သားသားမီးမီးတို့ကလေးအရွယ်သည် ခန္ဓာကိုယ်ကြီးထွားဖွံ့ဖြိုးတိုးတက်ရန်အတွက် အလွန်အရေးပါသော အရွယ်ဖြစ်ပါသည်။ ငယ်ရွယ်စဉ်ကာလတွင် သားသားမီးမီးတို့၏ခန္ဓာကိုယ်သည် တည်ဆောက်ပုံအရသာမက ခန္ဓာကိုယ်တွင်း လုပ်ငန်းဆောင်တာဖြစ်စဉ််ဖွံ့ဖြိုးရန် အတွက်လိုအပ်ပါသည်။
ဖွံ့ဖြိုးမှု အမြန်ဆုံးကလေးအရွယ်တွင် ပုံမှန်တန်းတူကြီးထွားစေရန်အတွက် ကလေးငယ်များ၏ မျိုရိုးဗီဇ၊ အစားအသောက် အနေအထိုင် သန့်ရှင်းမှု စသည့်အချက်များအပေါ်တွင် မူတည်ပါသည်။ ထိုကဲ့သို့ များစွာသောအချက်များထဲမှ ပုံမှန်ဖွံ့ဖြိုးရန်အတွက် ငယ်ရွယ်စဉ်ကတည်းကပင် ခန္ဓာကိုယ်အတွက် အရေးကြီးသောအာဟာရဓာတ်များမှ တစ်ခုဖြစ်သည့် DHA (Docosahexaenoic Acid )နှင့် EPA (Eicosapentaenoic Acid) ဟုခေါ်သည့် Omega 3 Polyunsaturated Fatty Acid ရရှိရန်လိုအပ်ပါသည်။
DHA နှင့် EPA သည် ကလေးငယ်များ၏ ဇီဝကမ္ဗဗေဒဖြစ်စဉ်တွင် အရေးပါသောအခန်းကဏ္ဍတွင် ပါဝင်ပါသည်။ Omega3 အုပ်စုဝင်တူဖြစ်သည့် EPA နှင့် DHA မတူသည့်အချက်မှာ DHA သည် ဦးနှောက်စွမ်းရည် ဖွံ့ဖြိုးမှု အပိုင်းတွင်များစွာသောလုပ်ငန်းဆောင်တာပါဝင်၍အကျိုးများရှိပါသည်။
DHA ပြည့်ဝခြင်း၏ အကျိုးများမှာ
-အမြင်အာရုံဖွံ့ဖြိုးမှု ကောင်းခြင်း
-အာရုံခံမျက်ကြောလွှာ ဖွံ့ဖြိုးခြင်း
-ဦးနှောက်ဖွံ့ဖြိုးမှုစွမ်းရည် တိုးတက်စေခြင်း
-ဘာသာစကားစွမ်းရည် ဖွံ့ဖြိုးခြင်း
-သိမြင်တတ်သောစွမ်းရည်ကောင်းခြင်း
-စိတ်ပိုင်းဆိုင်ရာ တိုးတက်ခြင်း
-အာရုံစူးစိုက်နိုင်မှုတို့ကို ဖွံ့ဖြိုးတိုးတက်ခြင်း
-နှစ်ခြိုက်စွာအိပ်စက်နိုင်ခြင်း
-ခုခံအားကောင်းမွန်ခြင်း
DHA သည် ဦးနှောက်ဖွံ့ဖြိုးမှုပိုင်းသာမက
-ပန်းနာရင်ကျပ်ရောဂါ၊
-တစ်စုံတစ်ရာကိုထိမိစားမိ၍ယားယံခြင်း၊ ဖျားနာခြင်းဝေဒနာခံစားရခြင်း၊
-ADHD ဟုခေါ်သည့် အာရုံစိုက်သည့်အခါ ခက်ခဲခြင်း၊
-သာမာန်ထက်စိတ်တက်ကြွသည့်ရောဂါကိုလည်းကာကွယ်ပေးနိုင်ပါသည်။
DHA ဓာတ်ချို့တဲ့ပါက သားသားမီးမီးကလေးငယ်များတွင်
-ဦးနှောက်စွမ်းရည်တိုးတက်မှုနှေး၍ ဖွံ့ဖြိုးမှုပိုင်း၊
-တွေးခေါ်မှုပိုင်း၊
-သင်ယူမှုပိုင်း၊
-သိရှိနားလည်မှုပိုင်းနှင့် ပြောဆိုဆက်ဆံမှုပိုင်းများတွင် ချို့ယွင်းမှုများဖြစ်နိုင်ပါသည်။
ဦးနှောက်ဖွံ့ဖြိုးမှုအတွက် DHA လိုအပ်သောကြောင့် မွေးကင်းစကလေးအရွယ်မှစ၍သာမက မိခင် ကိုယ်ဝန်ဆောင်နေချိန်တွင်လည်း လုံလောက်စွာရရန်အရေးကြီးပါသည်။ DHA ကို မိခင်နို့မှတစ်ဆင့်လည်းကောင်း၊ DHA ပါသည့် အာဟာရဖြည့်စွက်စာ အားဆေးများမှလည်းကောင်းရရှိနိုင်ပါသည်။
အဆိုပါအကြောင်းရင်းများကြောင့် မိဘများအနေဖြင့် မိမိတို့၏ သားသားမီးမီးလေးများကို လုံလောက်သည့် DHA ရရှိစေရန်ကိုယ်ဝန်ဆောင်စဉ်ကာလနှင့် မိခင်နို့တိုက်ကျွေးစဉ်ကာလတွင် မိခင်များသည် DHA ပါဝင်သောအစားအစာများလုံလောက်အောင်စားသုံးရန်နှင့် သားသားမီးမီးတို့ကို လည်း DHA ပါသည့် အစားအစာ၊အာဟာရဖြည့်စွက်စာများတိုက်ကျွေးရန်လိုအပ်ပါသည်။
မိခင်နို့တိုက်ကျွေးသောကလေးများတွင် DHA+EPA 50-100 mg ဖြည့်စွက်လျှင် လုံလောက်ပါသည်။ သို့သော် မိခင်နို့မသောက်သုံးသော ၁ နှစ်အောက် ကလေးငယ်များအတွက် တစ်နေ့လျှင် DHA + EPA 500 mg သောက်သုံးလျှင်လုံလောက်ပြီး ၁ နှစ်မှ ၃ နှစ်ကလေးငယ်များအတွက် DHA+EPA 800 mg ပမာဏ ဆိုလျှင် လုံလောက်ပါသည်။
မိမိတို့၏ရင်သွေးငယ်အတွက်လုံလောက်သော DHA အာဟာရဓာတ်ကို မတိုက်ကျွေးမီ ဆရာဝန်နှင့် သေချာဆွေးနွေးတိုင်ပင်ပြီးမှ တိုက်ကျွေးရန် အကြံပြုလိုပါသည်။
သားသားမီးမီးတို့ DHA ဓာတ်ပြည့်ဝကာ ဉာဏ်ရည်ဖွံ့ဖြိုးတိုးတက်ပြီး ကျန်းမာပျော်ရွှင်ကြပါစေကြောင်း ဆုမွန်ကောင်းတောင်းအပ်လိုက်ပါသည်။
Author: Dr. Win
