သွေးပေါင်ချိန်မြင့်တက်နေတာကို ပြန်လည်လျှေ့ချဖို့ ကြိုးစားတဲ့အခါမှာ ဆေးဝါးတွေသာမက အစားအစာရဲ့ အခန်းကဏ္ဍကလည်း အရမ်းအရေးကြီးပါတယ်။ နိုင်ငံခြားမှာတော့ စားသောက်မှုပုံစံနဲ့ သွေးပေါင်ချိန်လျှော့ချဖို့ ကြိုးစားတာကို DASH လို့ ခေါ်ပါတယ်။ အရှည်ပြောရရင် Dietary Approaches to Stop Hypertension လို့ ခေါ်ပါတယ်။ မိတ်ဆွေကို ဘာတွေစားရမယ်လို့ ပြောမှာ မဟုတ်ပါဘူး။ ဘယ်အစားအစာကို ဘယ်လောက်ပမာဏစားသင့်တယ်၊ ဘယ်လိုပုံစံစားသင့်တယ်ဆိုတာကို ညွှန်ကြားပေးမှာ ဖြစ်ပါတယ်။ အငန်လျှော့စား၊ အသီးအရွက်များများစား၊ နို့၊ အသား၊ ငါးနဲ့ ပဲစတာတွေ မျှမျှတတစား ဘာညာပေါ့။ ကဲ …. စလိုက်ကြရအောင်။
အစိမ်းရောင်များများစားပါ (အရွက်များများ)
အငန်ဓာတ်က ခန္ဓာကိုယ်ထဲမှာ ရေတွေအများကြီးကို ထိန်းထားသလိုဖြစ်စေတယ်။ အဲဒီရေတွေက သွေးကြောတွေကို ဖိမိတဲ့အခါ သွေးပေါင်ချိန်မြင့်တက်စေတယ်။ ဘာတွေစားသင့်လည်းဆိုရင် ကိုက်လံ၊ ပန်းဂေါ်ဖီစိမ်း၊ ဟင်းနုနွယ်၊ ဒေါက်ခွ စတဲ့ ပိုတက်ဆီယမ်ဓာတ်တက်စေတဲ့ အစိမ်းရောင်အရွက်များများစားရပါမယ်။ ပိုတက်ဆီယမ်ဟာ ရေကိုဆွဲထားတဲ့ ဆိုဒီယမ်ကို ရှုရှုးနဲ့အတူတူပါသွားစေတဲ့အတွက် သွေးကြောတွေအပေါ်ကဖိအားတွေ လျော့သွားပြီး သွေးပေါင်ချိန်ပါ လျော့ကျစေနိုင်ပါတယ်။
တစ်နေ့ဘယ်လောက်စားရမလဲ >>> ၃ – ၆ ခွက်
စားရမယ့်ပုံစံ >>> သန့်စင်အောင် ဆေးကြောပြီး အစိမ်းစားပါ။
ဘယ်ရီသီး စားပါ
ဘလူးဘယ်ရီ၊ စတော်ဘယ်ရီ နဲ့ ဘလက်ခ်ဘယ်ရီ အစရှိတဲ့ အသီးတွေရဲ့ မျက်စိပသာဒဖြစ်စရာကောင်းတဲ့အရောင်တွေကို ဖြစ်ပေါ်စေတဲ့ရောင်ခြယ်ဆဲလ်ကို Anthocyanin လို့ ခေါ်တယ်။ သူက သွေးကြောတွေကို ကောင်းကျိုးအများကြီး ပေးပါတယ်။ ဘယ်လိုပေးတာလဲဆိုရင် သွေးကြောတွေကို ပြန့်ကားစေနိုင်သလို သွေးပေါင်ချိန်အပြောင်းအလဲပေါ်မှာမူတည်ပြီး လိုအပ်သလို အချုံ့အချဲ့ လုပ်ပေးနိုင်တာကြောင့် သွေးမတိုးအောင် ကာကွယ်နိုင်ပြီး နှလုံးကျန်းမာရေးကိုပါ ကောင်းမွန်စေပါတယ်။
တစ်နေ့ဘယ်လောက်စားရမလဲ >>> ၂ – ၃ ခွက်
စားရမယ့်ပုံစံ >>> အေးခဲထားပြီး (သို့မဟုတ်) လတ်လတ်ဆတ်ဆတ်။
ဒိန်ချဉ်
ကယ်လ်ဆီယမ်ဟာ သွေးပေါင်ချိန်ကို ထိန်းညှိပေးရာမှာ အရေးပါတဲ့သတ္တုဓာတ်တစ်မျိုးပဲ ဖြစ်ပါတယ်။ သူက သွေးကြောတွေကို ကျဉ်းသင့်တဲ့အချိန်ကျဉ်းစေပြီး ကျယ်သင့်တဲ့အချိန်ကျယ်စေပါတယ်။ အဆီဓာတ်နည်းနည်းပဲပါတဲ့ ဒိန်ချဉ်မျိုးစားပေးခြင်းက ကယ်လ်ဆီယမ်ဓာတ်ကို ရရှိပါစေလိမ့်မယ်။
တစ်နေ့ဘယ်လောက်စားရမလဲ >>> ၂ – ၃ ခွက်
