ဆီးလမ်းကြောင်းပိုးဝင်တယ်ဆိုတာ ဆီးပြွန်၊ ဆီးအိမ်နဲ့ ကျောက်ကပ်စတဲ့ ဆီးလမ်းကြောင်းတစ်လျှောက်က ဘယ်နေရာမှာမဆို ဘက်တီးရီးယား ရောဂါပိုးဝင်တာကို ခေါ်ပါတယ်။
ဆီးလမ်းကြောင်း ပိုးဝင်တဲ့အခါ…
• ဆီးကျန်သလို ခံစားရပြီး မကြာခဏ ဆီးသွားချင်ခြင်း
• ဆီးအနည်ပါပြီး အနံ့နံခြင်း၊ ဆီးအရောင် နောက်နေခြင်း
• ဆီးသွားချိန် နာကျင်ခြင်း၊ အောင့်ခြင်း
• ဆီးထဲသွေးပါခြင်း
• ခါးနာခြင်း
• ဗိုက်အောင့်ခြင်း
• ဖျားခြင်း
• ချမ်းတုန်ခြင်း
• အန်ခြင်း
• ဝမ်းသွားခြင်း စတဲ့ ရောဂါလက္ခဏာတွေ ခံစားရနိုင်ပါတယ်။
အပူချိန်ကြီးပြီး ချမ်းတုန်ဖျားတာ၊ ဆီးထဲ သွေးပါတာ၊ ဗိုက်နဲ့ ခါးက မခံမရပ်နိုင်အောင် အောင့်နေတာမျိုး ခံစားရရင် ဆေးရုံဆေးခန်းကို ချက်ချင်းသွားသင့်ပါတယ်။
ဆီးလမ်းကြောင်း ပိုးဝင်ရခြင်း အကြောင်းရင်းများ…
• အမျိုးသမီးတွေ အထူးသဖြင့် သွေးဆုံးပြီးတဲ့ အမျိုးသမီးတွေက ဆီးလမ်းကြောင်း ပိုးဝင်လွယ်ပါတယ်။ အမျိုးသမီးတွေရဲ့ ဆီးလမ်းကြောင်းက အမျိုးသားတွေထက် ပိုတိုလို့ ပိုးဝင်လွယ်သလို သွေးဆုံးပြီးတဲ့ အမျိုးသမီးတွေမှာ အီစထရိုဂျင်ဟော်မုန်း လျော့နည်းသွားလို့ ဆီးအိမ်နံရံတွေက ပါးလွှာခြောက်သွေ့လာပြီး ဆီးထိန်းနိုင်စွမ်း လျော့နည်းလာကာ ပိုးဝင်ဖို့လည်း လွယ်လာပါတယ်။
• လိင်ဆက်ဆံရာကတဆင့်လည်း ဆီးလမ်းကြောင်း ပိုးဝင်နိုင်ပါတယ်။
• ဆီးကျိတ်ကြီးတဲ့ အမျိုးသားတွေမှာ ဆီးကျန်တတ်လို့ ဆီးလမ်းကြောင်း ပိုးဝင်နိုင်ခြေ များပါတယ်။
• ကျောက်ကပ် ကျောက်တည်သူတွေမှာလည်း ဆီးလမ်းကြောင်း ပိုးဝင်နိုင်ပါတယ်။
• ကိုယ်ဝန်ဆောင်၊ ဆီးချိုရောဂါရှိသူ၊ ဆီးပိုက်ထည့်ထားရတဲ့ နာတာရှည် ရောဂါသည်တွေ၊ ရေများများ သောက်လေ့မရှိသူ၊ လိင်အင်္ဂါတွေတဝိုက်ကို သန့်ရှင်းရေး သေချာ လုပ်လေ့မရှိသူတွေမှာလည်း ဆီးလမ်းကြောင်း ပိုးဝင်နိုင်ပါတယ်။
ဘယ်လို ကုသမလဲ?
