အသားအရေလှဖို့၊ နုပျိုဖို့ ကော်လာဂျင် collagen သောက်ကြသလို အသားဖြူပြီး ကြည်စိုနေဖို့ဆိုတဲ့ ရည်ရွယ်ချက်နဲ့ Gluta ဂလူတာသောက်ကြသူတွေလည်း ရှိပါတယ်။ တချို့ product တွေမှာဆို ကော်လာဂျင်ရော ဂလူတာရော နှစ်မျိုးလုံး ထည့်သွင်းထားပါသေးတယ်။ ကော်လာဂျင်နဲ့ ဂလူတာက အာနိသင်တူလား၊ ဘာတွေကွာခြားလဲ ဆိုတာက လူအများစု သိချင်မယ့် မေးခွန်းတွေ ဖြစ်မယ်ထင်တယ်နော်။
ကော်လာဂျင်ဆိုတာ ဘာလဲ?
ကော်လာဂျင်ဆိုတာ ခန္ဓာကိုယ်အနှံ့မှာ ရှိတဲ့ ပရိုတင်းတစ်မျိုးဖြစ်ပြီး အရိုး၊ အရိုးနု၊ အရွတ် နဲ့ တွယ်ဆက်တစ်ရှူးတွေမှာ အများဆုံးရှိတတ်သလို အရေပြားရဲ့ တင်းရင်းမှုအတွက် အဓိကဇာတ်ဆောင်လည်း ဖြစ်ပါတယ်။
အသက်ကြီးလာတဲ့အခါ ကော်လာဂျင်ထုတ်တာ နည်းလာသလို ဆေးလိပ်သောက်တာ၊ UV ရောင်ခြည်တွေနဲ့ ထိတွေ့တာ၊ သကြားနဲ့ ကာဗိုဟိုက်ဒရိတ်ကစီဓာတ်တွေ အစားများတာက ကော်လာဂျင် လျော့နည်းစေတဲ့ အကြောင်းတွေပါ။
ကော်လာဂျင်နည်းလာရင် အရေပြားက လျော့တွဲလာတာ၊ အရေးအကြောင်းတွေ ပေါ်လာတာ၊ အဆစ်အမြစ်တွေ တောင့်လာလှုပ်ရှားရခက်လာတာ၊ ကြွက်သားတွေ ရှုံ့ပြီးကျုံလီလာတာ၊ အရိုးပွလာတာတွေ ခံစားရနိုင်ပါတယ်။ အမျိုးသမီးတွေမှာ အသက်နှစ်ဆယ်ကျော်တည်းက ကော်လာဂျင်ထုတ်လုပ်မှု လျော့နည်းလာတတ်ပြီး သွေးဆုံးချိန်မှာ ၃၀% ခန့် လျော့နည်းနိုင်ပါတယ်။
ကော်လာဂျင်ကို ဖြည့်စွက်စာအနေနဲ့ သောက်သုံးရင် တစ်နေ့ကို ၂.၅ ဂရမ်ကနေ ၁၅ ဂရမ်အတွင်း သောက်သုံးလို့ ရပြီး ဆိုးကျိုးရယ်လို့ ကြီးကြီးမားမား မရှိပါဘူး။ ကော်လာဂျင်ကို အလှကုန်တွေမှာလည်း ထည့်သွင်းအသုံးပြုကြပါတယ်။
ဂလူတာဆိုတာ ဘာလဲ?
