အမျိုးသမီးတို့၏ ပြေပြစ်သော ခန္ဓာကိုယ်အချိုးအစားသည် မြင်သူတိုင်းအား ဆွဲဆောင်နိုင်ပြီး၊ စွဲမက်ဖွယ်ရာ ဖြစ်ပေသည်။ အရွယ်ရောက်ချိန်တွင် ရုပ်ပိုင်းဆိုင်ရာပြောင်းလဲမှုများအနေဖြင့် ရင်သား ဖွံ့ဖြိုးလာဖြင်း၊ တင်ဆုံ ကြီးထွားလာခြင်း၊ ခါးသေးသိမ်လာခြင်းနှင့် ခန္ဓာကိုယ်နေရာ အနှံ့၌ သူ့နေရာနှင့်သူ မျှတစွာ အဆီပျံ့နှံ့နေမှုကြောင့် အမျိုးသမီးတစ်ဦး၏ လှပသော သွင်ပြင်လက္ခဏာများ ဖြစ်ပေါ်လာရသည်။ အမျိုးသမီးတို့အား မိန်းမငယ်လေးဘဝမှ ခန္ဓာကိုယ် အချိုးအစား ကျနအောင် ပြုပြင်ဆောင်ရွက်ပေးလိုက်သည်မှာ အီစထရိုဟော်မုန်းပင် ဖြစ်သည်။
သဘာဝက ပြင်ဆင်ပေးလိုက်သော ခန္ဓာကိုယ်အလှအပကို ပေါ်လွင်အောင် ထပ်မံ မွမ်းမံပေးနိုင်သည့်အရာမှာ ဝတ်စားဆင်ယင်မှုပင် ဖြစ်သည်။ ဝတ်စားဆင်ယင်မှုတွင် မိမိနှင့် လိုက်ဖက်အောင် ရွေးချယ်ဝတ်ဆင်တတ်ကြဖို့ လိုအပ်သည်။ အဝတ်အစား၏ ပုံစံမှစ၍ အရောင်အသွေး ရွေးချယ်မှုအထိ အရေးကြီးပါသည်။ ဝတ်စားဆင်ယင်မှုကြောင့် ပို၍ လှပစေနိုင်သည်။ ပို၍ မိန်းမပီသမှုကို ပြနိုင်သည်။ ဆွဲဆောင်မှုအားလည်း ဖြစ်စေသည်။ ဤတွင် တစ်ခု သတိပြုရသည်မှာ မိမိ၏ ယဉ်ကျေးမှုနှင့် ကိုက်ညီဖို့ပင် ဖြစ်သည်။
ခါးအဝတ်အစား သို့မဟုတ် စကတ်သည် အမျိုးသမီးတို့၏ အလှအပကို ပေါ်လွင်မှုရှိအောင် အဓိက ပံ့ပိုး ကူညီပေးနိုင်သည်။ ခါးအဝတ်အစား သို့မဟုတ် စကတ်မျိုးစုံ ရှိကြောင်း တွေ့ရသည်။ အဝတ်အစားကြောင့် ခါးအား သေးသွယ်လှပစေသည်။ အမျိုးသမီးတို့၏ ကောက်ကြောင်းများကို ပိုမို ပေါ်လွင် ထင်ရှားစေနိုင်သည်။
ခါးအဝတ်အစားနှင့် ပတ်သက်၍ တီထွင်ဖန်တီးမှုများကို ယခင် ကာလများစွာကပင် မြင်တွေ့ရနိုင်သည်။ ၁၉ ရာစုနှစ်တွင် ခါးကို ဆွဲညှစ်ပေးထားပြီး ခါး၏ အလှကို ပိုမို ပေါ်လွင်စေမည့် အဝတ်အစား “Corsets” ဆိုသည်မှာ ပေါ်လာခဲ့သည်။ ၁၉၇၀ ခုနှစ် ဝန်းကျင်ကလည်း “Wraparound Dresses” များကို ထည့်သွင်းကာ ဝတ်ဆင်လာခဲ့ကြသည်။ ခါးကို လှပအောင် ပြင်ဆင်လိုက်ခြင်းဖြင့် ရင်နှင့် တင်တို့၏ အလှအပကို သွယ်ဝိုက်၍ ဖော်ကျူးပေးလိုက်နိုင်ကြသည်။
