လူ့ခန္ဓာကိုယ်ရဲ့ ဇီဝကမ္မလုပ်ငန်းတွေအတွက် မရှိမဖြစ်လိုအပ်တဲ့ Essential Fatty Acid ဖြစ်တဲ့ Omega 3 Fatty Acids (အိုမီဂါ-3 ဖက်တီးအက်ဆစ်)တွေအနက် တစ်မျိုးကတော့ ဒီချိတ်အေ DHA (Docosahexaenoic Acid) ဖြစ်ပါတယ်။ DHA ဟာ ကလေးများဦးနှောက်ဖွံ့ဖြိုးမှုအတွက် မရှိမဖြစ်လိုအပ်တဲ့ အိုမီဂါ-3 ဖက်တီးအက်ဆစ်ဖြစ်တယ်။ ဦးနှောက်ရှိ အိုမီဂါ-3 ဖက်တီးအက်ဆစ်ရဲ့ ၉၇% နဲ့ အဆီဓာတ် ၂၅% မှာ DHA ပါဝင်ပါတယ်။ ကိုယ်ဝန်ဆောင်ကာလမှာ မိခင်ရဲ့ အစားအသောက်မှတဆင့် ရရှိသော DHA ဟာ သန္ဓေသားရဲ့ ဦးနှောက်နဲ့ အမြင်အာရုံဖွံ့ဖြိုးမှုကို ထောက်ပံ့ပေးတဲ့အပြင် ဦးနှောက်တွင်းရှိ အာရုံကြောဆဲလ်အမြှေးပါးတွေ တည်ဆောက်ရာမှာ အရေးပါပါတယ်။
DHA ကို လူ့ခန္ဓာကိုယ်မှ သဘာဝအတိုင်းမထုတ်နိုင်သဖြင့်
နေ့စဉ်စားသုံးသောအစားအစာနဲ့
ဖြည့်စွက်အားဆေး၊ ဖြည့်စွက်စာ (Supplement) တွေကတစ်ဆင့်သာ
ရရှိနိုင်ပါတယ်။
ဒါ့ကြောင့် ကိုယ်ဝန်ဆောင်မိခင်တွေဟာ အိုမီဂါ-3 ဖက်တီးအက်ဆစ် လုံလောက်ရန်အထူးလိုအပ်ပါတယ်။ ကလေးတွေမှာ DHA မလုံလောက်ပါက ဉာဏ်ရည်ဖွံ့ဖြိုးမှု၊ သင်ယူနိုင်စွမ်းနဲ့ အမြင်အာရုံဆိုင်ရာ ပြဿနာတွေ ဖြစ်လာနိုင်ပါတယ်။ ကလေးတွေရဲ့ ခန္ဓာကိုယ်ကျန်းမာရေးအပြင် ကောင်းစွာအိပ်စက်ခြင်းနဲ့ စိတ်ပိုင်းဆိုင်ရာ ပျော်ရွှင် ကျန်းမာမှုကိုလည်း ကောင်းမွန်စေတဲ့ဓာတ်ဖြစ်ပါတယ်။ ကျန်းမာဖွံ့ဖြိုးတဲ့ ဦးနှောက်၊မျက်စိ၊ ကိုယ်ခံအားစနစ်နဲ့ အသက်ရှူလမ်းကြောင်းဖြစ်အောင် DHA က ထောက်ပံ့ပေးနိုင်ပါတယ်။ ဒါ့ပြင် ပန်းနာရင်ကြပ်ရောဂါဖြစ်နိုင်ခြေကိုလည်း လျှော့ချပေးနိုင်ပါသည်။
ဒါ့ပေမဲ့ DHA ကို လူ့ခန္ဓာကိုယ်မှ သဘာဝအတိုင်းမထုတ်နိုင်သဖြင့် နေ့စဉ်စားသုံးသောအစားအစာနဲ့ ဖြည့်စွက်အားဆေး၊ ဖြည့်စွက်စာ (Supplement) တွေကတစ်ဆင့်သာရရှိနိုင်ပါတယ်။ ဒါကြောင့် မိမိကလေးများ ကျန်းမာပြီး ဉာဏ်ရည်မြင့်မားတဲ့ ကလေးတွေဖြစ်စေရန် နေ့စဉ်စားသုံးတဲ့ အစာအာဟာရတွေမှာ DHA ပါဝင်အောင် မိဘတွေက အမြဲဂရုစိုက်သင့်ပါတယ်။
