အစားအစာများကို အာဟာရဓာတ်ပြည့်စုံမှန်ကန်စွာ စားသုံးခြင်းသည် သွားနှင့် ခံတွင်းကျန်းမာရေးအပါအဝင် ခန္ဓာကိုယ်တစ်ခုလုံး၏ကျန်းမာရေးကိုပါများစွာအကျိုးရှိစေပါသည်။
အောက်ဖော်ပြပါ ဗီတာမင်နှင့် သတ္တုဓာတ်များသည် သွားနှင့် သွားဖုံးကျန်းမာရေးအတွက် ကောင်းမွန်သော အာဟာရဓာတ်များဖြစ်ပါသည်။
၁။ ကယ်လ်ဆီယမ် ( Calcium )
ကယ်လ်ဆီယမ်သည် အရိုးကျန်းမာရေးအတွက်သာမက သွားကျန်းမာရေးအတွက်လည်း အကျိုးပြုသော သတ္တုဓာတ်တစ်မျိုးဖြစ်ပါသည်။
နို့နှင့်ဒိန်ချဉ်ကဲ့သို့သော နို့ထွက်ပစ္စည်းများ၊ ဆယ်လ်မွန်ငါး နှင့်ဆာဒင်းငါးစသည့် အစားအစာများတွင် ကယ်လ်ဆီယမ်ဓာတ်ပေါကြွယ်၀စွာ ပါဝင်ကြောင်းတွေ့ရှိရပါသည်။
ထို့ပြင် သက်သတ်လွတ်စားသောသူများအနေဖြင့်လည်း အစိမ်းရောင်အရွက်ရှိသော ဟင်းသီးဟင်းရွက်များနှင့် နှံစားသီးနှံများကို စားသုံးခြင်းဖြင့် ကယ်လ်ဆီယမ်ဓာတ်ကို ရရှိနိုင်ပါသည်။
၂။ ဖော့စ်ဖောရပ်စ် (Phosphorus )
သွားကျန်းမာရေးအတွက်အရေးပါသော အခြားသတ္တုဓာတ်တစ်မျိုးမှာ ဖော့စ်ဖောရပ်စ် ဖြစ်ပါသည်။
၎င်းအာဟာရသတ္တုဓာတ်ကို ခန္ဓာကိုယ်၏ တစ်ရှူးများကို ပြုပြင်ထိန်းသိမ်းရန်အတွက် လိုအပ်ကြောင်းတွေ့ရှိရပါသည်။
အောက်ပါအစားအစာများတွင် ဖော့စ်ဖောရပ်စ်ဓာတ်ပေါများစွာ ပါဝင်ပါသည်။ ၎င်းတို့မှာ
– အသားများ
– ကြက်ဥ ၊ဘဲဥများ
– အခွံမာသီးများ
– ပဲတောင့်ရှည်
– နို့ထွက်ပစ္စည်းများနှင့်
– သစ်သီးခြောက်များစသည်တို့ဖြစ်ပါသည်။
၃။ ဗီတာမင် ဒီ (Vitamin D )
ဗီတာမင် ဒီ သည်လည်း သွားနှင့် သွားဖုံးကျန်းမာရေးအတွက် အလွန်အရေးပါသော အခန်းကဏ္ဍမှပါဝင်နေသော အာဟာရတစ်မျိုးဖြစ်ပါသည်။
၎င်းသည် စားသုံးလိုက်သော ကယ်လ်ဆီယမ်ကို အူလမ်းကြောင်းမှ ကောင်းစွာစုပ်ယူနိုင်ရန် အားပေးပြီး သွားနှင့် အရိုးများ၏ ကျန်းမာ၊ ကြံ့ခိုင်ရေးကို အထောက်အကူပြုပါသည်။
ဗီတာမင် ဒီ ပေါကြွယ်၀သော အစားအစာများမှာ
– ဆယ်လ်မွန်ငါး
– ဆာဒင်းငါး
– တူနားငါး
– ကြက်ဥ၊ ဘဲဥအနှစ်
– မှို
– နွားနို့
– ပဲနို့
– လိမ္မော်ဖျော်ရည်
– နှံစားသီးနှံများ စသည်တို့ဖြစ်ပါသည်။
၄။ ဗီတာမင် စီ ( Vitamin C )
သွားဖုံးကျန်းမာရေးအတွက် အလွန်အရေးပါသော ဗီတာမင်တစ်မျိုးမှာ ဗီတာမင် စီ ဖြစ်ပါသည်။
သွားများကို ထောက်ကန်ပေးသော တစ်ရှူးများနှင့် သွေးကြောများဖြစ်ပေါ်ခြင်းတွင် ဗီတာမင် စီ၏ အခန်းကဏ္ဍမှာ အလွန်အရေးပါကြောင်းတွေ့ရှိရပါသည်။
Vitamin C ချို့တဲ့လျှင် အတွေ့ရများသော ရောဂါလက္ခဏာများမှတစ်ခုမှာ Scurvy ဟုခေါ်သော သွားဖုံးသွေးယိုသော ရောဂါလက္ခဏာဖြစ်ပါသည်။
သံပုရာသီး၊ သံပယိုသီး၊ ဘယ်ရီသီး၊ ဟင်းနုနွယ်နှင့် အခြားဟင်းသီးဟင်းရွက်နှင့် သစ်သီး၀လံများကို စားသုံးခြင်းဖြင့် Vitamin C ကို ရရှိနိုင်ပါသည်။
၅။ ဗီတာမင်အေ ( Vitamin A )
လေ့လာတွေ့ရှိချက်များအရ မျက်စိအမြင်အာရုံကျန်းမာရေးအတွက် ကောင်းမွန်စေသော ဗီတာမင်အေသည် သွားနှင့် သွားဖုံးကျန်းမာရေးအတွက်ပါ အကျိုးပြုနိုင်ကြောင်း သိရှိရပါသည်။
ဗီတာမင်အေသည် သွားနှင့် ခန္ဓာကိုယ်ရှိ အမြှေးပါးများတွင်ရှိသော တစ်ရှူးများဖြစ်ပေါ်ခြင်းနှင့် ထိန်းသိမ်းခြင်းကို ကူညီပေးသော ဗီတာမင်တစ်မျိုးဖြစ်ပါသည်။
ဗီတာမင်အေ ပေါကြွယ်၀စွာ တွေ့ရှိရသော အစားအစာများမှာ
– မုန်လာဥနီ
– အမဲသားအသည်း
– ဆယ်လ်မွန်ငါး
– တူနားငါး
– ထောပတ်
– နို့နှင့်နို့ထွက်ပစ္စည်းများ
– ကန်စွန်းဥ
– အစိမ်းရင့်ရောင် ဟင်းသီးဟင်းရွက်များ
– သစ်သီးခြောက်
– ပင်လယ်စာ
– သရက်သီး
– ခရမ်းချဉ်သီးနှင့်
– ပဲအမျိုးမျိုးစသည်တို့ဖြစ်ပါသည်။
Author : Dr. မိုး (ဆေး ၁)
