ညဘက်အိပ်မပျော်တာမျိုးက အသက်ကြီးတဲ့လူတွေ၊ စိတ်ဖိစီးမှုများတဲ့ အခါတွေမှာ ဖြစ်လေ့ရှိတဲ့ ပြဿနာပါ။ ညဦးပိုင်းမှာ ကော်ဖီတွေ သောက်မိတာ၊ လက်ဖက်တွေစားမိတာကြောင့် မျက်စိကြောင်ပြီး အိပ်မပျော်တာမျိုးက လူတိုင်း တခါတရံဖြစ်တတ်ပါတယ်။ ဒါပေမယ့် ရက်ဆက်အိပ်မပျော်တာ၊ မကြာခဏ အိပ်မပျော်တာမျိုးဆိုရင်တော့ ကိုယ်ကျန်းမာရေးအတွက်ရော စိတ်ကျန်းမာရေးအတွက်ပါ နောက်ဆက်တွဲပြဿနာတွေ ရှိလာမှာပါ။
ဘာကြောင့် ညဘက်အိပ်မပျော်ရတာလဲ?
– စိတ်ဖိစီးမှု…မနက်ကျရင် စာမေးပွဲဖြေရမယ်၊ အလုပ်အတွက် အင်တာဗျူးဖြေရမယ်၊ ဆေးစစ်ဖို့ ဓာတ်မှန်ရိုက်ရမယ်၊ သွေးစစ်ရမယ် စသဖြင့် စိတ်ပူပန်စရာ၊ စိတ်လှုပ်ရှားစရာတွေ ရှိတာ
– မနက်စောစော ခရီးသွားစရာရှိတာ၊ အရေးကြီးတဲ့ အစည်းအဝေးရှိတာကြောင့် နှိုးစက်ပေးထားပေမယ့် ခဏခဏနိုးနေပြီး ကောင်းကောင်းမအိပ်ရတာ
– မအိပ်ခင် ဖုန်းကြည့်တာ၊ TV ကြည့်တာ၊ ကွန်ပြူတာသုံးတာ၊ အလုပ်လုပ်နေတာ၊ ညဘက်အစားတွေစားပြီး မအီမသာ ဖြစ်နေတတ်တာ စတဲ့ အလေ့အကျင့် ရှိပြီး အိပ်ချိန်မမှန်တာတွေက အဖြစ်များတဲ့ အကြောင်းရင်းတွေပါ။
ကာလကြာရှည်စွာ အိပ်မပျော်တဲ့သူတွေမှာ အထက်ပါအကြောင်းတွေကြောင့်အပြင်
– စိတ်ဓာတ်ကျတာ၊ စိုးရိမ်စိတ်များတာ (ဥပမာ…ထိတ်လန့်တုန်လှုပ်စရာတစ်ခုခုကြုံဖူးတာ၊ ဒဏ်ရာရဖူးတာကြောင့် အိပ်မပျော်တော့တာ) စတဲ့ စိတ်ကျန်းမာရေးနဲ့ ဆိုင်တဲ့ ပြဿနာတွေ
– ရောဂါတစ်ခုခုကြောင့် အိပ်မပျော်တာ (ကင်ဆာရောဂါနဲ့ အရိုးကျိုးတာကြောင့် နာကျင်ပြီး အိပ်မပျော်တာ၊ နှလုံးရောဂါ၊ ကျောက်ကပ်ရောဂါနဲ့ ပန်းနာရင်ကြပ်ကြောင့် မောပြီး အိပ်မပျော်တာမျိုး)
– စိတ်ကျရောဂါကုဆေး၊ သွေးကျဆေး၊ ပန်းနာရင်ကြပ်ပျောက်ဆေး၊ အနာသက်သာတဲ့ဆေး၊ အအေးမိတုပ်ကွေးပျောက်ဆေး၊ ပိန်ဆေးတွေမှာ ကဖင်းနဲ့ လှုံ့ဆော်စေတဲ့ဓာတ်တွေပါလို့ အိပ်မပျော်တာ
– ကဖင်း၊ နီကိုတင်းနဲ့ အယ်လ်ကိုဟောပါတဲ့ ကော်ဖီ၊ လက်ဖက်ရည်၊ ဆေးလိပ်၊ အရက်၊ ဘီယာတွေ စွဲသောက်လို့ အိပ်မပျော်တာ
– OSA လို့ခေါ်တဲ့ အိပ်နေစဉ် အသက်ရှူလမ်းကြောင်းပိတ်ပြီး ဟောက်တတ်တဲ့ရောဂါကြောင့် အိပ်မပျော်တာ
– အသက်ကြီးတဲ့သူတွေမှာ နေ့ဘက်တရေးတမောအိပ်ပြီး ညဘက်မျက်စိကြောင်နေတာ၊ ဒူးနာခါးနာတာမျိုးကြောင့် အိပ်မပျော်တာတွေလည်း ဖြစ်နိုင်ပါတယ်။
အိပ်မပျော်တာက တစ်ရက်တလေဆို ကိစ္စမရှိပေမယ့် ကာလကြာရှည်လာတဲ့အခါ နောက်ဆက်တွဲဆိုးကျိုးများစွာ ရှိနိုင်ပါတယ်။
* စိတ်တိုစိတ်ဆတ်စိတ်မကြည်တာ၊ မှတ်ဉာဏ်လျော့နည်းလာတာ
* အလုပ်မှာ အဆင်မပြေဖြစ်တာ၊ ပေါင်းသင်းဆက်ဆံရေး အဆင်မပြေတာ
* ထိခိုက်ဒဏ်ရာရလွယ်တာ (ကားမောင်းသူ၊ ဆိုင်းကယ်မောင်းသူ စသည်)
* နှလုံးခုန်နှုန်းမမှန်တာ၊ နှလုံးသွေးကြောရောဂါ၊ သွေးတိုး၊လေဖြတ်နဲ့ ဆီးချိုရောဂါတွေ ရလာတာ
* ပန်းနာရင်ကြပ်ရောဂါ ဖြစ်နိုင်ခြေများတာ
* စိတ်ကျရောဂါ ဖြစ်နိုင်တာ
* အိပ်မပျော်တဲ့အခါ ဦးနှောက်ကနေ အစာစားချင်စိတ်ကို မထိန်းချုပ်နိုင်တော့လို့ အစားများပြီး ဝလာတာ
* ကိုယ်ခံအားကျလာတာ
* လိင်စိတ်ဆန္ဒနည်းလာတာ၊ အမျိုးသားတွေမှာ လိင်တံထောင်မတ်နိုင်စွမ်း မရှိတာ
* အိပ်ပျော်ဖို့ ကြိုးစားရင် အိပ်ဆေးနဲ့ အရက် စွဲလာတာ စသဖြင့် နောက်ဆက်တွဲတွေ ဖြစ်လာနိုင်ပါတယ်။
ကောင်းစွာအိပ်စက်ခြင်းက ကျန်းမာခြင်း၊ နုပျိုလှပခြင်းတွေနဲ့ တိုက်ရိုက်ဆက်စပ်နေတာပါ။ ညစဉ်ညတိုင်း ကောင်းစွာ အိပ်ပျော်ပါမှ စိတ်ရောကိုယ်ပါ ကျန်းမာနိုင်ပါလိမ့်မယ်။
Author: Dr.Yee Mon
