မိုးလေးဖွဲဖွဲနဲ့ အချမ်းပိုသော တစ်နေ့သော ညနေခင်းတွင် မလာတာကြာပြီဖြစ်တဲ့
ဝတ်ဆန် တစ်ယောက် လသားကလေး ချီထားတဲ့ ကလေးအမေတစ်ယောက်နဲ့ အသော့ကလေး
ပေါက်ချလာတယ် ။
ဝတ်ဆန် ။ ။ ဆရာရေ မတွေ့တာကြာပေါ့ ။
ဇီဝက ။ ။ အေး ၊ညည်းက ဘယ်ပျောက်နေတာတုန်း ။ဒီဘက်တောင် အလည်မလာတော့ ။
ဝတ်ဆန် ။ ။ ဒီလိုပဲ ဆရာရေ ၊အလုပ်တွေများနေတာနဲ့ မရောက်ဖြစ်တာ ။
အလည်လာမယ်ကြံတော့ ဆရာ လူနာများတွေများနေတာနဲ့ မလာတော့တာ ။
သိတယ်မလား ၊ဝတ်ဆန်လာရင် စပ်စုစရာတွေ အများကြီးနဲ့ဆိုတော့ ၊ဆရာ့
အားနာလို့ ၊တော်ရုံမရောက်တော့တာ ဆရာရေ ။
ဇီဝက ။ ။ အေးပါ ၊ဟုတ်ပါပြီ ။ခုလာရင်း ကိစ္စဆိုပါဦး ။
ဝတ်ဆန် ။ ။ ဒီလို ဆရာရေ ၊ဟောဒီ့က ကျွန်မယောင်းမက သူ့ကလေး သွားရည်တမြမြ
ဖြစ်နေလို့ စိုးရိမ်နေတာ ။အဲ့ဒါနဲ့ ဆရာ့ဆီ လာပြတာ ။
ဇီဝက ။ ။ ကလေး အသက်က ဘယ်လောက်ရှိပြီလဲ ။
ဝတ်ဆန် ။ ။ အခါလည်ပဲ ရှိပါသေးတယ် ၊ဆရာ ။
ဇီဝက ။ ။ နို့တွေ ဘာတွေရော ကောင်း ကောင်းစို့လား ။ပါးစပ်ထဲရော အနာတွေ ဘာတွေရှိ
လား ။
ကလေးအမေ ။ ။ စို့ပါတယ် ၊ဆရာ ။အနာတွေလည်း မရှိဘူးနဲ့ တူတယ် ။
ဇီဝက ။ ။ ကလေးက လန်းလန်းဆန်းဆန်းပဲလား ။ဆီး ၊ဝမ်းရော မှန်လား ။
ကလေးအမေ ။ ။ လန်းပါတယ် ဆရာ ။ဆီးဝမ်းလည်း မှန်ပါတယ် ။
ဇီဝက ။ ။ လာ စမ်းကြည့်ရအောင် ။
စမ်းသပ်ပြီးနောက်
ဇီဝက ။ ။ ကောင်းပါတယ် ။ဒါဖြစ်ရိုးဖြစ်စဉ် ပါ။
ကလေးအမေ။ ။ တော်သေးတာပေါ့ ဆရာရယ် ။ကျွန်မက တစ်ခုခုဖြစ်မှာ စိုးရိမ်နေတာ ။
ဝတ်ဆန် ။ ။ ဒါဆို ဘာလို့ ဒီလို သွားရည် တမြမြ ဖြစ်ရတာလဲ ၊ဆရာ ။
ဇီဝက ။ ။ ဒီအရွယ် ကလေး တွေကတော့ သွားရည်က အထွက်များတယ် ဟာ ။
နောက်ပြီး ကောင်းကောင်း တံတွေးကို မျိုမချတတ် ၊အိပ်ရင်တောင်မှ ပါးစပ်ဟပြီး
အိပ်တတ်ကြတော့ သွားရည်တွေ ကျတော့တာပေါ့ ။
အဓိက သွားရည်ခံတဲ့ အဝတ်ကို ကလေး လည်ပင်းမှာ ပတ်ထားရင်ပတ်ထား ၊
ဒါမှမဟုတ် မိဘတွေက သွားရည်ကို နိုင်နိုင်သုတ် ။
ဝတ်ဆန် ။ ။ တခြားအကြောင်းကြောင့်ရော ဖြစ်နိုင်သေးလား ၊ဆရာ ။
ဇီဝက ။ ။ ဖြစ်နိုင်တာပေါ့ဟာ ။ပြောရရင်တော့ ၂မျိုး ခွဲပြောရမှာပဲ ။
သွားရည် အထွက်များလို့ ရယ် ၊ထွက်လာတဲ့ သွားရည်ကို ကောင်းကောင်း
မရှင်းထုတ်နိုင်လို့ရယ်ကြောင့် သွားရည် တမြမြ ဖြစ်ကြရတာပေါ့ ။
