ဆီးခုံမွေးဆိုတာ အမျိုးသား၊ အမျိုးသမီးတွေရဲ့ လိင်အင်္ဂါတစ်ဝိုက်မှာပေါက်တဲ့ အမွေးဖြစ်ပါတယ်။ ဆေးပညာအရတော့ Pubic Hair လို့ခေါ်ပါတယ်။
အရင်ခေတ်ကတော့ ဆီးခုံမွေးရိတ်တာညှပ်တာကို ပုံမှန်ဓမ္မတာအတိုင်း လိင်ဆက်ဆံတာမျိုးမဟုတ်တာကို နှစ်သက်တဲ့သူတွေ (ဆိုလိုတာက ပါးစပ်နဲ့လိင်ဆက်ဆံတာကို နှစ်သက်တဲ့သူတွေ) ပဲလုပ်လေ့ရှိတတ်ပါတယ်။ ဘာလို့လဲဆိုတော့ ပါးစပ်နဲ့လိင်ဆက်ဆံတဲ့အခါမှာ ဆီးခုံမွေးတွေက ဆက်ဆံပေးတဲ့သူအတွက်ရော၊ ဆက်ဆံခံတဲ့သူအတွက်ပါ အနှောင့်အယှက်ဖြစ်စေနိုင်လို့ပါ။
အခုခေတ်မှာ ဆီးခုံမွေးကိုရိတ်တာ၊ ညှပ်တာတွေဟာ အမျိုးသား၊ အမျိုးသမီးတွေကြားမှာ ခေတ်စားလာပြီး ဆီးခုံမွေးရိတ်တဲ့သူ၊ ညှပ်တဲ့သူတွေဟာများလာပါတယ်။
အမေရိကန်မှာလုပ်ခဲ့တဲ့ သုတေသနတွေအရ သူတို့ဆီက အမျိုးသား၊ အမျိုးသမီးတွေရဲ့ ထက်ဝက်ကျော်လောက်ဟာ ဆီးခုံမွေးကိုရိတ်လေ့၊ ညှပ်လေ့ရှိကြောင်းသိရပါတယ်။ တချို့တွေကလည်း ပုံမှန်မဟုတ်တဲ့ လိင်ဆက်ဆံခြင်းကို နှစ်ခြိုက်တဲ့အတွက် ညှပ်တာ၊ ရိတ်တာ ရှိသလို တချို့တွေကျတော့လည်း ဒီဆီးခုံမွှေးတွေရှည်လာတဲ့အခါ ချွေးထွက်ရင် အနံ့အသက်မကောင်းဘူး၊ သန်းတွေတွယ်နိုင်ကာ ယားယံတာတွေဖြစ်တယ်လို့ ထင်မြင်ယူဆပြီး ညှပ်တာ၊ ရိတ်တာမျိုးလည်းရှိပါတယ်။
ဆီးခုံမွေးတွေရှည်လာတဲ့အခါ ချွေးထွက်ရင် အနံ့အသက်မကောင်းဘူးဆိုတာ၊ သန်းတွေတွယ်နိုင်ကာ ယားယံတာမျိုးဖြစ်တတ်တယ်ဆိုတာဟာ မှန်သင့်သလောက်မှန်ပေမဲ့ ဆီးခုံမွေးတွေကို ညှပ်တာ၊ ရိတ်တာလုပ်တဲ့အခါမှာ ဖြစ်လာနိုင်တဲ့အန္တရာယ်တွေက သင်မထင်ထားနိုင်လောက်အောင် ကြီးမားပါတယ်။
သုတေသနတွေအရ ဆီးခုံမွေးညှပ်တာရိတ်တာလုပ်တဲ့အခါမှာ ဖြစ်လာနိုင်တဲ့ဆိုးကျိုးတွေကိုသိသလောက်ရေးသားတင်ပြရရင်တော့ အောက်ပါအတိုင်းဖြစ်ပါတယ်။
၁။ လိင်ဆက်ဆံရာမှ တစ်ဆင့်ကူးစက်နိုင်တဲ့ရောဂါ ပိုမိုကူးစက်လွယ်ခြင်း
ဆီးခုံးမွေးရိတ်တာ ညှပ်တာတွေလုပ်တဲ့အခါ လျှပ်စစ်ဂျုတ် (Electronic razor)၊ ရိုးရိုးဂျုတ် (Manual razor)၊ ကတ်ကြေးတွေကို အသုံးပြုကြပါတယ်။ အဲ့အခါမှာ အရေပြားပွန်းပဲ့တာမျိုးတွေဖြစ်နိုင်ပါတယ်။ အရေပြားပွန်းပဲ့တာက မျက်စိနဲ့မြင်ရအောင်ဖြစ်တာမျိုးလည်းရှိသလို မျက်စိနဲ့မမြင်နိုင်တဲ့ အရေပြားပွန်းပဲ့မှုအသေးစားလေးတွေ (Micro-tears) ဖြစ်တာမျိုးလည်းရှိတတ်ပါတယ်။
