ခွဲစိတ်ထားသော ဒဏ်ရာအနာများတွင် အများဆုံးတွေ့ရနိုင်သော နောက်ဆက်တွဲဆိုးကျိုးမှာ ဒဏ်ရာအတွင်းသို့ ရောဂါပိုးဝင်ခြင်းဖြစ်ပါသည်။
အောက်ပါအချက်များသည် ခွဲစိတ်ထားသော ဒဏ်ရာအနာများတွင် ရောဂါပိုးဝင်ခြင်းဖြစ်နိုင် ခြေများသော အခြေအနေများ ဖြစ်ပါသည်။
– ဆေးလိပ်သောက်သောသူများ
– အသက်အရွယ်ကြီးသောသူများ
– ဆီးချိုသွေးချိုရောဂါရှိသောသူများ
– ခုခံအားစနစ်ကျဆင်းစေသော အကြောင်းရင်းရှိသောသူများ (ဥပမာ HIV လူနာများ၊ သွေးလေးဘက်နာရောဂါကြောင့် ဆေးကုသမှုခံနေရသောသူများ)
-အ၀လွန်သောသူများ
– အာဟာရချို့တဲ့သောသူများ
– ဓာတ်ရောင်ခြည်ကုသမှုခံယူနေသောသူများ
– အရေးပေါ်ခွဲစိတ်မှုများ
– ဝမ်းဗိုက်ပိုင်းဆိုင်ရာခွဲစိတ်မှုများ
– အချိန် နှစ် နာရီထက်ပို၍ကြာမြင့်သော ခွဲစိတ်မှုများ
– အမျိုးသမီးခွဲစိတ်လူနာများ စသည့်အခြေအနေများတွင် ခွဲစိတ်ဒဏ်ရာအနာများသည် ရောဂါပိုးဝင်နိုင်ခြေများကြောင်း တွေ့ရှိရပါသည်။
ခွဲစိတ်ဒဏ်ရာအနာများတွင် ရောဂါပိုးဝင်ရောက်သည့်အခါ ဖြစ်ပေါ်သည့် လက္ခဏာများ
ခွဲစိတ်ဒဏ်ရာအနာများတွင် ရောဂါပိုးဝင်ရောက်သည့်အခါ အောက်ပါလက္ခဏာများကို တွေ့ရှိနိုင်ပါသည်။
– ဒဏ်ရာအနာပတ်ပတ်လည်တွင် နီရဲ၍ နာကျင်လာခြင်း
– အနာကျက်နှေးခြင်း
– အနာမှပြည်ပုပ်များ စိမ့်ထွက်ခြင်း
– အနာမှ မကောင်းသောအနံ့များထွက်ခြင်း
– ကိုယ်ပူခြင်း စသော လက္ခဏာများကို တွေ့ရှိရပါသည်။
ခွဲစိတ်ဒဏ်ရာအနာများကို ကုသရန်နည်းလမ်းများ
ခွဲစိတ်ဒဏ်ရာအနာများကို အောက်ပါနည်းလမ်းများအတိုင်း ဂရုစိုက် ကုသနိုင်ပါသည်။
– ခွဲစိတ်အနာများကို နေ့စဉ်ပုံမှန်သန့်စင်၍ ဆေးထည့်ခြင်းကို စနစ်တကျ လုပ်ဆောင်ရန် အလွန်အရေးကြီးပါသည်။
– ထိုသို့အနာဆေးထည့်ခြင်း ၊ သန့်စင်ခြင်းပြုလုပ်ရာတွင် စနစ်တကျ ပိုးသတ်ထားသော အခြေအနေဖြစ်ရန် လိုအပ်ပါသည်။
– အနာ အနားပတ်ပတ်လည်တွင်ရှိသော အရေပြားများကိုလည်း ဆားရည်နှင့် ဆပ်ပြာဖြင့် သန့်ရှင်းရေးပြုလုပ်ပေးရပါမည်။
– ထို့ပြင် ဒဏ်ရာအနာကိုလည်း ဆားရည် သို့မဟုတ် Normal Saline ဖြင့် ဆေးပေးရန်လိုအပ်ကြောင်း တွေ့ရှိရပါသည်။
– သို့သော်သတိပြုရန် အချက်တစ်ချက်မှာ ခွဲစိတ်ဒဏ်ရာအနာများကို ခွဲစိတ်ပြီး ၄၈ နာရီအတွင်း ထိတွေ့ခြင်းမှ ရှောင်ကြဉ်ရမည် ဖြစ်ပါသည်။
– ခွဲစိတ်လူနာများအား ခွဲစိတ်မှုခံယူပြီး ၄၈ နာရီအတွင်း ရေချိုးခြင်းမှ ရှောင်ကြဉ်ရန်အတွက် ညွှန်ကြားရပါမည်။