ဆေးပညာတွင် ခါးတင်အချိုး waist-hip ratio ကို ကျန်းမာရေး အတွက် တိုင်းတာလေ့ရှိသ
ည်။ ခါးတင်အချိုးသည် အမျိုးသားများအတွက် ဝ.၉ အောက် ရှိသင့်ပြီး အမျိုးသမီးများအတွက် ဝ.၈၅ အောက်၌သာ ရှိသင့်သည်။ ခါးတင်အချိုး မြင့်မားလာခြင်းသည် ကျန်းမာရေးအတွက် အန္တရာယ်ရှိနေပြီ ဟု အချက်ပြလိုက်ခြင်းပင် ဖြစ်သည်။
ခါးတင်အချိုး မြင့်တက်လာခြင်းသည် ဝမ်းဗိုက်၌ အဆီများ စုပုံနေပြီဟု သတိပေးလိုက်ခြင်း ဖြစ်သည်။ ဝမ်းဗိုက်၌ အဆီများ စုလာခြင်းသည် ခန္ဓာကိုယ် တခြားနေရာများ၌ အဆီများစုလာခြင်းထက် ပို၍ အန္တရာယ်ရှိကြောင်း တွေ့ရသည်။ နာတာရှည်ရောဂါများ ဖြစ်ကြသော နှလုံးသွေးကြောရောဂါ၊ သွေးချိုဆီးချိုရောဂါ၊ သွေးတိုးရောဂါ နှင့် ကင်ဆာရောဂါ များ ဖြစ်နိုင်ဖို့ အလားအလာများလာသည်။
အမျိုးသမီးများတွင် ခါးတင်အချိုးမှာ ကျန်းမာရေးအတွက်သာမက အလှအပ အတွက်လည်း စံကိန်းတစ်ခု ဖြစ်နိုင်သည်။ ခါးတင်အချိုး မြင့်လာလျှင် ခန္ဓာကိုယ်အချိုးအစား လှပမှု ယိုယွင်းလာသည့် သဘောဖြစ်သည်။ ခါးတင်အချိုး မျှတမှုကို အီစထရိုဂျင် ဟော်မုန်းကပင် စွမ်းဆောင်ပေးသည်ဟု ဆိုသည်။
ခါးတင်အချိုး လှပမှုနှင့် ပတ်သက်၍ ကျွမ်းကျင်ပညာရှင်များက စံနမူနာအဖြစ် Marilyn Monroe သို့မဟုတ် Scarlett Johansson ကိုပြသခဲ့သည်။ ခါးတင်အချိုး Waist-hip ratio မှာ ဝ.၇ သာ ရှိသည်။ ခါးတင်အချိုး မျှတ၍ ခန္ဓာကိုယ်အချိုးအဆ လှပမှုသည် အမျိုးသားများ၏ စွဲမက်မှု ဖြစ်စေသည်ဟု ကျွမ်းကျင်ပညာရှင်များက ထုတ်ဖော်ပြောကြားခဲ့သည်။ အဝတ်အစားကို ခန္ဓာကိုယ်အပြည့် လုံခြုံအောင် ဝတ်ဆင်ထားစေကာမူ ခါးတင်အချိုး မျှတ၍ လှပနေလျှင် သင်၏ခန္ဓာကိုယ် လှပမှုမှာ ပေါ်လွင်နေမည်သာဖြစ်ပြီး မြင်သူတိုင်း စွဲမက်ဖွယ်ရာ ဖြစ်ပေလိမ့်မည်။
Author: ဒေါက်တာအေးကျော် (ဇီဝကမ္မဗေဒ)