သွားရည်အထွက်များတာကို အင်္ဂလိပ်လိုတော့ Hypersalivation ဟိုက်ပါစလိုက်
ဗေးရှင်း ရယ်လို့ခေါ်တယ် ဟ ။လူကြီးတွေမှာ ပါးစပ်ကောင်းကောင်း မစေ့နိုင်သူ
တွေ(ဥပမာ-လေဖြတ်နေသူတွေ)နဲ့ အစာမျိုရခက်သူတွေမှာ သွားရည်ကလေး
တမြမြ ဖြစ်နေတတ်တယ် ။
ဝတ်ဆန် ။ ။ ဖြစ်နိုင်ရင် နည်းနည်းလောက်ပြောပြပါလား ၊ဆရာ ။
ဇီဝက ။ ။ အေးပါ ၊ပြောပ့ါမယ် ။
သွားရည်အထွက်များတာ ဘယ်သူတွေလဲ ဆိုရင် စိုးရိမ်ပူပန်များသူတွေ ၊အချိုဓာတ်
အစားများသူတွေ ၊ပါးစပ်နဲ့ ခံတွင်းမှာ အနာရောဂါရှိသူတွေ ၊အစာအိမ်ကောင်းစွာ
အလုပ်မလုပ်သူတွေ (Gastroparesis) ၊အစာအိမ်အချဉ်ဓာတ်ပြန်ဆန်တတ်တဲ့
ရောဂါ(Gastoesophageal Reflux Disease)ရှိသူတွေ ၊ကိုယ်ဝန်ဆောင်သည်တွေ
ခွေးရူးပြန်ရောဂါဖြစ်တဲ့သူတွေ ၊မုန့်ချိုအိတ်ရောင်တဲ့ ရောဂါရှိသူတွေ ၊ဗိုက်တာမင်
ဘီ ၃ ချို့တဲ့သူတွေဟာ သွားရည်အထွက်များတယ် ဟ ။
နောက်ပြီး တစ်ချို့သောဆေးတွေနဲ့ အဆိပ်အတောက်တွေကလည်း သွားရည်
အထွက်များစေသေးတယ် ။ဥပမာ-မာကျူရီ အဆိပ်မိရင်ပေါ့ဟာ ။
ဝတ်ဆန်။ ။ဟုတ်ကဲ့ ဆရာ ။တစ်ခုတော့ သိသွားပြီ ။နောက် သွားရည် မရှင်းထုတ်နိုင်တဲ့သူ
တွေ ဆိုတာကရော ဘယ်လို လူတွေလဲ ဆရာ ။
ဇီဝက ။ ။ မေးရိုးနဲ့ခံတွင်း ခိုက်မိသူတွေ ၊ဓာတ်ကင်ခံထားရသူတွေ ၊ပါးစပ်နဲ့ ခံတွင်းမှာ အနာ
ရှိသူတွေ ၊အာရုံကြောရောဂါများ ခံစားရသူတွေ(ဥပမာ-ပါကင်ဆန်ရောဂါ ၊လေဖြတ်
တဲ့သူတွေ) ပေါ့ဟာ ။
ဝတ်ဆန် ။ ။ ဒါဆို သွားရည် တမြမြ ဖြစ်ရင် ဘယ်လိုလုပ်ရမလဲ ၊ဆရာ ။
ဇီဝက ။ ။ တတ်ကျွမ်းနားလည်တဲ့ ဆရာဝန်တွေနဲ့ ပြသပြီး ရောဂါရှာရမှာပေါ့ဟာ ။
အနာသိမှ ဆေးရှိတာ မဟုတ်လား ။
သွားကို စနစ်တကျတိုက် ၊ခံတွင်းသန့်ဆေးရည်နဲ့ ပုံမှန် အာလုတ်ကျင်းရင်လည်း
ပါးစပ်နဲ့ခံတွင်းကို ခြောက်သွေ့စေတယ် ။တချို့ဆေးတွေကလည်း သွားရည်
ထွက်နည်းစေတယ် ။ဒါကြောင့် နီးစပ်ရာ မိသားစုဆရာဝန်နဲ့ အရင်တိုင်ပင်ပေါ့ ။
ဝတ်ဆန်။ ။ ဝတ်ဆန် လေရှည်နေတာနဲ့ ၊ဆရာလည်း မောတော့မယ် ။
ခုလို စုံစုံလင်လင် သိရတဲ့အတွက် ကျေးဇူးပါပဲ ဆရာ ။
ဇီဝက ။ ။ အေးပါ ၊ကလေးကိုတော့ ဆရာမှာတဲ့ အတိုင်းလုပ်ပေး ။
ကလေး နို့မဝင် ၊မလန်း ၊အီ ၊မှိန်း ၊ဖျားရင်တော့ ပြန်လာပြပေါ့ဟာ ။
ကလေးအမ။ ။ဟုတ်ကဲ့ပါ ၊ဆရာ ။ကျေးဇူးအများကြီးတင်ပါတယ် ။
Author: ခေတ်သစ် ဇီဝက
