က​လေး​မီးဖွားပြီး​ သွေးအားနည်းခြင်း

ကလေးမွေးဖွားပြီးနောက်မှာ မိခင်​တွေကြုံတွေ့ရလေ့ရှိတဲ့ ကျန်းမာရေးပြဿနာတစ်မျိုးကတော့ သွေးအားနည်းခြင်းပဲဖြစ်ပါတယ်။ သွေးအားနည်းခြင်းဆိုတာဟာ ဟေမိုဂလိုဘင်ပမာဏ ရှိသင့်တာထက်​​လျော့နည်းနေခြင်းကို ဆိုလိုပါတယ်။ ဟေမိုဂလိုဘင်ဟာ သွေးနီဥဆဲတွေအတွင်းမှာတည်ရှိပြီး အောက်ဆီဂျင်ကိုသယ်ယူပို့ဆောင်ပေးပါတယ်။ ဟေမိုလိုဘင်ဖွဲ့စည်းမှုမှာ သံဓာတ်မရှိမဖြစ်လိုအပ်ပြီး သံဓာတ်ချို့တဲ့တဲ့အခါ သွေးအားနည်းခြင်းကို ဖြစ်လာစေနိုင်ပါတယ်။

ကလေးမီးဖွားနေစဉ်အတွင်းမှာ မိခင်တွေဟာ သွေးအမြောက်အမြားဆုံးရှုံးရတာကြောင့် သံဓာတ်ချို့တဲ့ပြီး သွေးအားနည်းရောဂါဖြစ်လာစေနိုင်ပါတယ်။ ဒါ့အပြင် အခြားအ​ကြောင်းအရင်း​တွေဖြစ်တဲ့- ကိုယ်ဝန်​ဆောင်ကာလမှာ သံဓါတ်ပါဝင်တဲ့ အစားအစာ​တွေကို လုံလုံ​လောက်​လောက်မစားသုံးခြင်း၊ အစာအိမ်နဲ့အူလမ်း​ကြောင်း​ရောဂါအခံများရှိခြင်း​ကြောင့် ခန္ဓာကိုယ်မှ သံဓါတ်ကို​ကောင်း​ကောင်းမစုပ်ယူနိုင်ခြင်း စတာတွေကြောင့် ကလေးမွေးဖွားပြီးတဲ့အချိန်မှာ သွေးအားနည်းရောဂါဖြစ်ပေါ်လာစေနိုင်ပါတယ်။

အလွန်အမင်းမောပန်းခြင်း၊ အသားအရောင်ဖြူ​ဖျော့ခြင်း၊ အားနည်းခြင်း၊ စိတ်ဓာတ်ကျခြင်း၊ စိတ်ရှုပ်ထွေးခြင်း၊ အသက်ရှူကြပ်ခြင်း၊ ရင်တုန်ခြင်း၊ မူးဝေခြင်း၊ မကြာခဏခေါင်းကိုက်ခြင်း၊ ကိုယ်ခံအားကျဆင်းခြင်း၊ လိင်ဆန္ဒ​လျော့နည်းခြင်းနဲ့ နို့မထွက်ခြင်း စတဲ့လက္ခဏာ​တွေကို ခံစားရနိုင်ပါတယ်။

ကိုယ်ဝန်ဆောင်နေစဉ်အတွင်း သံဓါတ်ချို့တဲ့နေရင်၊ က​လေးအများကြီး​မွေးဖူးရင်၊ ခွဲ​မွေးရင်၊ လမ​စေ့ခင်မွေးရင်၊ အချင်း​ရှေ့​ရောက်​နေရင်၊ မိခင်မှာ​သွေးတိုး​ရောဂါရှိရင် စတဲ့အ​ခြေအ​နေ​တွေရှိခဲ့ရင် ကလေးမွေးဖွားပြီးနောက်မှာ သွေးအားနည်းခြင်းကို ခံစားရနိုင်ခြေပိုမိုများပြားပါတယ်။

​သွေးအားနည်းတဲ့အခါ နို့​ကြောင်းပိတ်ခြင်း၊ နို့​ရောင်ခြင်း၊ နို့ထွက်နည်းခြင်း စတာ​တွေဖြစ်လာနိုင်တာ​ကြောင့် က​လေးဟာလိုအပ်တဲ့ အာဟာရ​တွေ​ကောင်း​ကောင်းမရရှိဘဲ ကိုယ်အ​လေးချိန်နည်း​နေတတ်ပါတယ်။

ကလေးမွေးဖွားပြီးသွေးအားနည်းခြင်းကို နေ့စဉ်အစားအ​သောက်၊ အနေအထိုင် ဂရုတစိုက်ပြောင်းလဲခြင်းဖြင့် ကုသလို့ရနိုင်ပါတယ်။ ဥပမာ-

– သံဓာတ်အားဆေးများသောက်သုံးခြင်း၊

– သံဓာတ်ပါဝင်သောအစားအစာတွေဖြစ်တဲ့ အမဲသား၊ ကြက်သား၊ ပဲအမျိုးမျိုး၊ အစိမ်းရင့်ရောင်အသီးအရွက်များ စတာတွေကိုများများစားသုံးခြင်း၊

– လက်ဖက်ရည်သောက်သုံးမှုကို ရှောင်ကြဥ်ခြင်း၊

– ဗီတာမင်စီပါဝင်တဲ့အသီးအနှံတွေကိုများများစားသုံးခြင်း၊

– ရေများများသောက်ခြင်း၊

– အိပ်ရေးဝဝအိပ်ခြင်း စတဲ့နည်းလမ်းတွေကို လိုက်နာမယ်ဆိုရင် လိုအပ်နေတဲ့သံဓါတ်တွေကို ပြန်လည်ဖြည့်တင်းပေးနိုင်မှာဖြစ်ပါတယ်။

အကယ်၍မိမိက က​လေး​မွေးဖွားပြီး​နောက်မှာ သွေးအားနည်းခြင်းလက္ခဏာရပ်တွေခံစားနေရမယ်ဆိုရင် အစားအ​သောက်ကို ဂရုတစိုက်စားသုံးရမယ့်အပြင် ဆရာဝန်နဲ့တိုင်ပင်ပြသပြီး လိုအပ်တဲ့ဆေးကုသမှုကိုခံယူရမှာဖြစ်ပါတယ်။