ပြင်ပက ဝင်ရောက်လာတဲ့ ရောဂါပိုးမွှားတွေကို ခုခံကာကွယ်ရန်၊ အဆိပ်အတောက်တွေကို ချေဖျက်စွန့်ထုတ်ရန်နဲ့ ရောဂါတွေဖြစ်လာရင် တိုက်ထုတ်ရန်အတွက် ခန္ဓာကိုယ်ရဲ့ ကိုယ်ခံအားစနစ် immune system က ကောင်းမွန်နေဖို့ လိုပါတယ်။
ကိုယ်ခံအားစနစ်ကောင်းမွန်ဖို့ အဓိက အရေးပါတဲ့ ဗီတာမင် vitamins နဲ့ သတ္တုဓာတ် minerals တွေ ရှိပါတယ်။ ဒီဗီတာမင်နဲ့ သတ္တုဓာတ်တွေကို သစ်သီးနဲ့ ဟင်းသီးဟင်းရွက်တွေ လုံလောက်စွာ ပါဝင်တဲ့ ကျန်းမာမျှတတဲ့ အစားအစာတွေကနေတဆင့် ရရှိနိုင်ပါတယ်။
ဒါပေမယ့် တစ်နေ့ကို သစ်သီးနဲ့ ဟင်းသီးဟင်းရွက် ၅ မျိုးလောက် နေ့စဥ်ပါဝင်အောင် စီမံစားသောက်နိုင်ဖို့က စားဝတ်နေရေး လုံးပန်းနေရတဲ့ ဒီလိုခေတ်ကြီးထဲမှာ တကယ် မလွယ်လှပါဘူး။ ဒီပြဿနာကို ဖြေရှင်းဖို့အတွက် ဗီတာမင်နဲ့ သတ္တုဓာတ်တွေ ပါဝင်တဲ့ ဖြည့်စွက်စာအားဆေးတွေရဲ့ အခန်းကဏ္ဍက အရေးပါလာပါတယ်။
ကိုယ်ခံအားကောင်းဖို့အတွက်ဆိုရင် မိမိသောက်မယ့် ဖြည့်စွက်စာအားဆေးထဲမှာ ဘယ်ဗီတာမင်နဲ့ သတ္တုဓာတ်အမျိုးအစားတွေ ပါဝင်သင့်တယ်ဆိုတာကို သေချာရွေးချယ်နိုင်ဖို့တော့ လိုပါမယ်။
(1) ဗီတာမင် C
ဗီတာမင် C က ကိုယ်ခံအားအတွက် အရေးအပါဆုံး ဓာတ်တိုးဆန့်ကျင်ပစ္စည်း (antioxidants) ဖြစ်ပါတယ်။ အစားအစာအနေနဲ့ သံပုရာသီး၊ လိမ္မော်သီးတို့လို ချဥ်တဲ့အရသာရှိတဲ့ အသီးတွေမှာ ဗီတာမင် C ကြွယ်ဝသလို ဟင်းနုနွယ်၊ ဆလပ်ရွက်၊ ငရုတ်ပွ၊ စတော်ဘယ်ရီနဲ့ သင်္ဘောသီးတွေကနေလည်း ဗီတာမင် C ကို ရနိုင်ပါတယ်။
(2) ဗီတာမင် E
အသားအရေချောမွေ့စေတယ်လို့ လူသိများတဲ့ ဗီတာမင် E ကလည်း ကိုယ်ခံအားကောင်းစေတဲ့ antioxidants တစ်မျိုးပါ။ သဘာဝအနေနဲ့ ဗာဒံစေ့၊ မြေပဲနဲ့ မြေပဲထောပတ်၊ နေကြာစေ့၊ နေကြာဆီ၊ ပဲပိစပ်ဆီတွေမှာ ဗီတာမင် E ပါဝင်ပါတယ်။
(3) ဗီတာမင် A
ဗီတာမင် A က မျက်စိအားကောင်းစေတဲ့ ဗီတာမင်ဖြစ်သလို ရောဂါပိုးတွေကိုလည်း တိုက်ထုတ်နိုင်ပါတယ်။ ဗီတာမင် A ကြွယ်ဝတာက အနီရောင်၊ အဝါရောင်ရှိတဲ့ မုန်လာဥနီ၊ ကန်စွန်းဥ၊ ခရမ်းချဥ်သီး၊ ရွှေဖရုံသီးတွေအပြင် အစိမ်းရောင်အရွက်တွေ၊ တူနာငါး၊ အမဲအသည်း၊ ငါးကြီးဆီ၊ ဥအမျိုးမျိုးနဲ့ နို့ထွက်ပစ္စည်းတွေပါ။
(4) ဗီတာမင် D
