ငွေကြေးကုန်ကျမှုမရှိဘဲ လုပ်နိုင်တဲ့လေ့ကျင့်ခန်းလို့ ဆိုလိုက်ရင် လမ်းလျှောက်တာနဲ့ အသက်ရှုလေ့ကျင့်ခန်းတို့ဟာ အလွယ်ကူဆုံး လေ့ကျင့်ခန်းတွေ ဖြစ်ပါတယ်။ အသက်ရှူလေ့ကျင့်ခန်းနဲ့ ဆက်စပ်ပြီး အောက်စီဂျင်ဟာခန္ဓာကိုယ်မှာ ဘယ်လိုပုံစံနဲ့ အလုပ်လုပ်လဲဆိုတာ သိစေချင်ပါတယ်။ အဆုတ်ကနေရှူသွင်းလိုက်တဲ့ အောက်စီဂျင်တွေဟာ သွေးဆဲလ်လေးတွေနဲ့အတူ သူတို့ကိုအသုံးပြုမဲ့ ခန္ဓာကိုယ်ဆဲလ်တွေဆီ အောက်စီဂျင်ကို သယ်ပို့ပေးသော သွေးကြောများမှတဆင့် သယ်ဆောင်သွားခြင်းခံရပါတယ်။ ဒါကြောင့် အသက်ရှူလေ့ကျင့်ခန်း ပုံမှန်လုပ်ခြင်းကြောင့် ရရှိလာမဲ့အကျိုးကျေးဇူးတွေကို ဒီဆောင်းပါးလေးမှာ ဖော်ပြပေးလိုက်ပါတယ်။
💠 အဆုတ်ကျန်းမာရေးကောင်းစေခြင်း
အဆုတ်က ခန္ဓာကိုယ် တစ်ကိုယ်လုံး လှည့်ပတ်နေတဲ့ သွေးတွေကို သွေးညစ်နဲ့ သွေးသန့် လဲလှယ်ပေးတဲ့နေရာ ဖြစ်ပါတယ်။ ခန္ဓာကိုယ်က နားနားနေနေ နေတဲ့အခါမှာဆို အဆုတ်ရဲ့ 30-50% လောက်ကို သွေးမရောက်တဲ့အတွက် အဲ့နေရာတွေက အလုပ်မလုပ်ပါဘူး။ အသက်ပြင်းပြင်းရှူပြီး လေ့ကျင့်ခန်းလုပ်ပေးခြင်းဖြင့် အဆုတ်ရဲ့နေရာ တော်တော်များများကို သွေးရောက်ရှိပြီး အဆုတ်ကျန်းမားရေးလည်း ကောင်းသလို ခန္ဓာကိုယ်ရဲ့ဆဲလ်တွေ အသုံးပြုဖို့ သွေးတွင်းအောက်စီဂျင်ကိုလဲ လုံလောက်စွာရစေပါတယ်။
💠 သွေးလှည့်ပတ်မှုကောင်းစေခြင်း
အသက်ရှုလေ့ကျင့်ခန်း လုပ်တဲ့အခါ နှလုံးကြွက်သားတွေဆီကို အောက်စီဂျင်လုံလောက်စွာရတဲ့အတွက် နှလုံးကြွက်သားများကို သန်မာစေပါတယ်။ ဒါ့အပြင် ပုံမှန် အသက်ရှူလေ့ကျင့်ခန်း လုပ်ပေးခြင်းဖြင့် လေဖြတ်နိုင်စွမ်းကို လျော့နည်းစေပါတယ်။
💠 မှတ်ဥာဏ်ကောင်းစေခြင်း
