ကလေးငယ်နှင့် ကစားစရာ အရုပ်အန္တရာယ်
ကလေးဆိုတာက မွေးလာပြီးတာနဲ့ အရုပ်တွေနဲ့ လက်ပွန်းတတီး နေတတ်ကြပါတယ်။ ကိုယ်တိုင်မဆော့နိုင်သေးတဲ့ အချိန်မှာတောင် ဘေးကနေ ကလေးလေးကို ချော့မြူတာတွေ စနောက်နေတာတွေ ရှိတတ်ပါတယ်။ ကလေးတွေရဲ့ ကစားဖော်ဖြစ်တဲ့ အရုပ်တွေကလည်း ကလေးကျန်းမာရေးအတွက် အလွန်အရေးကြီးပါတယ်။
မွေးစကနေ နှစ်လသုံးလလောက်ထိတော့ ဂျောက်ဂျက်လို အသံမြည်တဲ့ အရုပ်လေးတွေက ကလေးတွေရဲ့ကစားဖော်ပါ။ တစ်ချို့တွေမှာတော့ အိပ်တဲ့ ပုခက် ကုတင်စတာလေးတွေရဲ့အပေါ်မှာ ချိတ်ဆွဲထားပေးတဲ့ merry-go-round လို လည်နေတဲ့ အရုပ်လေးတွေပါ ကလေး ကိုယ်တိုင်မကိုင်ဖြစ်လည်း အရုပ်လေးတွေရဲ့သန့်ရှင်းမှုက အရေးပါပါတယ်။
ကလေးအိပ်ယာလေးတွေပေါ် ချိတ်ထားတဲ့ အရုပ်လေးတွေကို နေ့စဉ်ဖုန်ခါပေးဖို့ သန့်ရှင်းပေးဖို့ လိုပါတယ်။ တစ်ချို့ကလေးတွေမှာ ဓာတ်မတည့်တာတွေ ဖြစ်တတ်ပါတယ်။ နေရောင်ထဲမှာလည်း ထုတ်လှမ်းပေးဖို့လိုပါတယ်။
ကလေးတွေကိုယ်တိုင် စပြီးဆော့တတ်လာတယ်ဆိုရင်တော့ ပိုဂရုစိုက်ရပါတယ်။ အရုပ်ဆိုတာမှာ
အမွှေးပွအရုပ်ပဲဖြစ်ဖြစ် တစ်ခြားသော ကစားစရာလေးတွေပဲဖြစ်ဖြစ်ကို ပြောတာပါ။ တစ်ချို့ကစားစရာတွေက ကလေးအသက်အရွယ်လိုက် သတ်မှတ်ထားပါတယ်။ ကလေးတွေအတွက် အန္တရာယ် ကင်းအောင်ပါ။
ကလေးတွေကို ကစားစရာတွေပေးထားပြီး ဆော့စေတဲ့အခါမှာလည်း ကလေးတစ်ယောက်တည်း မလွှတ်ထားပါနဲ။့ ကလေးဆိုတာက ဘာမှသေချာသိသေးတာ မဟုတ်တော့ ပါးစပ်ထဲ နှာခေါင်းထဲဝင်သွားတာတွေ ဖြစ်တတ်တယ်။
အရမ်းသေးတဲ့ကစားစရာတွေ အလုံးလေးတွေထွက်လာတတ်တဲ့ ဂျောက်ဂျက်လေးတွေ ကွဲလွယ်ရှလွယ်တဲ့ ဖန်နဲ့လုပ်ထားတာလေးတွေ အချွန်အတက်ပါတဲ့ ကစားစရာလေးတွေကို သီးသန့်ဖယ်ထားပေးပါ။ ကလေးတွေကိုမပေးပါနဲ့။
ကလေးဆိုတော့ ဘာမှန်းမသိဘဲ ပါးစပ်ထဲနှာခေါင်းထဲ ထည့်မိတာတွေကနေ အသက်ရှူပိတ်တတ်တယ်။ သီးတတ်တယ် အချွန်အတက်တွေကနေ ထိခိုက်နိုင်တတ်တယ်။ လက်ညပ်မိတာတွေ ဖြစ်သွားတတ်ပါတယ်။
နောက်တစ်ခုက ကစားစရာတွေကို ပုံမှန်သန့်ရှင်းရေး လုပ်ပေးဖို့လိုပါတယ်။ ကစားထားတဲ့အခါ ကစားစရာအရုပ်လေးတွေက ကြမ်းပြင်ပေါ်ကျတာ ထိုင်ခုံတွေအောက်ဝင်သွားတာတွေ ရှိတတ်ပါတယ်။ ဒါမျိုးတွေဆိုဖြစ်နိုင်ရင် သန့်ရှင်းရေးပြန်လုပ်ဖို့ လိုပါတယ်။
ကစားစရာတွေပြန့်ကျဲနေတာမျိုးက ကလေးအတွက်ကောင်းတယ်ဆိုပေမယ့် မမြင်နိုင်တဲ့ ရောဂါပိုးတွေက အများကြီးပါ။ ကစားစရာပေါ်က ကြွက် ပိုးကောင် ပိုးဟပ်တွေ ဖြတ်ပြေးတာတွေကို ဘယ်သူမှသတိထားမိမှာ မဟုတ်လိုက်ပါဘူး။ ဒါကြောင့် ဘယ်ကစားစရာမဆို အဖုံးပါတဲ့ ခြင်းတွေ ဗီရိုတွေနဲ့ ထည့်သိမ်းပေးသင့်ပါတယ်။
နောက်ဆုံးတစ်ခုကတော့ အမွှေးပွအရုပ်တွေပါ။ တစ်ချို့ကလေးတွေက အမွှေးပွအရုပ်လေးတွေကို အိပ်ယာထဲထိ ထည့်အိပ်တတ်ကြတယ်။ ဘယ်သွားသွား ယူသွားတတ်ကြတယ် ဒီအရုပ်လေးတွေရဲ့ အမွှေးတွေကြားထဲ အမှိုက်တွေ အကောင်တွေ ဖုန်တွေ ကပ်နေတတ်တယ်။ ကလေးတွေက အရုပ်လေးတွေကို ဖက်ပြီးနမ်းတာလေးတွေကနေတစ်ဆင့် ရောဂါပိုးတွေ ကူးစက်နိုင်ပါတယ်။
ဒါကြောင့် ဒီအမွှေးပွအရုပ်လေးတွေကို သန့်ရှင်းရေးလုပ်ပေးဖို့လိုပါတယ်။ ဒီအရုပ်တွေကျတော့နေပူပြရုံနဲ့မပြီးပါဘူး။ ဆပ်ပြာနဲ့ လျှော်ပေးဖို့လိုပါတယ်။ နေရောင်ကောင်းကောင်းမှာ အခြောက်ခံဖို့လည်းလိုပါတယ်။
ကလေးနဲ့အရုပ်ဆိုတာ အမြဲဒွန်တွဲနေမှာပါ။ ဒါကြောင့်ကလေးကျန်းမာဖို့အတွက် အရုပ်လေးတွေသန့်ရှင်းဖို့ ဂရုစိုက်ကြရမှာဖြစ်ပါတယ်။
Dr. CST