Glutathione ဆိုတဲ့ ဂလူတာဟာ ဗဟိုအာရုံကြောစနစ်က အာရုံခံဆဲလ်တွေနဲ့ အသည်းကနေ ထုတ်လုပ်ပေးတဲ့ သဘာဝဓာတ်တိုးဆန့်ကျင်ပစ္စည်း (antioxidant) ဖြစ်ပြီး glycine, L-cysteine နဲ့ L-glutamate ဆိုတဲ့ amino acids သုံးမျိုးပါဝင်ပါတယ်။
ဂလူတာချို့တဲ့ရတဲ့ အကြောင်းရင်းတွေထဲမှာ အသက်ကြီးလာတာ၊ စိတ်ဖိစီးမှုများတာ၊ ရောဂါပိုးဝင်တာ၊ ကိုယ်ခံအားမကောင်းတာ၊ အာဟာရချို့တဲ့တာ၊ ကိုယ်လက်လှုပ်ရှားမှုနည်းတာနဲ့ နာတာရှည်ရောဂါတွေရှိတာတွေ ပါဝင်ပါတယ်။
မောပန်းအားကုန်နေတာ၊ အဆစ်အမြစ်နဲ့ ကြွက်သားတွေကိုက်တာ၊ အိပ်မပျော်တာ၊ကိုယ်ခံအားနည်းတာ၊ အာရုံစူးစိုက်လို့ မရတာတွေက ဂလူတာချို့တဲ့တဲ့ လက္ခဏာတွေပါ။ အသားအရေမွဲခြောက်လာပြီး နဖူး၊ ပါးပြင်နဲ့ မေးစေ့မှာ တင်းတိတ်လို အညိုကွက်၊ အမဲစက်တွေလည်း ဖြစ်လာတတ်ပါတယ်။ ဂလူတာကို သောက်ဆေး၊ ထိုးဆေး၊ ရှူဆေးအနေနဲ့ ဖြည့်စွက်လို့ရပြီး တစ်နေ့ကို ၆၀၀ မီလီဂရမ်ပမာဏထိ သုံးစွဲလို့ ရပါတယ်။ ကြာရှည်သုံးစွဲရင် ဇင့်ဓာတ်ချို့တဲ့နိုင်ပြီး ကိုယ်ဝန်ဆောင်နဲ့ ကလေးအမေတွေတော့ မသုံးစွဲသင့်ပါဘူး။
ဂလူတာနဲ့ ကော်လာဂျင် နှစ်မျိုးလုံးတွဲသောက်တဲ့အခါ အသားအရေကို ပိုကောင်းစေပြီး အူတွေက ကော်လာဂျင်ကို ပိုမိုစုပ်ယူနိုင်အောင် ဂလူတာက ကူညီပေးပါတယ်။ ဥအမျိုးမျိုး၊ ငါးနဲ့ အခွံမာငါးတွေ၊ ကြက်သားနဲ့ ကြက်ရိုးတွင်းခြင်ဆီ၊ ချဉ်တဲ့အသီးတွေ၊ ပဲအမျိုးမျိုး၊ အစိမ်းရောင်အရွက်တွေ၊ ငရုတ်ပွ၊ ဘယ်ရီသီး၊ ခရမ်းချဉ်သီး တွေဟာ ကော်လာဂျင်ကြွယ်ဝတဲ့ သဘာဝအစားအစာတွေပါ။ ဟင်းနုနွယ်၊ ထောပတ်သီး၊ နနွင်း၊ ပန်းဂေါ်ဖီ၊ ဂေါ်ဖီထုပ်၊ ဘရိုကိုလီ၊ ကညွတ်၊ မုန်လာဥနီစတဲ့ အစိမ်းရောင်အရွက်တွေ၊ ဗိုက်တာမင်စီကြွယ်ဝတဲ့ အသီးတွေ၊ ဒိန်ချဉ်စတာတွေမှာ ဂလူတာ ကြွယ်ဝစွာ ပါဝင်ပါတယ်။
ကော်လာဂျင်နဲ့ ဂလူတာဟာ အသားအရေ လှဖို့အတွက်သာမက အရိုးအဆစ်၊ ကြွက်သားတွေ သန်မာဖို့လည်း အထောက်အကူဖြစ်တာမို့ ဖြည့်စွက်စာအနေနဲ့ဖြစ်ဖြစ်၊ အစားအစာတွေကနေဖြစ်ဖြစ် ပြည်လည်ဖြည့်တင်းဖို့ လိုအပ်ပါလိမ့်မယ်။
Author: Dr.Yee Mon