DHA ကြွယ်ဝသော အစားအစာများ
-ငါးအမျိုးမျိုး၊ ပင်လယ်ငါးတွေဖြစ်တဲ့ ဆော်လမွန်ငါး၊ ဆာဒင်း၊ ဆာဘငါး၊ မက်ကရယ်ငါးများ၊ တူနာငါး၊ ငါးသလောက်၊ ငါးနီတူငါး၊ ငါးမြစ်ချင်း၊ ငါးပါးနီ
-ပင်လယ်စာ ခရု၊ ကမာအမျိုးမျိုး
-ပဲပုပ်စေ့ဆီ၊ ကနိုးလာဆီ Canola Oil) နဲ့ Flax Seed oil ခေါ် အပင်မှထွက်တဲ့အဆီများ
-အစေ့အဆန်တွေဖြစ်တဲ့ သီဟိုလ်စေ့၊ သစ်ကြားသီး၊ နှမ်းစေ့၊ ကြယ်ပဲစေ့၊ ချီယာစေ့ (Chia seeds)
– DHA ပါဝင်တဲ့ ကလေးနို့မှုန့်များ
-ငါးကြီးဆီအမျိုးမျိုးတို့ဖြစ်ပါတယ်။
DHA နေ့စဉ်သောက်သုံးသင့်တဲ့ပမာဏ Reference Daily Intake (RDI) ကို တိတိကျကျသတ်မှတ်ထားခြင်း မရှိပေမဲ့ လူကြီးတွေအတွက် ပျမ်းမျှအားဖြင့် ၂၅၀-၅၀၀ မီလီဂရမ်ကြားနဲ့ တစ်နေ့ ၂၀၀၀ မီလီဂရမ်ထက်မပိုသင့်ကြောင်း အကြံပြုထားပါတယ်။ တစ်နှစ်မှသုံးနှစ်အရွယ် ကလေးတွေအတွက် ပျမ်းမျှလိုအပ်တဲ့ DHA ပမာဏမှာ တစ်နေ့လျှင် ၇၀-၁၀၀ မီလီဂရမ်ကြားလို့ ဖော်ပြထားပါတယ်။
ဒါကြောင့် ကလေးတွေကို ငါးကြီးဆီ DHA ပါဝင်တဲ့ ဖြည့်စွက်အားဆေး ဖြည့်စွက်စာတွေကို တတ်ကျွမ်းနားလည်တဲ့ ကလေးအထူးကုဆရာဝန်တွေရဲ့ ညွှန်ကြားချက်အတိုင်းသာ တိုက်ကျွေးသင့်ပါတယ်။ ကလေးတွေရဲ့ ဦးနှောက်ဖွံ့ဖြိုးမှုကို အလေးထားတဲ့ မေမေဖေဖေတို့အနေနဲ့ ကလေးတွေအတွက် ရောဂါကာကွယ်တားဆီးပေးပြီး ကိုယ်ခံအားကိုကောင်းမွန်စေတဲ့၊ မှတ်ဉာဏ်အားကောင်းပြီးထက်မြက်ထူးချွန်စေတဲ့ ကောင်းကျိုးအာနိသင်ရှိတဲ့ DHA ပါဝင်တဲ့ အစားအစာ အားဖြည့်ဆေးတွေကို နေ့စဉ်လုံလောက်စွာကျွေးပေးဖို့ လိုအပ်တဲ့အကြောင်း အသိပေးရေးသားလိုက်ရပါတယ်ရှင့်………
Author: Dr. Yee Mon
