ခါးနာခြင်းဟူသော ရောဂါဝေဒနာသည် အဖြစ်များသည့် ရောဂါတစ်မျိုးဖြစ်ကြောင်း တွေ့ရှိရပါသည်။ အောက်ပါတို့သည် ခါးနာခြင်းဟူသော ရောဂါဝေဒနာကို ဖြစ်စေနိုင်သည့် ရောဂါအကြောင်းရင်း များဖြစ်ကြပါသည်။
– ကြွက်သားအသုံးပြုမှု လွန်ကဲခြင်းကြောင့် ကြွက်သားဒဏ်ဖြစ်ခြင်း
– ကျောရိုးဆစ်အချပ်ပြားများ ကျွံခြင်း
– အရိုးကျီးပေါင်းတက်ခြင်း
– ကျောရိုးဆစ်အချပ်ပြား ယိုယွင်းပျက်စီးခြင်းစသည်တို့သည် အဖြစ်များသည့် အကြောင်းရင်းများ ဖြစ်ကြပါသည်။
ခါးနာခြင်းဖြစ်စေသော အဖြစ်နည်းသည့် ရောဂါအကြောင်းရင်းများ
– ကျောရိုးဆစ်တွင် အကျိတ်အခဲများဖြစ်ခြင်း
– မြီးညှောင့်ရိုးအဆစ်၏ လုပ်ငန်းကောင်းစွာ လုပ်ဆောင်နို်င်မှုမရှိခြင်း စသည်တို့ဖြစ်ကြပါသည်။
ရောဂါလက္ခဏာများ
ခါးနာခြင်းရောဂါဝေဒနာလက္ခဏာများကို အောက်ပါအတိုင်း ခွဲခြားတွေ့ရှိနိုင်ပါသည်။
– ပေါင်ရိုးနှင့် တင်ပါးဆုံရိုးတို့တွင် ကိုက်ခဲနာကျင်ခြင်း
– တင်ပါး၊ ခြေသလုံးနှင့် ခြေဖဝါးတို့တွင် နာကျင်ခြင်း
– အချိန်အတိုင်းအတာတစ်ခုကြာအောင် ထိုင်ပြီးသည့်နောက်တွင် နာကျင်ခြင်း
– ခန္ဓာကိုယ်အနေအထား ပြောင်းလဲပြီးသည့်နောက်တွင် နာကျင်မှုသည် လျော့နည်းသွားခြင်း
– အိပ်ရာမှထသည့်အခါမျိုးတွင် ခါးနာခြင်းဝေဒနာခံစားရပြီး လှုပ်ရှားမှုပြုလုပ်ပြီးသည့် နောက်တွင် နာကျင်မှုသက်သာသွားခြင်း စသည်ဖြင့် ခံစားရကြောင်း တွေ့ရှိရပါသည်။
ချက်ချင်းဆေးကုသမှုခံယူသင့်သည့် ခါးနာခြင်းရောဂါလက္ခဏာများ။
ခါးနာခြင်းသည် တစ်ခါတစ်ရံတွင် အချို့သောအခြေခံရောဂါပြဿနာများကြောင့် ဖြစ်နိုင်ကြောင်းတွေ့ရှိရပါသည်။ အကယ်၍ အောက်ဖော်ပြပါ ရောဂါလက္ခဏာများခံစားရလျှင် ဆရာဝန်နှင့် တိုင်ပင်ပြသ၍ ဆေးကုသမှု ခံယူသင့်ကြောင်း အကြံပြုအပ်ပါသည်။
– ဆီးနှင့် ဝမ်းကို ထိန်းချုပ်မှုတွင် ပြဿနာဖြစ်ခြင်း
– ခန္ဓာကိုယ်အလေးချိန် ကျဆင်းလာခြင်း
– ချမ်းတုန်၍ ဖျားခြင်း
– ပြင်းထန်စွာ ဗိုက်နာခြင်းစသည်တို့သည် အရေးကြီးသော ရောဂါလက္ခဏာများ ဖြစ်သည်။
ကုသသည့်နည်းလမ်းများ
( ၁ ) ခွဲစိတ်မှုမဟုတ်ဘဲ ဆေးဝါးများဖြင့် ကုသသည့်နည်းလမ်းများ။
ဆေးဝါးများဖြင့် ခါးနာခြင်းကို ကုသခြင်းသည် အခြေခံရောဂါအကြောင်းရင်းများအား ဖယ်ရှားခြင်းမျိုးမဟုတ်ဘဲ နာကျင်ခြင်းကို လျော့နည်းသက်သာစေရန် ကုသခြင်းဖြစ်ပါသည်။
အောက်ပါတို့သည် ခါးနာခြင်းရောဂါကို သက်သာစေမည့် ဆေးဝါးများဖြင့် ကုသသည့် နည်းလမ်းများဖြစ်ကြပါသည်။
– ကြွက်သားပြေလျော့စေသောဆေးဝါးများ