ဗီတာမင် D ကလည်း ကိုယ်ခံအားအတွက် အရေးအပါဆုံး ဗီတာမင်တစ်မျိုး ဖြစ်ပြီး အရိုးအဆစ်နဲ့ ကြွက်သားတွေကိုလည်း သန်မာစေပါတယ်။ သဘာဝအတိုင်း ဗီတာမင် D ရချင်ရင် မနက်ခင်း နေရောင်ခြည်နုနုလေးကို နေ့စဥ် ၁၅ မိနစ်ခန့် ခံရင် ရနိုင်သလို ဆယ်လ်မွန်ငါး၊ တူနာငါး၊ ငါးသလောက်၊ နို့နဲ့နို့ထွက်ပစ္စည်းတွေ၊ အစေ့အဆံတွေ စားရင်လည်း ရနိုင်ပါတယ်။
(5) ဖောလစ်အက်ဆစ်/ ဖောလိတ်
မွေးလာတဲ့ကလေးမှာ ဦးနှောက်နဲ့ ကျောရိုးအာရုံကြောတွေ ချို့ယွင်းမှု မဖြစ်ရလေအောင် ကိုယ်ဝန်ဆောင်တွေ မဖြစ်မနေသောက်ရတဲ့ ဖောလစ်အက်ဆစ်ကလည်း ကိုယ်ခံအားကို ကောင်းစေပါတယ်။ ဆေးအနေနဲ့ ဖောလစ်အက်ဆစ်လို့ ခေါ်ပြီး သဘာဝအတိုင်း အစားအစာတွေမှာ ပါဝင်တာကိုတော့ ဖောလိတ်လို့ ခေါ်ပါတယ်။ ဖောလိတ်ဓာတ်ရချင်ရင် ပဲနီလေး၊ စားတော်ပဲနဲ့ ပဲအမျိုးမျိုး၊ ဆလပ်ရွက်၊ ဟင်းနုနွယ်လို အစိမ်းရောင်အရွက်တွေနဲ့ ထောပတ်သီး၊ ဘရိုကိုလီတွေ စားပါ။
(6) Selenium
Selenium က oxidative stress တွေကနေ ကာကွယ်ပေးတဲ့ antioxidants ဖြစ်ပြီး ရောင်ရမ်းမှုတွေကို လျှော့ချပေးပါတယ်။ တူနာနဲ့ ဆားဒင်းလို ပင်လယ်ငါးတွေ၊ အသားနဲ့အသည်း၊ cereals၊ ချိစ်တွေကနေ selenium ရနိုင်ပါတယ်။
(7) သံဓာတ်
သွေးအားကောင်းစေတဲ့ သံဓာတ်ဟာ သွေးဆဲလ်တွေကနေ အောက်ဆီဂျင်ကို ခန္ဓာကိုယ်တစ်ခုလုံးသို့ ပို့ဆောင်ပေးပြီး ကိုယ်ခံအားစနစ်ကို ထောက်ပံ့ပေးပါတယ်။ အနီရောင်အသား၊ ကြက်သား၊ ကြက်ဆင်သား၊ စည်သွပ်ထားတဲ့ တူနာငါးနဲ့ ဆာဒင်းငါး၊ ခရု၊ ဘရိုကိုလီ၊ ဆလပ်ရွက်နဲ့ အစိမ်းရင့်ရောင်အရွက်တွေ၊ ပဲအမျိုးမျိုးတို့က သံဓာတ်အားဖြည့် အစားအစာတွေပါ။
(8) ဇင့်ဓာတ်
ကိုယ်ခံအားစနစ်ထဲက ဆဲလ်အသစ်တွေ ထုတ်လုပ်ဖို့ ဇင့်ဓာတ်ကို လိုအပ်ပါတယ်။ ခရု၊ ကမာ၊ ကြက်သား၊ ဒိန်ချဥ်၊ စားတော်ပဲနဲ့ ပဲအမျိုးမျိုးမှ ဇင့်ဓာတ်ရနိုင်ပါတယ်။
အစားအသောက်တွေထဲမှာ ကိုယ်ခံအားကောင်းစေတဲ့ ဗီတာမင်နဲ့ သတ္တုဓာတ်တွေ နေ့စဥ် လုံလောက်စွာ ပါဝင်အောင် မစားနိုင်ရင်လည်း စိုးရိမ်စရာ မလိုပါဘူး။ ကိုယ်သောက်မယ့် ဖြည့်စွက်စာအားဆေးတွေထဲမှာ အခုဖော်ပြခဲ့တဲ့ ဗီတာမင်နဲ့ သတ္တုဓာတ်တွေ ပါဝင်တဲ့ဆေးကို ရွေးချယ်သောက်သုံးနိုင်ရင် နေ့စဥ်တိုင်းမှာ ကျန်းမာကြံ့ခိုင်ပြီး ရောဂါပိုးတွေကိုလည်း ကာကွယ်နိုင်မှာပါနော်။
Author: Dr.Yee Mon
