အမျိုးသမီးများ ဓမ္မတာလာစဉ် ဘာကြောင့်နာကျင်ကိုက်ခဲရတာလဲ

ဓမ္မတာလာစဉ်နာကျင်ကိုက်ခဲခြင်း ဝေဒနာသည် အမျိုးသမီးအများစု လစဉ်ကြုံတွေ့ရတတ်သည့် ရောဂါပြဿနာတစ်ရပ်အဖြစ် တွေ့ရှိရပါသည်။ ၎င်းရောဂါဝေဒနာဖြစ်ပွားရခြင်း၏ အကြောင်းရင်းသည် ရာသီဓမ္မတာလာစဉ်တွင် သားအိမ်ရှိ ကြွက်သားများကျုံ့ညှစ်ခြင်းကြောင့်ဖြစ်ကြောင်း လေ့လာချက်များအရ သိရှိရပါသည်။

အောက်ပါ အမျိုးသမီးမီးယပ်ရောဂါအချို့ကြောင့်လည်း ဓမ္မတာလာစဉ် နာကျင်ကိုက်ခဲခြင်းဝေဒနာကို ခံစားရနိုင်ကြောင်း တွေ့ရှိရပါသည်။

( ၁ ) Endometriosis
သားအိမ်၏ အနားသားကို ဝန်းရံထားသည့် တစ်ရှူးများ သားအိမ်၏ ပြင်ပတွင်တည်ရှိနေသော ရောဂါအခြေအနေကို  Endometriosis ဟုသတ်မှတ်ပါသည်။ အထက်ပါရောဂါရှိသောသူများတွင် ရာသီဓမ္မတာလာစဉ် ၎င်းတစ်ရှူးအပိုင်းအစများမှ သွေးယိုခြင်း၊ သားအိမ်ရောင်ရမ်းခြင်း ၊ နာကျင်ကိုက်ခဲခြင်းတို့ကို ခံစားရလေ့ရှိပါသည်။

( ၂ ) Adenomyosis
Adenomyosis သည် သားအိမ်တွင် အသားလုံးများဖြစ်သည့် အမျိုးသမီး မီးယပ်ရောဂါ အခြေအနေတစ်ရပ်ဖြစ်ပါသည်။ ၎င်းရောဂါခံစားနေရသူများတွင် သားအိမ်အရွယ်အစားသည် ပုံမှန်ထက် ပိုမို၍ ကြီးမားနေခြင်းကြောင့် ဓမ္မတာလာစဉ် နာကျင်ကိုက်ခဲခြင်းကို ခံစားရလေ့ရှိပါသည်။

( ၃ ) Pelvic Inflammatory Disease ( PID )
သားအိမ်တွင် ရောဂါဖြစ်ပွားစေသော ဗက်တီးရီးယားပိုးများသည် အခြားသော မျိုးပွားအင်္ဂါရပ်များဆီသို့ ပျံ့နှံ့သွားသည့် ရောဂါအခြေအနေတစ်ရပ်ကို Pelvic Inflammatory Disease ( PID ) ဟုခေါ်ပါသည်။
၎င်းသည်လည်း ဓမ္မတာလာစဉ် နာကျင်ကိုက်ခဲခြင်းကို ဖြစ်စေသည့် အကြောင်းရင်းတစ်ရပ်တွင် ပါဝင်ပါသည်။

( ၄ ) Cervical stenosis
ထို့ပြင် Cervical stenosis ( သားအိမ်ခေါင်းကျဉ်းမြောင်းနေခြင်း ) အခြေအနေသည်လည်း ရာသီလာစဉ် နာကျင်ကိုက်ခဲခြင်းကို ဖြစ်စေသည့် အကြောင်းရင်းများမှ တစ်ချက်ဖြစ်ကြောင်း လေ့လာတွေ့ရှိရပါသည်။

ဓမ္မတာကြောင့် နာကျင်ကိုက်ခဲလျှင် ခံစားရသော ရောဂါလက္ခဏာများ
– ဝမ်းဗိုက်တွင် နာကျင်ကိုက်ခဲခြင်း
– ဝမ်းဗိုက်တွင် တင်းကျပ်သည့် ဝေဒနာကို ခံစားရခြင်း
– တင်ပါး၊ ခါးနှင့် ပေါင်အတွင်းဘက်တွင် နာကျင်ခြင်းဝေဒနာကို ခံစားရခြင်း စသည့်ရောဂါလက္ခဏာများကို ခံစားရလေ့ရှိပါသည်။