ဦးနှောက်အတွက် မရှိမဖြစ်လိုအပ်တာကို ပြောပါဆိုရင် glucose နဲ့ oxygen ပါဘဲ၊ ခန္ဓာကိုယ်မှာ ဦးနှောက်နဲ့ နှလုံးဟာ သွေးမရတာနဲ့ ပုပ်သွားနိုင်တဲ့ အစိတ်အပိုင်းတွေပါ။ ဦးနှောက်ကိုသွားတဲ့ သွေးတွေမှာ oxygen များများပါပြီး ဦးနှောက်ကို ဒုက္ခပေးမဲ့ ကာဗွန်ဒိုင်အောက်ဆိုဒ်တွေ များများထွက်သွားလေ ဦးနှောက်စွမ်းဆောင်ရည်ကို ပိုကောင်းလေပါဘဲ။
💠 ကိုယ်ခံစွမ်းအားမြှင့်တင်ပေးခြင်း
ဘာရောဂါအခံမှ မရှိသော်လည်း ကိုယ်ခံအားကျနေခြင်းဟာ စိတ်ဖိစီးမှုတွေ များပြားခြင်းကြောင့်ဖြစ်ပါတယ်။ အသက်ရှူလေ့ကျင့်ခန်း လုပ်ခြင်းဟာ စိတ်ဖိစီးမှုကြောင့်ထွက်တဲ့ stress hormone တွေကို လျှော့ချပေးပြီး ကိုယ်ခံစွမ်းအားမကျအောင် ထိန်းညှိပေးပါတယ်။
💠 အိပ်ပျော်စေခြင်း
ညအိပ်ယာမဝင်ခင် အသက်ပြင်းပြင်း ရှူသွင်း၊ ရှူထုတ် လုပ်ပေးခြင်းဖြင့် insomnia လို အိပ်မပျော်တဲ့ရောဂါ ခံစားနေရတဲ့လူနာများအတွက် အိပ်ပျော်စေဖို့ အကူအညီဖြစ်ပါတယ်။
💠 အဆီကျစေခြင်း
လှဲအိပ်ပြီး ဗိုက်ဖောင်းတဲ့အထိ အသက်ရှူသွင်း၊ ရှူထုတ် ပုံမှန်ပြုလုပ်ပေးရင် ဗိုက်မှာရှိတဲ့ အဆီပိုတွေကို ဖယ်ရှားပေးပြီး ဗိုက်ကြွက်သားကို ကျစ်လစ်စေပါတယ်။
💠 ကျန်းမာလှပသော အသားအရည်ရှိခြင်းဒီတစ်ချက်ကတော့ တော်တော်များများ သဘောကျလိမ့်မယ်လို့ ထင်ပါတယ်။ အသက်ရှူလေ့ကျင့်ခန်းလုပ်ခြင်းကြောင့် ခန္ဓာကိုယ်ဟာ အောက်စီဂျင်အလုံအလောက် ရနေမယ်ဆို အသားအရည်ဟာလဲ ကျန်းမာလှပနေမှာဖြစ်ပါတယ်။
💠 စိတ်ဖိစီးမှုနှင့် စိတ်ကျဝေဒနာ သက်သာစေခြင်း၊ အာရုံစူးစိုက်မှုကောင်းစေခြင်း
အသက်ရှုသွင်းရှူထုတ်ကို အာရုံစိုက် ပြုလုပ်ပေးခြင်းဖြင့် စိတိပိုင်းဆိုင်ရာ တည်ငြိမ်စေပြီး စိတ်အပန်းဖြေ အနားရစေနိုင်ပါတယ်။
အဆုတ်ကို ဒုက္ခပေးနိုင်တဲ့ ကူးစက်ရောဂါတွေ ဖြစ်ပွားနေတဲ့ ယခုလိုကာလမှာ ခက်ခဲမှုမရှိ အလွယ်တကူ အချိန်မရွေး ပြုလုပ်လို့ရတဲ့ အကျိုးကျေးဇူး အများကြီးရှိသော အသက်ရှူလေ့ကျင့်ခန်းကို အားလုံးပုံမှန်လုပ်ကြည့်ဖို့ တိုက်တွန်းလိုက်ပါတယ်။
Dr. Yee Mon