၎င်းဆေးဝါးများသည် ဦးနှောက်အာရုံကြောဗဟိုအဖွဲ့အစည်းစနစ်ကို ဖိနှိပ်ပေးခြင်းဖြင့် တင်းမာနေသည့် ကြွက်သားများကို ပြေလျော့စေသည့် ဆေးဝါးများဖြစ်ကြပါသည်။
– နာကျင်မှုကို သက်သာစေသည့် ဆေးဝါးများ
ခါးနာခြင်းဝေဒနာကို ပြင်းထန်စွာ ခံစားနေရသည့် လူနာများကို ကုသသည့်အခါ ဆရာဝန်များသည် ဝေဒနာသက်သာစေရန် မူးယစ်ဆေးအမျိုးအစားဖြစ်သော နာကျင်မှုသက်သာစေသည့် ဆေးဝါးများကို ညွှန်ကြားလေ့ရှိပါသည်။
သို့သော် အထက်ပါဆေးဝါးများသည် ဘေးထွက်ဆိုးကျိုးများစွာရှိသဖြင့် အချိန်ကြာမြင့်စွာ အသုံးပြုသင့်သည့် ဆေးဝါးများမဟုတ်ဘဲ ခေတ္တခဏသာ မှီဝဲသင့်ကြောင်း တွေ့ရှိရပါသည်။
( ၂ ) ဆေးဝါးများမဟုတ်သည့် အခြားရောဂါကုသသော နည်းလမ်းများ
အောက်ပါနည်းလမ်းများဖြင့်လည်း ခါးနာခြင်းဝေဒနာကို လျော့နည်းသက်သာစေရန် ကုသပေးနိုင်ကြောင်း တွေ့ရှိရပါသည်။
– ခါးတွင် ခါးထိန်းခါးပတ်များကို ဝတ်ဆင်ထားခြင်း
အချို့သောခါးနာသည့်ဝေဒနာကို ခံစားရသောသူများသည် ခါးထိန်းခါးပတ်များ ဝတ်ဆင်ထားခြင်းဖြင့် ခါးနာခြင်းရောဂါလက္ခဏာကို လျော့နည်းစေကြောင်း လေ့လာတွေ့ရှိရပါသည်။
– အပ်စိုက်ကုထုံးဖြင့် ရောဂါကုသခြင်း
– နှိပ်နယ်သည့် ကုထုံးဖြင့် ရောဂါကုသခြင်း
– တရားထိုင်ခြင်းဖြင့် ရောဂါကုသခြင်း စသည့် နည်းလမ်းများဖြင့် ခါးနာခြင်းကို ကုသနိုင်ပါသည်။
( ၃ ) ခွဲစိတ်ကုသမှုဖြင့် ခါးနာရောဂါကို ကုသခြင်း
အခြားနည်းလမ်းများဖြင့် ကုသ၍ ရောဂါလက္ခဏာများသက်သာခြင်းမရှိလျှင် ခွဲစိတ်ကုသသည့် နည်းလမ်းများဖြင့် ကုသရန် လိုအပ်ပါသည်။
သို့သော် ခွဲစိတ်ကုသသည့်နည်းလမ်းဖြင့် ကုသရန် လိုအပ်သော လူနာများအား ခွဲစိတ်ကုသရန် သင့်လျော်ခြင်းရှိမရှိနှင့် ပတ်သက်၍ အောက်ပါအချက်များကို စဉ်းစားရန် လိုအပ်ကြောင်း တွေ့ရှိရပါသည်။
– ခွဲစိတ်မှုအမျိုးအစား
ခါးနာရောဂါကို ကုသသည့် ခွဲစိတ်မှုအမျိုးအစားများစွာရှိကြောင်း တွေ့ရှိရပါသည်။ အချို့သော ခွဲစိတ်မှုအမျိုးအစားများသည် ခွဲစိတ်ရန် ခက်ခဲပြီး အနာပြန်လည်ကောင်းမွန်ရန် အချိန်ကြာမြင့်တတ်ပါသည်။
သို့သော် ယခုခေတ် အချိန်အခါတွင် ဆေးပညာဆိုင်ရာပိုင်း၌ များစွာ ဖွံ့ ဖြိုးတိုးတက်လာ ခြင်းကြောင့် အချို့သော ခွဲစိတ်မှုများကို ဆေးရုံတွင် တက်ရောက်ကုသမှု ခံယူရန်မလိုအပ်ဘဲ ပြင်ပလူနာအနေဖြင့်ပင် ကုသမှုခံယူနိုင်ကြောင်း တွေ့ရှိရပါသည်။
– စိတ်ပိုင်းဆိုင်ရာကျန်းမာရေး
သုတေသနပြု လေ့လာချက်များအရ စိတ်ပိုင်းဆိုင်ရာ ကျန်းမာရေးကောင်းမွန်ခြင်းသည်လည်း ခွဲစိတ်ကုသသည့် ရလဒ်များအပေါ်တွင် များစွာအကျိုးသက်ရောက်မှုရှိကြောင်း သိရှိရပါသည်။
Author : Dr. မိုး (ဆေး ၁)