ရောဂါကုသခြင်းနည်းလမ်းများ
– ဓမ္မတာလာစဉ် နာကျင်ကိုက်ခဲခြင်းဝေဒနာကို သက်သာစေရန် Ibuprofen ကဲ့သို့သော အကိုက်အခဲပျောက်ဆေးဝါးများကို သောက်သုံးနိုင်ပါသည်။
၎င်းဆေးဝါးတွင် Prostaglandins ဟူသော နာကျင်ခြင်းဝေဒနာကို အားပေးသည့် ဒြပ်ပေါင်းများထုတ်လွှတ်ခြင်း အား လျော့နည်းစေနိုင်သည့် အာနိသင်ရှိကြောင်းတွေ့ရှိရပါသည်။
ထို့အတူ အခြားသော အကိုက်အခဲပျောက်ဆေးဝါးများကိုလည်း နာကျင်ကိုက်ခဲခြင်းအား သက်သာစေရန် အသုံးပြုနိုင်ပါသည်။
– ခါးအနောက်ဘက်နှင့် ဝမ်းဗိုက်နေရာတွင် ရေနွေးအိတ် သို့မဟုတ် ရေနွေးပုလင်းကပ်ခြင်းကို ပြုလုပ်ပေးပါ။
– ဓမ္မတာလာစဉ်တွင် ပုံမှန်အချိန်များထက် ပို၍အနားယူပါ။
– ကဖင်းဓာတ်ပါသည့် အစားအစာများကို စားသုံးခြင်းမှ ရှောင်ကြဉ်ပါ။
– ဆေးလိပ်နှင့် အရက်သောက်ခြင်းမှ ရှောင်‌ကြဉ်ပါ။
– ခါးနောက်ဘက်နှင့် ဝမ်းဗိုက်နေရာတို့ကို ဖြည်းညင်းစွာ နှိပ်နယ်ပေးပါ။
– ကိုယ်လက်လှုပ်ရှားမှု လေ့ကျင့်ခန်းများကို ပုံမှန်လုပ်ဆောင်ပေးပါ။
– ယောဂလေ့ကျင့်ခန်းများပြုလုပ်ခြင်း
– အပ်စိုက်ကုထုံးဖြင့် ကုသခြင်း
– အသက်ရှူလေ့ကျင့်ခန်းများပြုလုပ်ခြင်းစသည့် နည်းလမ်းများဖြင့်လည်း ရောဂါဝေဒနာကို သက်သာစေနိုင်မည် ဖြစ်ပါသည်။

ထို့ပြင် အောက်ပါသဘာ၀နည်းလမ်းများဖြင့်လည်း ဓမ္မတာနာကျင်ကိုက်ခဲခြင်းကို သက်သာစေနိုင်ကြောင်း လေ့လာသိရှိရပါသည်။
– လာဗင်ဒါအဆီ ၊ နှင်းဆီ အဆီ ၊ အုန်းဆီ စသည့် အဆီတစ်မျိုးမျိုးဖြင့် ဝမ်းဗိုက်၏ ချက်ပတ်လည်ကို
နှိပ်နယ်ပေးခြင်းဖြင့် သွေးလည်ပတ်မှုကို ကောင်းမွန်စေခြင်းနည်းလမ်းဖြင့်လည်း နာကျင်ခြင်းဝေဒနာကို သက်သာစေပါသည်။
– ရေနွေးထည့်ထားသည့်ရေချိုးကန်တွင် ၁၅ မိနစ်ခန့် ရေစိမ်နေခြင်းဖြင့် တင်ပါးရှိ ကြွက်သားများအား
ပြေလျော့စေနိုင်သည့် နည်းလမ်းဖြင့်လည်း နာကျင်ကိုက်ခဲခြင်းဝေဒနာ လျော့ပါးသက်သာနိုင်မည် ဖြစ်ပါသည်။
– ကယ်လ်စီယမ် ၊ ဗီတာမင် B6 ၊ B1၊ ဗီတာမင် E၊ ဗီတာမင် D ၊ဗီတာမင် B12 ၊ မဂ္ဂနီဆီယမ် ၊ ဇင့် ၊ ငါးကြီးဆီ
စသည့် အာဟာရဖြည့်စွက်စာအားဆေးများကို သောက်သုံးခြင်းဖြင့်လည်း ရောဂါဝေဒနာကို သက်သာစေနိုင်ပါသည်။
– ရာသီဓမ္မတာလာစဥ် တစ်နေ့လျှင် အနည်းဆုံး ရေ ၈ ဖန်ခွက်ခန့် သောက်ခြင်းဖြင့်လည်း
နာကျင်ကိုက်ခဲမှု လျော့ပါးသွားမည် ဖြစ်ပါသည်။

အထက်ပါ ဆောင်ရန်ရှောင်ရန်နည်းလမ်းများကို လိုက်နာခြင်းဖြင့် အမျိုးသမီးများလစဉ် ဓမ္မတာလာစဉ်ကြုံတွေ့ရသော ရောဂါဝေဒနာသက်သာစေမည်ဖြစ်ကြောင်း အကြံပြုအပ်ပါသည်။

Author: Dr. မိုး ဆေး ( ၁ )