆေးလိပ်သောက်ခြင်းသည် အဆုတ်လေပြွန်ရောင်ရမ်းခြင်းကြောင့် နာတာရှည်ချောင်းဆိုးခြင်း အကြောင်းရင်းများတွင် တစ်ခုအပါအဝင်ဖြစ်ပါသည်။
ဆေးလိပ်သောက်ခြင်းသည် လည်ချောင်း၏အနားသတ်ကို မအိီမသာဖြစ်စေ၍ ချောင်းဆိုးခြင်းကိုအားပေးရုံသာမက အဆုတ်ကင်ဆာရောဂါဖြစ်ပွားနိုင်ခြေကိုလည်း မြင့်မားစေကြောင်းတွေ့ရှိရပါသည်။
( ၆ ) ကဖင်းဓာတ်ပါသော အဖျော်ယမကာများ
အစာအိမ်အက်စစ်အထွက်များခြင်းနှင့် အစာအိမ်အက်စစ်ချဉ်ရည်ဆန်တက်သောရောဂါကြောင့် ချောင်းဆိုးသောသူများတွင် ကဖင်းဓာတ်ပါသော အစားအစာများကို ရှောင်ကြဉ်ရပါမည်။
ကဖင်းဓာတ်သည် အစာရေမျိုပြွန်နှင့် အစာအိမ်ကို ဆက်သွယ်ပေးထားသော ရှုံ့ကြွ ကြွက်သားကို ပြေလျော့စေသဖြင့် အစာရေမျိုပြွန်ဆီသို့ အက်စစ်များကိုပို၍ ဆန်တက်စေကာ ချောင်းဆိုးခြင်းကို ပိုမိုပြင်းထန်စေကြောင်းတွေ့ရှိရပါသည်။
( ၇ ) အလုပ်အလွန်အကျွံ လုပ်ခြင်းမှရှောင်ကြဉ်ပါ
ချောင်းဆိုးခြင်းကြောင့် အလုပ်မှခွင့်ယူရန်မလိုအပ်ပါ။
သို့သော် ချောင်းဆိုးရောဂါသည်လည်း ခန္ဓာကိုယ်၏ ကျန်းမာရေးစနစ်တွင် တစ်စုံတစ်ခု ချွတ်ယွင်းနေသည့် လက္ခဏာတစ်ရပ်ဖြစ်သောကြောင့် အလုပ်အလွန်အကျွံမလုပ်ဘဲ အနားယူခြင်းဖြင့် ခုခံအားစနစ်တိုးတက်လာကာ ရောဂါဝေဒနာများ အမြန်သက်သာပျောက်ကင်းလာနိုင်မည် ဖြစ်ပါသည်။
အထက်ပါ အချက်အလက်များကို ချောင်းဆိုးသည့်အခါ သတိပြုရှောင်ကြဉ်ခြင်းအားဖြင့် ချောင်းဆိုးခြင်းကို အမြန်ဆုံးသက်သာပျောက်ကင်းစေကာ နောက်ဆက်တွဲပြဿနာများကိုလည်း မဖြစ်ပွားစေရန် ကာကွယ်နိုင်မည်ဖြစ်ပါသည်။
Author : Dr. မိုး (ဆေး ၁)