– ခွဲစိတ်ဒဏ်ရာအနာများ အမြန်ကျက်စေရန် သို့မဟုတ် ရောဂါပိုးဝင်ခြင်းမှ ကာကွယ်ရန် ပဋိဇီ၀ပိုးသတ်ဆေးများကို တိုက်ကျွေးရန် လိုအပ်ပါသည်။
– ဒဏ်ရာအနာများ နာကျင်ကိုက်ခဲခြင်းကို သက်သာစေရန် အကိုက်အခဲဆေးဝါးများ တိုက်ကျွေးခြင်း သို့မဟုတ် ထိုးနှံခြင်းများပြုလုပ်နိုင်ပါသည်။
ထို့ပြင် အနာအကျက်မြန်စေရန်အတွက် အောက်ပါအချက်များကို လိုက်နာသင့်ကြောင်း အကြံပြုလိုပါသည်။
( ၁ ) ကောင်းစွာအိပ်စက်အနားယူပါ
အိပ်ချိန်နည်းသောသူများထက် အိပ်ချိန်လုံလောက်စွာ အိပ်စက်အနားယူသော သူများသည် ပို၍ မြန်ဆန်စွာ အနာကျက်နိုင်ကြောင်း တွေ့ရှိရပါသည်။ အဘယ်ကြောင့်ဆိုသော် အအိပ်နည်းသောသူများ တွင် အနာရောင်ရမ်းခြင်းကို အားပေးသော Cytokines ဓာတ်များ ပိုမိုထွက်ရှိသောကြောင့် ဖြစ်ပါသည်။
( ၂ ) ဟင်းသီးဟင်းရွက်များကို ပို၍ စားပေးပါ
ဟင်းသီးဟင်းရွက်များကို စားသုံးပေးခြင်းဖြင့် Vitamin A, Copper, Zinc ဟူသော အာဟာရဓာတ်များကို လုံလောက်စွာရရှိနိုင်သောကြောင့် ခုခံအားစနစ်ကို တိုးတက်စေကာ အနာကျက်ခြင်းအတွက် လိုအပ်သော အာဟာရဓာတ်များကို ကောင်းစွာ ဖြည့်ဆည်းပေးနိုင်ကြောင်း တွေ့ရှိရပါသည်။
( ၃ ) လှုပ်ရှားမှုလေ့ကျင့်ခန်းများကို လုပ်ပေးပါ
ပေါ့ပါးသော ကိုယ်လက်လှုပ်ရှားမှုလေ့ကျင့်ခန်းများကို လုပ်ဆောင်ပေးခြင်းဖြင့် ဒဏ်ရာအနာများဆီသို့ စီးဆင်းသော သွေးပမာဏကို ပိုမိုကောင်းမွန်စေသည့်အတွက် အနာကျက်ခြင်းကို မြန်ဆန်စေနိုင်ပါသည်။
( ၄ ) ဆေးလိပ်သောက်ခြင်းမှ ရှောင်ကြဉ်ပါ
ဆေးလိပ်သောက်ခြင်းကြောင့် ခန္ဓာကိုယ်ခုခံအားစနစ်ကို ကျဆင်းစေနိုင်သည့်အပြင် အနာကျက်ခြင်းဖြစ်စဉ်အားလည်း နှောင့်နှေးစေနိုင်ကြောင်းတွေ့ရှိရပါသည်။ ထို့ကြောင့် ခွဲစိတ်ထားသော လူနာများသည် ဆေးလိပ်သောက်ခြင်းမှ ရှောင်ကြဉ်သင့်ပေသည်။
( ၅ ) Vitamin C ပေါကြွယ်၀သော အစားအစာများ စားသုံးပေးပါ
Vitamin C သည် အနာကျက်ခြင်းကို ကောင်းစွာအားပေးသော အာဟာရဓာတ်တစ်မျိုး ဖြစ်သောကြောင့် ၎င်းဓာတ်ပါဝင်သော အားဆေးများ နှင့် Vitamin C ပေါကြွယ်၀စွာပါဝင်သော အစားအစာများကို စားသုံးပေးသင့်ပါသည်။
Vitamin C ပေါများစွာ ပါဝင်သော အစားအစာများမှာ
– ချဉ်သောသစ်သီးများ (ဥပမာ သံပရာသီး ၊ သံပယိုသီး )
– အခြားသစ်သီးအမျိုးမျိုး
– အစိမ်းရောင်အရွက်ရှိသော ဟင်းသီးဟင်းရွက်များ
– ကန်စွန်းဥ
– ခရမ်းချဉ်သီး
– ငရုတ်ပွ
– ငရုတ်သီးစိမ်း
– နှံစားသီးနှံများစသည့် အစားအစာများဖြစ်ကြပါသည်။
Author : Dr. CK
