မျက်လုံးကျန်းမာရေးသည် လူ့ခန္ဓာကိုယ်တွင် လွန်စွာမှ အရေးကြီးသော အခန်းကဏ္ဍတစ်ခုဖြစ်ပါသည်။
ထို့ကြောင့် မျက်လုံးကျန်းမာရေးကို အထောက်အကူဖြစ်စေမည့် အစားအသောက်များကို စားသောက်ခြင်းနှင့် မျက်လုံးကျန်းမာရေးကို အန္တရာယ်ဖြစ်စေမည့် အပြုအမူများကို ဂရုပြုရှောင်ရှားခြင်းသည် မဖြစ်မနေ လုပ်ဆောင်သင့်သည့် အရာများဖြစ်ပါသည်။
မျက်လုံးကျန်းမာရေးအတွက် လိုအပ်သော အာဟာရဓာတ်များတွင် Lutein၊ Zeaxanthin ၊ ဗီတာမင် A ၊ ဗီတာမင် C၊ ဗီတာမင် E နှင့် ဇင့်ဓာတ်များ အပါအဝင် Omega-3 Fatty Acids (DHA) သည်လည်း အရေးကြီးသော အခန်းကဏ္ဍမှ ပါဝင်နေပါသည်။
Omega-3 Fatty Acids သည် ခန္ဓာကိုယ်၏ ခုခံအားစနစ်ကို တိုးမြှင့်ပေးခြင်း၊ ဦးနှောက်ကို ဖွံ့ဖြိုးတိုးတက်စေခြင်း၊ နှလုံးသွေးကြောဆိုင်ရာကျန်းမာရေးကို ကောင်းမွန်စေခြင်းနှင့် အခြားသော အရေးကြီးသည့် အင်္ဂါအစိတ်အပိုင်းများနှင့်စနစ်များအတွက် မရှိမဖြစ်လိုအပ်သကဲ့သို့ မျက်လုံးကျန်းမာရေးတွင်လည်း လွန်စွာမှအရေးကြီးသော အခန်းကဏ္ဍမှ ပါဝင်နေပါသည်။
DHA သည် မိခင်၏ ဝမ်းဗိုက်အတွင်းတွင် သန္ဓေသားအဖြစ်နှင့် နေစဉ်ကာလမှစတင်ကာ မွေးဖွားပြီးနောက် ကလေးများကြီးထွားဖွံ့ဖြိုးမှုဖြစ်ပေါ်နေစဉ်ကာလတစ်လျှောက်လုံးတွင် ဦးနှောက်နှင့် မျက်လုံးဆိုင်ရာဖွံ့ဖြိုးတိုးတက်မှုများအတွက် မရှိမဖြစ်လိုအပ်ကြောင်း သက်သေပြုလက်ခံထားကြပါသည်။
American Optometric Association ၏ အဆိုအရ DHA သည် မျက်လုံးတွင် အလင်းနှင့် ပုံရိပ်ဆိုင်ရာ အချက်အလက်များကို လက်ခံသည့်အစိတ်အပိုင်းတစ်ခုဖြစ်သော မြင်လွှာပေါ်တွင် ပမာဏအများဆုံး တည်ရှိနေကြောင်း တွေ့ရှိရပါသည်။
ထို့အပြင် ဦးနှောက်သို့ မျက်လုံးမှ အာရုံကြောဆိုင်ရာ သတင်းပေးပို့ချက်များ ပေးပို့သည့် အရေးပါသည့် လုပ်ငန်းဆောင်တာများကို လုပ်ဆောင်ရာတွင်လည်း အကူအညီပေးကြောင်း တွေ့ရှိရပါသည်။
သို့သော် ခန္ဓာကိုယ်မှ DHA ကို ပမာဏလုံလောက်အောင် မထုတ်လုပ်နိုင်ပါ။ ထို့ကြောင့် လုံလောက်သော DHA ပမာဏကို ရရှိရန် အစားအစာများနှင့် ဖြည့်စွက်အာဟာရများကို ကလေးများအား ကျွေးမွေးပေးရန် လိုအပ်ပါသည်။
သုတေသနလေ့လာတွေ့ရှိချက်များအရ အစားအစာများမှ DHA လုံလောက်စွာ မရရှိခဲ့လျှင် ခန္ဓာကိုယ်တွင် အခြားသောဆိုးကျိုးများနှင့် ချို့တဲ့မှုများဖြစ်ပေါ်သည့်အပြင် အမြင်အာရုံပိုင်းဆိုင်ရာတွင်လည်း ချို့တဲ့မှုများ ဖြစ်ပေါ်ခံစားရခြင်းနှင့် မြင်လွှာပျက်စီးခြင်းများ ဖြစ်ပေါ်ခံစားရကြောင်းတွေ့ရှိရပါသည်။
သို့သော် DHA ကြွယ်၀သော အစားအစာအများစုသည် ကလေးများ နှစ်သက်ကာ လိုလိုလားလား စားသောက်လေ့မရှိသည့် အစားအစာများ ဖြစ်နေခြင်းကတော့ ဖေဖေ၊ မေမေတို့အတွက် ခေါင်းခဲစရာကိစ္စတစ်ခုဖြစ်နေတတ်ပါသည်။
DHA ကြွယ်၀သော အစားအစာများ
DHA ကို အောက်ပါအစားအစာများတွင် ကြွယ်၀စွာ တွေ့ရှိရပါသည်။
- Mackerel ငါး
- Salmon ငါး
- Seabass ငါး
- ကမာ၊ ယောက်သွား
- Sardines ငါး
- ပုဇွန်
- Trout ငါး
- ပင်လယ်ရေညှိ စသည်တို့တွင် DHA ကို ကြွယ်၀စွာ တွေ့ရှိရပါသည်။
ထို့ကြောင့် ကလေးများ၏ အမြင်အာရုံအပါအဝင် ခန္ဓာကိုယ်အတွက် များစွာကောင်းကျိုးပြုသော DHA ကို မချို့တဲ့အောင် အစားအစာများ၊ အခြားဖြည့်စွက်အာဟာရများကို ကျွေးမွေးခြင်းအားဖြင့် ထူးချွန်ထက်မြက်သော ကလေးများဖြစ်အောင် ပြုစုပျိုးထောင်ကြပါစို့ခင်ဗျာ။
Author: Dr. Kyi