ဆရာဝန် ညွှန်ကြားတဲ့ ပိုးသတ်ဆေးကို ရက်အနည်းငယ်ခန့် သောက်ဖို့ လိုအပ်နိုင်ပါတယ်။။ ဆီးသွားရင်နာကျင်တာနဲ့ ခါးနာတာအတွက် အကိုက်အခဲပျောက်ဆေး သောက်နိုင်ပါတယ်။
နာတာရှည် ဆီးလမ်းကြောင်း ပိုးဝင်ရင်တော့ ပိုးသတ်ဆေးကို ၆ လခန့်အထိ သောက်ရနိုင်ပါတယ်။
ဆေးသောက်တာက ယာယီသက်သာနိုင်ပေမယ့် အရေးကြီးတာက နောက်ထပ် ဆီးလမ်းကြောင်း ပိုးဝင်ခြင်း မဖြစ်အောင် ကာကွယ်ဖို့ပါ။
ဘယ်လို ကာကွယ်မလဲ?
• ရေများများသောက်ပါ (တနေ့ကို အနည်းဆုံး ၂ လီတာ သောက်ပါ။ ရေများများ သောက်ပြီး မကြာခဏ ဆီးသွားတာက ဘက်တီးရီးယားတွေ ဆီးအိမ်ထဲမှာ ကြာရှည်မနေနိုင်အောင် လုပ်ဆောင်ပေးပါတယ်)။
• ဆီးကို အောင့်ထားတာမျိုး မလုပ်ပါနဲ့။
• လိင်မဆက်ဆံခင် သန့်ရှင်းရေးလုပ်ပါ။ လိင်ဆက်ဆံပြီးတိုင်း ချက်ချင်း ဆီးသွားပါ။
• ဝမ်းသွားပြီး၊ ဆီးသွားပြီးလို့ သန့်ရှင်းရေး လုပ်ရင် အရှေ့ဘက်မှ အနောက်သို့ ဦးတည်ရာအတိုင်း လုပ်ပါ။ အနောက်မှ အရှေ့သို့ ဦးတည်ရင် စအိုတဝိုက်မှ အညစ်အကြေးနဲ့ ပိုးမွှားတွေက ဆီးလမ်းကြောင်းဆီ ရောက်ရှိလာနိုင်ပါတယ်။
• ဒိုင်ပါနဲ့ အမျိုးသမီး လစဥ်သုံးပစ္စည်းတွေ သုံးတဲ့အခါ မကြာခဏ လဲလှယ်ပေးပါ။
• ချည်သားနဲ့လုပ်တဲ့ အတွင်းခံတွေသာ ဝတ်ဆင်ပါ။ ဘောင်းဘီကျပ်ကျပ် ဝတ်ဆင်တာမျိုး ရှောင်ပါ။
• စအိုနဲ့ ဆီးလမ်းကြောင်းအပေါက်ဝနဲ့ မျိုးပွားအင်္ဂါတဝိုက်ကို အနံ့ပါတဲ့ အပြင်းစား ဆပ်ပြာနဲ့ သန့်စင်ရည်တွေ အသုံးပြုခြင်းမှ ရှောင်ကြဥ်ပါ။
ဆီးလမ်းကြောင်းပိုးဝင်တာကို အချိန်မီ မကုသရင် ကျောက်ကပ်ရောင်ရမ်း ပိုးဝင်တာ၊ သွေးထဲကို ပိုးဆိပ်ပျံ့တာတွေ ဖြစ်ပြီး အသက်အန္တရာယ်ရှိသည်အထိ ဖြစ်နိုင်ပါတယ်။
ဒါကြောင့် ဆီးလမ်းကြောင်း ပိုးဝင်နိုင်ခြေ များသူတွေဟာ ပိုးမဝင်အောင် ဂရုတစိုက် ကာကွယ်ခြင်းဖြင့် မိမိကျန်းမာရေးကို စောင့်ရှောက်သင့်ပါတယ်။
Author: Dr.Yee Mon