စားရမယ့်ပုံစံ >>> အဆီဓာတ်နည်း အချိုဓာတ်နည်းတဲ့ အမျိုးအစား။
အဆီဓာတ်များများပါသော ငါး
ကယ်လ်ဆီယမ်ဓာတ်ကို နောက်ထပ်ရရှိနိုင်တာကတော့ ဆယ်လ်မွန် နဲ့ ဆာဒင်းငါးတို့ပဲ ဖြစ်ပါတယ်။ ဒါ့ပြင် အဆီများတဲ့ငါးတွေဖြစ်တဲ့ မက်ကာရယ်လ် နဲ့ ဆာဒင်းန် တို့မှာ နှလုံးကျန်းမာရေးကို အထောက်အကူအများကြီးဖြစ်စေတဲ့ Omega 3 ဓာတ်တွေ ပေါကြွယ်ဝစွာ ပါဝင်ပါတယ်။ လေ့လာမှုတွေအရ ငါးမှာပါတဲ့အဆီဓာတ်တွေဟာ သွေးဖိအားလျော့ကျအောင် ကူညီပေးတယ်လို့ဆိုပါတယ်။
တစ်နေ့ဘယ်လောက်စားရမလဲ >>> ၃ – ၆ အောင်စ
စားရမယ့်ပုံစံ >>> စည်သွပ်ဘူး ၊ ငါး ၊ ကြက် ၊ အသား။
ကြက်သွန်ဖြူ
ကြက်သွန်ဖြူဟာ ခန္ဓာကိုယ်ထဲမှာ နိုက်ထရစ်အက်ဆစ်ပမာဏကို မြင့်တက်စေပြီး သွေးကြောတွေကို ကျယ်စေပါတယ်။ သွေးကြောတွေ ရုန်းရညှစ်ရတာနည်းလေလေ နှလုံးအနေနဲ့လည်း သူတို့ဆီသွေးပို့ဖို့ ညှစ်ရတာနည်းလေပါပဲ။ ဒါဟာ သွေးပေါင်ကို လျော့ကျစေပါတယ်။
တစ်နေ့ဘယ်လောက်စားရမလဲ >>> ၁ – ၂ မွှာ
သံလွင်ဆီ
သံလွင်ဆီထဲမှာပါတဲ့ ပိုလီဖီနော လို Antioxidants ဓာတ်တွေက သွေးကြောတွေရဲ့ ကျုံ့ဆန့်နိုင်စွမ်းကို ကောင်းမွန်စေပါတယ်။ ဟင်းချက်ဆီထဲမှာတော့ သံလွင်ဆီက တကယ့်ကို ကျန်းမာရေးနဲ့ ညီစေတဲ့ ဆီမျိုးပါပဲ။
တစ်နေ့ဘယ်လောက်စားရမလဲ >>> ၂ – ၃ လက်ဖက်ရည်ဇွန်း
စားရမယ့်ပုံစံ >>> ဟင်းချက်ရာမှာ ၊ အသုပ်သုပ်တဲ့အခါ။
ပဲအမျိုးမျိုး
နေ့စဉ်စားပေးနိုင်ရင် ပဲအမျိုးမျိုးဟာ သွေးပေါင်ချိန်ကို ပုံမှန်ဖြစ်စေရုံသာမကဘဲ လျော့တောင်လျော့ကျစေနိုင်ပါတယ်။ ဒါ့ပြင် အမျှင်ဓာတ်လည်းကြွယ်ဝတာကြောင့် နှလုံးသွေးကြောကျဉ်းရောဂါကနေလည်း ကာကွယ်ပေးနိုင်ပါသေးတယ်။
တစ်နေ့ဘယ်လောက်စားရမလဲ >>> ၁ ခွက်
စားရမယ့်ပုံစံ >>> ချက်ပြုတ်ပြီးစားပါ။
ချောကလက်အနက်
ချောကလက်အနက်စားပေးခြင်းဟာ သင့်ခန္ဓာကိုယ်မှာ Flavanol ဆိုတဲ့ဓာတ်ကို ပေးစွမ်းပါတယ်။ သူကလည်း ကြက်သွန်ဖြူလိုပဲ နိုက်ထရစ်အောက်ဆိုက်ကို မြင့်တက်စေပြီး သွေးကြောတွေကို ကျယ်စေပါတယ်။ ဒါဟာ သွေးပေါင်ချိန်ကို လျော့ကျစေပါတယ်။
စားရမယ့်ပုံစံ >>> ရံဖန်ရံခါ စားပါ။
အစားအစာတွေချည်းပဲတော့လည်း မဟုတ်ပါဘူး
သွေးတိုးရောဂါရှိနေခဲ့ရင် ဖော်ပြခဲ့တဲ့အစားအစာတွေက သင့်ရဲ့ သွေးပေါင်ချိန် အခြေအနေကို ထိန်းပေးထားနိုင်မှာပါ။ သူတို့ချည်းပဲလား ဆိုရင်တော့ မလုံလောက်သေးပါဘူး။ ကိုယ်အလေးချိန် လွန်ကဲနေရင် လျှော့ချပါ။ လေ့ကျင့်ခန်းပုံမှန်လုပ်ပါ။ဆရာဝန်ညွှန်ကြားတဲ့ဆေးတွေ မှန်မှန်သောက်ပါ။
Author : Dr.KG