အဲဒီလိုအချိန် လိင်ဆက်ဆံတဲ့အခါ လိင်မှတစ်ဆင့်ကူးစက်နိုင်တဲ့ရောဂါတွေဖြစ်တဲ့ ကာလသားရောဂါ၊ ဆီးပူညောင်းကျရောဂါ၊ လိင်အဂါကြွက်နို့၊ ရေယုန်ရောဂါ၊ ဘီပိုး၊ စီပိုး၊ အိတ်အိုင်ဗီပိုးစတာတွေကို ပိုမိုကူးစက်လွယ်စေနိုင်ပါတယ်။
၂။ အရေပြားပိုးဝင်ပြီး အနာဖြစ်ခြင်း
ဆီးခုံးမွေးတွေဟာ ဗက်တီးရီးယားပိုးတွေနဲ့ တခြားအန္တရာယ်ရှိတဲ့ အမှုန်အမွှားတွေကို ဖမ်းယူထားပေးပြီး ထိုအရာတွေနဲ့ ဆီးခုံအရေပြားမထိအောင်ကာကွယ်ပေးပါတယ်။ ဆီးခုံမွေးတွေကို ရိတ်တာညှပ်တာတွေလုပ်လို့ ဆီးခုံမွေးတွေမရှိတော့ရင် ဗက်တီးရီးယားပိုးနဲ့ တခြားအန္တရာယ်ရှိ အမှုန်အမွှားတွေဟာ ဆီးခုံအရေပြားနဲ့တိုက်ရိုက်ထိတွေ့ပြီး အရေပြားပိုးဝင်ကာ ပြည်တည်နာဖြစ်တာ၊ ဝက်ခြံဖြစ်တာ စတဲ့ဆိုးကျိုးတွေခံစားရနိုင်ပါတယ်။
၃။ ယားယံခြင်း
ဆီးခုံမွေးတွေကို ရိတ်ပြီးစ၊ ညှပ်ပြီးစမှာသန့်ရှင်းသွားတယ်။ နေလို့ထိုင်လို့ကောင်းသွားတယ်လို့ခံစားရနိုင်ပါတယ်။ ဒါပေမဲ့ သိပ်မကြာတဲ့ရက်ပိုင်းလောက်အတွင်းမှာ အမွေးသစ်အတိုလေးတွေစထွက်လာပြီး အဲဒီအခါမှာ ဆီးခုံတစ်ဝိုက် ယားယံခြင်းကို ဆိုးဝါးစွာခံစားရပါလိမ့်မယ်။
၄။ စိုထိုင်းဆများပြီးပိုးဝင်နိုင်ခြေများခြင်း
ခန္ဓာကိုယ်ရှိ တခြားနေရာတွေလိုပဲ ဆီးခုံနေရာဟာ ချွေးထွက်ပါတယ်။ ဆီးခုံမွှေးတွေဟာ ထွက်တဲ့ချွေးနဲ့ အစိုဓာတ်ကို စုပ်ယူသင့်သလောက်စုပ်ယူပေးပြီး ဆီးခုံနေရာတစ်ဝိုက်အပူချိန်ကိုမျှစေကာ စိုစွတ်မှုဖြစ်မနေအောင် ကာကွယ်ပေးပါတယ်။ ဆီးခုံမွှေးတွေကိုညှပ်တာ၊ ရိတ်တာတွေလုပ်တဲ့အခါမှာ ဆီးခုံနေရာဟာ ချွေးထွက်တဲ့အခါ စိုထိုင်းဆများလာပြီး ဗက်တီးရီးယားပိုးတွေ၊ မှိုပိုးတွေပေါက်ပွားလာနိုင်ပါတယ်။
ဒါတွေကြောင့် အဆုံးသတ်အနေနဲ့ပြောရရင် ဆီးခုံမွေးတွေကို မလိုအပ်ဘဲ ရိတ်တာ၊ ညှပ်တာတွေမလုပ်ပါနဲ့။ တားမရလို့ရိတ်တာ၊ ညှပ်တာတွေလုပ်တယ်ဆိုရင်လည်း ရိတ်ပြီးညှပ်ပြီးချင်း လိင်ဆက်ဆံတာကိုမလုပ်ပါနဲ့။ အနည်းဆုံး သုံးလေးရက်လောက်ရှောင်ပါလို့ အကြံပေးချင်ပါတယ်။
Author: Dr 528
